ଅରୁଣାଚଳରେ ଭାରତୀୟ ସୀମା ଭିତରେ ଚୀନ୍ କାଠ ପୋଲ ତିଆରି କରିଥିବା ନେଇ ବିଜେପି ସାଂସଦଙ୍କ ଦାବିକୁ ଖଣ୍ଡନ କଲା ଭାରତୀୟ ସେନା
ଗୌହାଟୀ : ଅରୁଣାଚଳପ୍ରଦେଶର ବିଜେପି ସାଂସଦ ବୁଧବାର ଦେଇଥିବା ବୟାନକୁ ନେଇ ବିବାଦ ଆରମ୍ଭ ହୋଇଛି । ଚୀନ୍ର ସେନା ଅରୁଣାଚଳପ୍ରଦେଶ ସୀମା ମଧ୍ୟରେ ପଶି ଏକ କାଠ ପୋଲ ତିଆରି କରିଥିବା ନେଇ ବିଜେପି ସାଂସଦ କହିବା ପରେ ଏବେ ସେ ନେଇ ଆଲୋଚନା ଆରମ୍ଭ ହୋଇ ଯାଇଛି । ତେବେ ସାଂସଦଙ୍କ ଏଭଳି ଦାବିକୁ ଅସ୍ୱୀକାର କରିଛି ଭାରତୀୟ ସେନା ।
Sambad is now on WhatsApp
Join and get latest news updates delivered to you via WhatsApp
ଅରୁଣାଚଳପ୍ରଦେଶର ଅରୁଣାଚଳ(ପୂର୍ବ) ଲୋକସଭା ସାଂସଦ ତଥା ରାଜ୍ୟର ବିଜେପି ଅଧ୍ୟକ୍ଷ ତପିର ଗାଓଙ୍କ କହିବା ଅନୁଯାୟୀ, ଚଗଲଗାମ୍ଠାରୁ ୨୫କିଲୋମିଟର ଦୂରରେ ଏକ ନଦୀ ରହିଛି, ଯେଉଁଠି ଏହି କାଠ ତିଆରି ପୋଲ ନିର୍ମାଣ କରାଯାଇଛି । ଜଣେ ସ୍ଥାନୀୟ ଯୁବକ ସେଠାକୁ ମାଛ ଧରିବାକୁ ଯାଇଥିବା ବେଳେ ତାହାର ଭିଡିଓ ତିଆରି କରି ମୋତେ ପଠାଇଥିଲେ । ସେହି ଅଞ୍ଚଳର ପ୍ରତିନିଧି ହିସାବରେ ମୁଁ ଏହାକୁ ସମସ୍ତଙ୍କ ସାମ୍ନାକୁ ଆଣିବାକୁ ଚିନ୍ତା କରିଥିଲି ବୋଲି ବୁଧବାର କରିଥିଲେ ତାପିର । ଏହା ସହ ଚୀନ୍ ସେନା ଭାରତୀୟ ସୀମାକୁ ମଧ୍ୟ ପ୍ରବେଶ କରିଥିବା ନେଇ ଦାବି କରିଛନ୍ତି ତାପିର ।
ତେବେ ତାପିରଙ୍କ ଏଭଳି ଦାବିକୁ ଖଣ୍ଡନ କରି କର୍ଣ୍ଣେଲ ଅମନ ଆନନ୍ଦ କହିଛନ୍ତି କି, ଯେଉଁ ଅଞ୍ଚଳ ବିଷୟରେ ତାପିର ଗାଓ କହୁଛନ୍ତି, ସେହି ଅଞ୍ଚଳକୁ ଫିଶ୍ ଟେଲ ବୋଲି କୁହାଯାଏ । ସେଠାକୁ ଦୁଇ ଦେଶର ଲୋକେ ଭିନ୍ନ ଭିନ୍ନ କାରଣ ପାଇଁ ଯାଇଥାନ୍ତି । କିଛି ମାଛ ମାରିବା ଉଦ୍ଦେଶ୍ୟରେ ତ କିଛି ଜଡ଼ିବୁଟି ଆଣିବା ଉଦ୍ଦେଶ୍ୟରେ ସେଠାକୁ ଯାଇଥାନ୍ତି । କିନ୍ତୁ ଚୀନ୍ ସେନା ବା ଚୀନ୍ ନାଗରିକଙ୍କ ସେଠାରେ ସ୍ଥାୟୀ ଉପସ୍ଥିତି ନାହିଁ । କାରଣ ଆମର ଯବାନମାନେ ସେହି ଅଞ୍ଚଳରେ କଡ଼ା ନଜର ରଖିଛନ୍ତି । ବର୍ଷାଦିନେ ସେଠରେ ଥିବା ନଦୀରେ ଜଳସ୍ତର ବଢ଼ିଯିବା ହେତୁ ଯିବା ଆସିବା ପାଇଁ ଅସ୍ଥାୟୀ ପୋଲ ନିର୍ମାଣ କରାଯାଇଥାଏ ।