୨୫ ବୀରଗାଥା ପ୍ରତିଯୋଗୀଙ୍କୁ ପୁରସ୍କାର ପ୍ରଦାନ
ସମାରୋହରେ ଯୋଗ ଦେଲେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ
ନୂଆଦିଲ୍ଲୀ/ଭୁବନେଶ୍ୱର : ଭାରତ ଉପରେ ବିଶ୍ୱ ଅନେକ ଅପେକ୍ଷା ରଖିଛି । ତେଣୁ ଯୁବଶକ୍ତି ନିଜ ଅଧିକାର ବିଷୟରେ ସଚେତନ ହେବା ବେଳେ ଏହି ବିଷୟକୁ ହୃଦୟଙ୍ଗମ କରନ୍ତୁ । ଦେଶ ପ୍ରତି ନିଜର ଦାୟିତ୍ୱ ଓ କର୍ତ୍ତବ୍ୟକୁ ବୁଝିବା ସହ ବୈଶ୍ୱିକ ସମସ୍ୟାକୁ ସମାଧାନ କରିବା ପାଇଁ ଅଧିକ ଯତ୍ନଶୀଳ ହେବା ପାଇଁ ପରାମର୍ଶ ଦେଇଛନ୍ତି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଶୁକ୍ରବାର ନୂଆଦିଲ୍ଲୀ ଠାରେ ଦୁଇଟି ପୃଥକ କାର୍ଯ୍ୟକ୍ରମ “ଯୁବ ସମ୍ବାଦ : ଭାରତ @ ୨୦୪୭” ଏବଂ “ବୀରଗାଥା ପ୍ରତିଯୋଗିତା ପୁରସ୍କାର” ସମାରୋହରେ ଯୋଗଦେଇ ଶ୍ରୀ ପ୍ରଧାନ ଏହା କହିଛନ୍ତି । ସେ କହିଛନ୍ତି ଯେ ସହିଦ ଭଗତ ସିଂହ, ସହିଦ ବାଜି ରାଉତଙ୍କ ଭଳି ଅନେକ ସଂଗ୍ରାମୀ ଆମକୁ ପ୍ରେରଣା ଦେଇ ଆସିଛନ୍ତି । ଭାରତର ସମ୍ପନ୍ନ ସଭ୍ୟତାକୁ ଆଗକୁ ନେବାର ଦାୟିତ୍ୱ ଉର୍ଜାବାନ ଯୁବପିଢ଼ିଙ୍କ ଉପରେ ନ୍ୟସ୍ତ ରହିଛି । ଏକବିଂଶ ଶତାବ୍ଦୀରେ ଭାରତୀୟ ପରମ୍ପରା, ମୂଲ୍ୟବୋଧ, ଜ୍ଞାନକୁ ବିଶ୍ୱ ଦରବାରରେ ପହଞ୍ଚାଇବାର ଦାୟିତ୍ୱ ମଧ୍ୟ ନୂଆପିଢ଼ିଙ୍କର । ଯେଉଁ ଆନ୍ତରିକତା ଏବଂ ଆତ୍ମବିଶ୍ୱାସରେ ଦେଶର ସ୍ୱାଧୀନତା ପାଇଁ ସଂଗ୍ରାମୀମାନେ ଲଢ଼ିଥିଲେ ସେହି ଆତ୍ମବିଶ୍ୱାସ ଓ ଆନ୍ତରିକତାର ସହ ବର୍ତ୍ତମାନର ଯୁବପିଢି ଅମୃତ କାଳର ଆଗାମୀ ୨୫ ବର୍ଷରେ ଭାରତକୁ ଶିଖରକୁ ନେବା ପାଇଁ ଉଦ୍ୟମ କରିବା ଆବଶ୍ୟକ।
Sambad is now on WhatsApp
