ପାକିସ୍ତାନରେ ଭାରତୀୟ ମିସନର ଦୁଇ କର୍ମଚାରୀଙ୍କୁ ଛଡ଼ରେ ପିଟିବା ସହ ଅପରିଷ୍କାର ପାଣି ପିଆଇ ନିର୍ଯାତନା ଦିଆଯାଇଛି
ନୂଆଦିଲ୍ଲୀ: ୧୨ ଘଣ୍ଟା ଧରି ଅଟକ ରଖାଯାଇ ପରେ ମୁକ୍ତ କରାଯାଇଥିବା ଇସ୍ଲାମାବାଦସ୍ଥିତ ଭାରତୀୟ ମିସନ୍ର ଦୁଇ କର୍ମଚାରୀଙ୍କୁ ଛଡ଼ ଓ ବାଡ଼ିରେ ପିଟାଯିବା ସହ ଅପରିଷ୍କାର ପାଣି ପିଆଇ ନିର୍ଯାତନା ଦିଆଯାଇଛି ବୋଲି ବିଶେଷସୂତ୍ରରୁ ପ୍ରକାଶ।
Sambad is now on WhatsApp
Join and get latest news updates delivered to you via WhatsApp
ହାଇକମିସନ୍ ପାଖରେ ଥିବା ପେଟ୍ରୋଲ୍ ଷ୍ଟେସନ୍ରୁ ଦୁହିଁଙ୍କୁ ସୋମବାର ସକାଳ ୮: ୩୦ରେ ଛଅଟି ଗାଡ଼ିରେ ଆସିଥିବା ପ୍ରାୟ ୧୫/୧୬ ଜଣ ବ୍ୟକ୍ତି ସେମାନଙ୍କୁ ଉଠାଇ ନେଇଥିଲେ। ଅନ୍ଧପଟଳି ଭାବେ ଦୁହିଁଙ୍କ ମୁହଁରେ ଦୁଇଟି ବ୍ୟାଗ୍ ପିନ୍ଧାଇ ଦିଆଯାଇଥିଲା ଓ ହାତକଡ଼ା ପକାଯାଇଥିଲା।
ଏହାପରେ ଦୁହିଁଙ୍କୁ ଘଟଣାସ୍ଥଳରୁ ପ୍ରାୟ ୧୦ ମିନିଟ୍ ଦୂର ବାଟର କୌଣସି ଏକ ଅଜ୍ଞାତ ସ୍ଥାନକୁ ନିଆଯାଇ ୬ ଘଣ୍ଟା ଧରି ପଚରାଉଚୁରା କରାଯାଇଥିଲା। ବାରମ୍ବାର ସେମାନଙ୍କୁ ଛଡ଼ ଓ କାଠ ବାଡ଼ିରେ ପିଟାପିଟି କରିବା ସହ ଅପରିଷ୍କାର ପାଣି ପିଇବାକୁ ଦିଆଯାଇଥିଲା। ହାଇକମିସନ୍ ଅଫିସ୍ର ସମସ୍ତ କର୍ମଚାରୀଙ୍କର ନିର୍ଦ୍ଦିଷ୍ଟ ଭୂମିକା ଓ କାର୍ଯ୍ୟ ଆଦି ସମ୍ପର୍କରେ ପଚରାଉଚୁରା କରାଯାଇଥିଲା।
ରାତି ପ୍ରାୟ ୯ଟା ବେଳେ ଦୁଇଜଣଙ୍କୁ ଭାରତୀୟ ହାଇକମିସନ୍ଙ୍କୁ ହସ୍ତାନ୍ତର କରାଯାଇଥିଲା। ସେମାନଙ୍କ ବେକ, ମୁହଁ ଓ ଜଙ୍ଘରେ ଗୁଡ଼ାଏ କ୍ଷତ ଚିହ୍ନ ହୋଇଛି। କିନ୍ତୁ, ଜୀବନ ପ୍ରତି ବିପଦ ଥିବା ଭଳି କୌଣସି ଆଘାତ ଲାଗି ନାହିଁ ବୋଲି ଡାକ୍ତରୀ ପରୀକ୍ଷା ପରେ ଜଣାପଡ଼ିଛି।