ନୂଆପଡ଼ା : ଦାଦନ ଶ୍ରମିକ ନିଖୋଜ, ଅପହରଣ ଓ ହତ୍ୟା ଅଭିଯୋଗ ଆଣିଲେ ପରିବାର ଲୋକେ
ନୂଆପଡ଼ା: ନୂଆପଡ଼ା ଜିଲ୍ଲାରେ ଜଣେ ଦାଦନ ଶ୍ରମିକ ନିଖୋଜ ହେବା ଘଟଣା ନଜରକୁ ଆସିଛି । ଏହି ଶ୍ରମିକଙ୍କୁ ଦଲାଲ ଅପହରଣ କରି ହତ୍ୟା କରିଥିବା ପରିବାର ଲୋକ ଅଭିଯୋଗ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ୭ ଜୁଲାଇ ୨୦୧୯ରେ ଦୁଇ ଶ୍ରମିକ ଦଲାଲ ଅରୁପ ନିଆଲ ଓ ପାର୍ଥମ ବେହେରା ନୂଆପଡ଼ା ଜିଲ୍ଲା ବୋଡ଼େନ ଥାନା ଅନ୍ତର୍ଗତ ଆମଗୁଡ଼ା ଗ୍ରାମର କିଶୋର ବନଛୋରଙ୍କୁ ସିକନ୍ଦରାବାଦକୁ ଦାଦନ କାମ କରିବାକୁ ପଠାଇଥିଲେ । କିଶୋର ସେଠାରେ ୨୫ ଦିନ କାମ କରିଥିବା ବେଳେ ୩୦ ଜୁଲାଇ ୨୦୧୯ ଫୋନକରି ପରିବାର ଲୋଙ୍କୁ ତାଙ୍କର ଶରୀର ଅସୁସ୍ଥ ଥିବା କହିଥିଲେ ।
ଏହା ପରେ କିଶୋରଙ୍କ ଭାଇ ରାଇଧର ବନଛୋର ଓ ଭଣଜା ଦେବବ୍ୟାସ ଗହୀର ତାଙ୍କ ସନ୍ଧାନରେ ସିକନ୍ଦରାବାଦ ବାହାରିଥିଲେ। ହେଲେ ସେଠାରେ ଥିବା ଅରୁଣ ନିଆଲ ଓ ପାର୍ଥମ ବେହେରା ସେମାନଙ୍କୁ ଆସିବା ପାଇଁ ମନାକଲେ ଏବଂ କହିଲେ ଯେ କିଶୋରକୁ ତାଙ୍କର ଦୁଇଜଣ ସହଯୋଗୀ ସାଥିରେ ନେଇ ଘରକୁ ଆସୁଛନ୍ତି। ତେଣୁ ରାଇଧର ବନଛୋର ଓ ବେଦବ୍ୟାସ ଗହୀର ଦୁଇଦିନ ଧରି କଣ୍ଡାବାଞ୍ଜି ରେଳଷ୍ଟେସନରେ କିଶୋରଙ୍କ ପାଇଁ ଅପେକ୍ଷା କରିଥିଲେ, କିନ୍ତୁ ସେ ଆସିଲେ ନାହିଁ। ତେବେ ଅରୁପ ନିଆଲ ଓ ପାର୍ଥମ ବେହେରା କିଶୋରଙ୍କୁ ଅପହରଣ କରି ନେଇ ହତ୍ୟା କରିଛନ୍ତି ବା କୌଣସି କାରଣରୁ ଲୁଚାଇଛନ୍ତି ବୋଲି ପରିବାର ଲୋକ ଅଭିଯୋଗ କରିଛନ୍ତି । ଏହା ଉପରେ କିଶୋର ବନଛୋର ସ୍ତ୍ରୀ କୁଲ ବନଛୋର ଗତ ୨୧ ଅଗଷ୍ଟ୨୦୨୦ ରେ ବୋଡ଼େନ ଥାନାରେ ଏକ ଲିଖିତ ଅଭିଯୋଗ କରିଛନ୍ତି । କିନ୍ତୁ ଏପର୍ଯ୍ୟନ୍ତ ଘଟଣାକୁ ବର୍ତ୍ତମାନ ମଧ୍ୟ କୌଣସି ପଦକ୍ଷେପ ଗ୍ରହଣ କରାଯାଉ ନଥିବା ପରିବାର ଲୋକ ଅଭିଯୋଗ କରିଛନ୍ତି । ଏହାକୁ ନେଇ ଦଳିତ ଅଧିକାର ମଞ୍ଚ ଜିଲ୍ଲାସଭାପତି କମଳ ଚରଣ ତାଣ୍ଡି ଶୁକ୍ରବାର ଦିନ ବୋଡ଼େନ ଥାନାରେ ନିଖୋଜ ଦାଦନ ଶ୍ରମିକ ଙ୍କୁ ଉଦ୍ଧାର ପାଇଁ ଏକ ଦାବିପତ୍ର ପ୍ରଦାନ କରିଛନ୍ତି ।