ତାଳଦଣ୍ଡା କେନାଳ ପାର୍ଶ୍ବରେ ଖୋଲିବ ନିମନ୍ତ୍ରଣ!
କଟକ: କଟକ ସହରବାସୀ ପାଇପାରିବେ ଖାଣ୍ଟି ଓଡ଼ିଆ ଖାଦ୍ୟର ସ୍ବାଦ। ପଖାଳ, ବଡି ଚୁରା, ବେସର ମାଛ ପରି ପାରଂପାରିକ ଓଡ଼ିଆ ଖାଦ୍ୟ ଏବେ କଟକିଆଙ୍କ ହାତ ପାହାନ୍ତାରେ ମିଳିବ। ଏଥିପାଇଁ ସହରରେ ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି) ତରଫରୁ ଖୁବଶୀଘ୍ର ଖୋଲିବାକୁ ଯାଉଛି ରେସ୍ତୋରାଁ ‘ନିମନ୍ତ୍ରଣ’। ଚଳିତ ମାସ ପ୍ରଥମ ସପ୍ତାହରେ ଏହା ଭୁବନେଶ୍ବରରେ ଖୋଲିଥିବା ବେଳେ ଏବେ କଟକରେ ଏହାକୁ ଖୋଲିବା ପାଇଁ ସରକାରଙ୍କୁ ପ୍ରସ୍ତାବ ଦିଆଯାଇଛି।
ଓଡ଼ିଆ ଖାଦ୍ୟକୁ ଲୋକପ୍ରିୟ କରି ବ୍ୟଞ୍ଜନ ପର୍ଯ୍ୟଟନର ବିକାଶ କରିବା ଉଦ୍ଦେଶ୍ୟରେ ନିମଣନ୍ତ୍ର ରେସ୍ତୋରାଁକୁ କଟକରେ ଖୋଲାଯିବ। ନୂତନ ଭାବେ ନିର୍ମାଣ ହୋଇଥିବା ତାଳଦଣ୍ଡା କେନାଲ ବନ୍ଧ ରାସ୍ତା ପାର୍ଶ୍ବରେ ଏହାକୁ ଖୋଲିବାକୁ ଯୋଜନା ହୋଇଛି। ଯୋବ୍ରା ତାଳଦଣ୍ଡା କେନାଲ ରାସ୍ତାରେ ଥିବା ‘ଆଇ ଲଭ୍ କଟକ’ ଲେଖାର ବିପରୀତ ପାର୍ଶ୍ବ ଖାଲି ସ୍ଥାନରେ ଏହା ନିର୍ମାଣ ହେବ। ଏଠାରେ ଓଡ଼ିଶାର ବିଭିନ୍ନ ଜିଲ୍ଲାର ପାରଂପାରିକ ଖାଦ୍ୟ ମଳିବ।
Sambad is now on WhatsApp
Join and get latest news updates delivered to you via WhatsApp
ବିଶେଷ ଭାବେ ପଖାଳ ସହିତ ବିଭିନ୍ନ ପ୍ରକାରର ଶାଗ ଭଜାରୁ ଆରମ୍ଭ କରି ଖାସି ମାଉଁସ, ନଡିଆ ଚିଙ୍ଗୁଡି ଓ କଙ୍କଡା ତାରକାରୀର ସ୍ବାଦ ରେସ୍ତୋରାଁରେ ମିଳିବ। ଭୁବନେଶ୍ବରରେ ଚଳିତ ମାସ ୩ ତାରିଖରେ ଏହା ଖୋଲିଥିଲା। ତେବେ କଟକରେ ଭୁବନେଶ୍ବର ତୁଳନାରେ ଖାଦ୍ୟର ଦର କମ ରଖିବାକୁ ସ୍ଥିର ହୋଇଛି। ସହରର ସିସୋର ପଠାରେ ନିର୍ମାଣ ଚାଲିଥିବା ଫ୍ଲୋଟିଂ ରେସ୍ତୋରାଁ ପରିଦର୍ଶନରେ ଓଟିଡିସର ଅଧିକାରୀ ଓ ସିଏମ୍ସି ଅଧିକାରୀ ଆସିଥିବା ବେଳେ ନିମନ୍ତ୍ରଣ ରେସ୍ତୋରାଁ ପାଇଁ ତାଳଦଣ୍ଡା କେନାଲ ଅଞ୍ଚଳରେ ଥିବା ଖାଲି ସ୍ଥାନକୁ ଅଧିକାରୀମାନେ ବୁଲି ଦେଖିଥିଲେ।