ସିଆଚେନ୍ରେ ମୁତୟନ ସେନା ଯବାନଙ୍କୁ ଭଲ ଖାଦ୍ୟ ଓ ଉପଯୁକ୍ତ ସୁରକ୍ଷା ଉପକରଣ ଦିଆଯାଉନାହିଁ : ସିଏଜି ରିପୋର୍ଟ
ନୂଆଦିଲ୍ଲୀ : ବରଫାବୃତ ତଥା ଦୁର୍ଗମ ସିଆଚେନ ଓ ଲଦାଖରେ ଅତି ପ୍ରତିକୂଳ ଜଳବାୟୁ ମଧ୍ୟରେ ଭାରତୀୟ ସୀମାର ସୁରକ୍ଷା କରୁଥିବା ଯବାନମାନଙ୍କୁ ସର୍ବନିମ୍ନ ସୁରକ୍ଷା ଉପକରଣ ଯୋଗାଇଦେବାକୁ ଅବହେଳା କରାଯାଉଛି । ଏପରିକି ଏହି ଜଳବାୟୁରେ ସେମାନଙ୍କୁ ଆବଶ୍ୟକ କ୍ୟାଲୋରୀଯୁକ୍ତ ଖାଦ୍ୟ ଦିଆଯାଉନାହିଁ । ଯଦ୍ୱାରା ସେମାନଙ୍କ ଶାରିରୀକ ଦକ୍ଷତା ପ୍ରଭାବିତ ହେଉଛି ଓ ସେମାନେ ବିପଦରେ ପଡୁଛନ୍ତି ବୋଲି ଲୋକସଭାରେ ଆଜି ଦାଖଲ ହୋଇଥିବା ସିଏଜି ରିପୋର୍ଟରୁ ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସିଆଚେନ ପାକିସ୍ତାନ ସୀମାରେ ଥିବାବେଳେ ଲଦାଖ ଚୀନ ସୀମାରେ ଥିବାରୁ ଏହି ଦୁଇଟି କ୍ଷେତ୍ରର ଗୁରୁତ୍ୱ ଅଧିକ ଥିବାରୁ ସେନାର ଆବଶ୍ୟକତା ଉପରେ ଗୁରୁତ୍ୱ ଦେବାକୁ ସିଏଜି ରିପୋର୍ଟରେ ପରାମର୍ଶ ଦିଆଯାଇଛି ।
୨୦୧୫-୧୬ରୁ ୨୦୧୭-୧୮ ମଧ୍ୟରେ ସିଏଜି ପକ୍ଷରୁ ଏହି ଅଡିଟ କରାଯାଇଥିଲା । ଏହି ସିଏଜି ରିପୋର୍ଟରେ କୁହାଯାଇଛି ଯେ ସିଆଚେନର ଉଚ୍ଚତା ଓ ପ୍ରବଳ ଥଣ୍ଡାରେ ମୁତୟନ ଥିବା ଭାରତୀୟ ସେନାର ଯବାନମାନଙ୍କ ପାଇଁ ଆବଶ୍ୟକ ସ୍ୱତନ୍ତ୍ର ଜୋତା, ଜ୍ୟାକେଟ୍ ଓ ଚଷମା ଆଦି ଠିକ ଭାବରେ ଯୋଗାଇଦିଆଯାଉନାହିଁ । ଏପରିକି ସେମାନେ ବାଧ୍ୟ ହୋଇ ରିସାଇକେଲ ହୋଇଥିବା ସାମଗ୍ରୀ ବ୍ୟବହାର କରୁଛନ୍ତି । ଏହା ଦ୍ୱାରା ସେମାନେ ନିୟମିତଭାବେ ବିପଦର ସମ୍ମୁଖୀନ ହେଉଛନ୍ତି । ଏହି ରିପୋର୍ଟରେ କୁହାଯାଇଛି ଯେ ଏହି ଜଳବାୟୁ ପାଇଁ ଆବଶ୍ୟକ ଉପକରଣ ଦେଶରେ ନିର୍ମାଣ ହେଉନଥିବାରୁ ସେଗୁଡ଼ିକୁ ବାହାରୁ ଆମଦାନୀ କରାଯାଉଛି ।