ଖୋର୍ଦ୍ଧା: କୋଭିଡ୧୯ ମହାମାରୀ ବିରୋଧରେ ରାଜ୍ୟ ସରକାରଙ୍କ ଲଢ଼େଇରେ ଖୋର୍ଦ୍ଧା ଜିଲ୍ଲାର ଶତାଧିକ ବଦାନ୍ୟ ବ୍ୟକ୍ତି, ଦାତବ୍ୟ ଅନୁଷ୍ଠାନ, ପ୍ରାଶାସନିକ କର୍ମଚାରୀ ଓ ସାଧାରଣ ନାଗରିକ ସାମିଲ ହୋଇଛନ୍ତି । ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠୀକୁ ଜିଲ୍ଲା ତରଫରୁ ଗତ ୧ ମାସ ମଧ୍ୟରେ ସେମାନଙ୍କ ନିକଟରୁ ସଂଗୃହିତ ୧ କୋଟି ଟଙ୍କା ଆଜି ଜିଲ୍ଲାପାଳଙ୍କୁ ପ୍ରଦାନ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲାପାଳଙ୍କ କାର୍ଯ୍ୟାଳୟରୁ ମିଳିଥିବା ସୂଚନାନୁସାରେ, ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠୀକୁ ସହାୟତା ପାଇଁ ଲକ୍ଡାଉନ୍ ୨ୟ ପର୍ଯ୍ୟାୟରୁ ବିଭିନ୍ନ ବେସରକାରୀ ସଂଗଠନ, ସରକାରୀ କର୍ମଚାରୀ, ଅଧିକାରୀ, ସାଧାରଣ ଜନତା ଚେକ୍ ଓ ନଗଦ ଟଙ୍କା ସହାୟତା ଦେବା ଆରମ୍ଭ କରିଥିଲେ । କେତେକ ସ୍ଥାନୀୟ ବିଡିଓ, ଉପଜିଲ୍ଲାପାଳ, ଅତିରିକ୍ତ ଜିଲ୍ଲାପାଳ ଏବଂ ଜିଲ୍ଲାପାଳଙ୍କୁ ପ୍ରଦାନ କରିଥିଲେ । ଏହି ସମସ୍ତ ସହାୟତା ୧ କୋଟି ଟଙ୍କା ହୋଇଛି । ଆଜି ସମସ୍ତ ଅର୍ଥକୁ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠୀରେ ଜମା କରିବାକୁ ମୁଖ୍ୟ ଶାସନ ସଚିବଙ୍କୁ ପ୍ରଦାନ କରାଯାଇଛି । ଏହି ପ୍ରଦାନ ବେଳେ ଜିଲ୍ଲାପାଳ ସୀତାଂଶୁ କୁମାର ରାଉତ, ଅତିରିକ୍ତ ଜିଲ୍ଲାପାଳ (ଭୁବନେଶ୍ୱର) ପ୍ରଫୁଲ୍ଲ କୁମାର ସ୍ୱାଇଁ ଉପସ୍ଥିତ ଥିଲେ ।
ଅପରପକ୍ଷରେ ତାମିଲନାଡ଼ୁ ତିରୁବନ୍ନମଲାଇ ଠାରେ ଥିବା ସତ୍ୟଚେନତା ଟ୍ରଷ୍ଟର ମୁଖ୍ୟ ଟ୍ରଷ୍ଟି ତଥା ଆଶ୍ରମର ପ୍ରତିଷ୍ଠାନା ଶ୍ରୀଆତ୍ମାନନ୍ଦଜୀ ମହାରାଜଙ୍କ ପକ୍ଷରୁ କରୋନା ସଂକ୍ରମିତଙ୍କ ଚିକିତ୍ସା ପାଇଁ ରିଲିଫ୍ ପାଣ୍ଠୀକୁ ୧ଲକ୍ଷ ଟଙ୍କାର ଚେକ୍ ଜିଲ୍ଲାପାଳଙ୍କୁ ପ୍ରଦାନ କରାଯାଇଛି । ଏହି ଚେକ୍ ପ୍ରଦାନ ବେେଳେ ଟ୍ରଷ୍ଟର ବିଭାଗୀୟ ଅଧିକାରୀ ନଳିନୀକାନ୍ତ ପଟ୍ଟନାୟକ, ସତ୍ୟଚେତନା ଶିକ୍ଷାଶ୍ରମର ଅଧ୍ୟକ୍ଷ ତଥା ନିର୍ଦ୍ଦେଶକ ସୁଦୀପ ରଂଜନ ମିଶ୍ର ଉପସ୍ଥିତ ଥିଲେ । ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠୀକୁ ସହାୟତା କରି କରୋନା ଯୁଦ୍ଧରେ ସାମିଲ ହୋଇଥିବା ବଦାନ୍ୟ ବ୍ୟକ୍ତି, ସଂଗଠନ ଓ ସରକାରୀ କର୍ମଚାରୀ ଏବଂ ଅଧିକାରୀଙ୍କୁ ଜିଲ୍ଲାପାଳ ଶ୍ରୀ ରାଉତ କୃତଜ୍ଞତା ଜ୍ଞାପନ କରିଛନ୍ତି ।