Join and get latest news updates delivered to you via WhatsApp
ଆମ ଯୁବବର୍ଗଙ୍କ ପ୍ରତିଭା, ଦୃଢ଼ ଇଚ୍ଛାଶକ୍ତି ଏବଂ ଆତ୍ମବିଶ୍ୱାସ ପ୍ରେରଣାଦାୟୀ ଓ ଉତ୍ସାହପୂର୍ଣ୍ଣ । ବିଶେଷ ଭାବରେ ଆମେ ଯେତେବେଳେ ‘ଆଜାଦୀ କା ଅମୃତ ମହୋତ୍ସବ’ ପାଳନ କରୁଛେ ସେହି ସମୟରେ ଯୁବ ବ୍ୟପାର ମନ୍ତ୍ରଣାଳୟ ପକ୍ଷରୁ ଯୁବ ସମ୍ବାଦ ଶୀର୍ଷକ ଆଲୋଚନା ଚକ୍ର ଦେଶରେ ଏକ ସକାରାତ୍ମକ ପରିବେଶ ସୃଷ୍ଟି କରିବ। ଶିକ୍ଷା ମନ୍ତ୍ରଣାଳୟ ସହଯୋଗରେ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଆୟୋଜିତ ‘ବୀରଗାଥା ପ୍ରକଳ୍ପ ଅଧୀନ’ରେ ବୀର ଗାଥା ପ୍ରତିଯୋଗିତାର ବିଜୟୀ ୨୫ ଜଣ ପ୍ରତିଯୋଗୀଙ୍କୁ ଶ୍ରୀ ପ୍ରଧାନ କେନ୍ଦ୍ରମନ୍ତ୍ରୀ ରାଜନାଥ ସିଂହଙ୍କ ସହ ମିଶି ସମ୍ବର୍ଦ୍ଧିତ କରିଛନ୍ତି।
ଶ୍ରୀ ପ୍ରଧାନ କହିଛନ୍ତି ପିଲାବେଳରୁ ଦେଶ ପ୍ରତି ଦାୟିତ୍ୱ ଭାବନାକୁ ଅଧିକ ଉଜାଗର କରିବା ପାଇଁ ପ୍ରତିରକ୍ଷା ମନ୍ତ୍ରଣାଳୟ ସହ ବିଚାରବିମର୍ଷ କରାଯାଇ ଶିକ୍ଷା ମନ୍ତ୍ରଣାଳୟ ବିଗତ ୭୫ ବର୍ଷର ଆମର ସୈନିକ ମାନଙ୍କର ବୀରତ୍ୱ ଏବଂ ଭାରତର ବୀରଗାଥାକୁ ବିଦ୍ୟାଳୟ ପାଠ୍ୟକ୍ରମ ଓ ପାଠ୍ୟ ପୁସ୍ତକରେ ସାମିଲ କରିବା ପାଇଁ କାର୍ଯ୍ୟ କରିବ । ସେହିପରି ଦେଶର ସୈନିକଙ୍କ ଗୌରବାର୍ଥେ ଏହି ସୁପର ୨୫ ପ୍ରତିଯୋଗିତାକୁ ସେନା ସୁପର ୨୫ରେ ନାମକରଣ କରିବା ପାଇଁ ଶ୍ରୀ ପ୍ରଧାନ ପରାମର୍ଶ ଦେଇଛନ୍ତି । ଚଳିତବର୍ଷ ୫ ହଜାର ବିଦ୍ୟାଳୟର ୮ ଲକ୍ଷ ସ୍କୁଲ ଛାତ୍ରଛାତ୍ରୀଙ୍କୁ ନେଇ ଆୟୋଜନ କରାଯାଇଥିଲା । ଆଗାମୀ ଦିନରେ ୧ କୋଟି ସ୍କୁଲ ଛାତ୍ରଛାତ୍ରୀଙ୍କୁ ଯୋଡ଼ିବା ପାଇଁ ଶିକ୍ଷା ମନ୍ତ୍ରଣାଳୟ କାମ କରିବ ବୋଲି ସେ କହିଛନ୍ତି।