ଆଲୋଚନାର ଦିନକ ପରେ ଚୀନର ଅପପ୍ରଚାର, ସମରାଭ୍ୟାସ ଭିଡିଓ ଦେଖାଇ ଭାରତକୁ ଡରାଇବାକୁ ଉଦ୍ୟମ
ନୂଆଦିଲ୍ଲୀ : ଭାରତ ଓ ଚୀନ ମଧ୍ୟରେ ସାମରିକ କମାଣ୍ଡର ସ୍ତରୀୟ କଥାବାର୍ତ୍ତାର ଦିନକ ପରେ ଚୀନ ପୁଣି ଥରେ ନିଜର ପ୍ରୋପାଗେଣ୍ଡା ବା ଅପପ୍ରଚାର ଆରମ୍ଭ କରିଦେଇଛି । ସୀମାରେ ନିଜର ସାମରିକ ଶକ୍ତିକୁ ଦର୍ଶାଇ ଚୀନ ଭାରତ ଉପରେ ମାନସିକ ଚାପ ସୃଷ୍ଟି କରିବାକୁ ଚେଷ୍ଟା କରିଛି ।
Sambad is now on WhatsApp
Join and get latest news updates delivered to you via WhatsApp
ଚୀନ ସରକାରଙ୍କ ମୁଖପତ୍ର କୁହାଯାଉଥିବା ଗ୍ଲୋବାଲ ଟାଇମ୍ସରେ ଏକ ଭିଡିଓ ଜାରି କରି ସୀମାରେ ନିଜର ସାମରିକ ଶକ୍ତିକୁ ଦର୍ଶାଯାଇଛି । ଏହି ଭିଡିଓରେ ତିବ୍ବତରେ ଚୀନର ପିପୁଲ୍ସ ଲିବରେସନ ଆର୍ମି (ପିଏଲଏ) ପକ୍ଷରୁ ଏକ ବଡ଼ ଧରଣର ସମରାଭ୍ୟାସ କରାଯାଉଥିବା ଦର୍ଶାଯାଇଛି । ଏହି ସମରାଭ୍ୟାସରେ ପିଏଲଏ ସମେତ ପିଏଲଏ ବାୟୁସେନା ଓ ରକେଟ ଫୋର୍ସ ମଧ୍ୟ ଭାଗ ନେଇଥିବା ଦେଖାଯାଇଛି । ଗ୍ଲୋବାଲ ଟାଇମ୍ସ ରିପୋର୍ଟରେ କୁହାଯାଇଛି ଯେ କିଛି ଘଣ୍ଟା ଧରି ଚାଲିଥିବା ଏହି ସମରାଭ୍ୟାସରେ ଅନେକ ପ୍ରକାରର ଆଧୁନିକ ମିଲିଟାରୀ ଉପକରଣ, ସାମରିକ ଲଢୁଆ ଯାନର ଉପଯୋଗ କରାଯାଇଥିଲା । ଉଚ୍ଚ ପାର୍ବତୀୟ ଅଂଚଳରେ ଚୀନ ସେନାର କ୍ଷମତାକୁ ଏହା ଦର୍ଶାଉଛି ବୋଲି ଏହି ରିପୋର୍ଟରେ କୁହାଯାଇଛି ।
ତେବେ ଭାରତ ଉପରେ ମାନସିକ ଚାପ ସୃଷ୍ଟି କରିବାକୁ ଚୀନର ଏହା ଏକ ଉଦ୍ୟମ ବୋଲି ସାମରିକ ବିଶେଷଜ୍ଞମାନେ କହିଛନ୍ତି । ନିଜ ଶତ୍ରୁ ଉପରେ ମାନସିକ ଚାପ ସୃଷ୍ଟି କରିବାକୁ ଚୀନର ଏହା ଏକ ପୁରୁଣା କୌଶଳ । କିନ୍ତୁ ଭାରତୀୟ ସେନା ଏସଂପର୍କରେ ଅବଗତ ଥିବାରୁ ଏ ନେଇ ଚିନ୍ତାର କାରଣ ନାହିଁ ବୋଲି ବିଶେଷଜ୍ଞମାନେ କହିଛନ୍ତି ।
ଗତକାଲି ଭାରତ ଓ ଚୀନର ସେନା କମାଣ୍ଡରଙ୍କ ଆଲୋଚନା ଲଦାଖକୁ ଲାଗିଥିବା ଚୀନର ତିବ୍ବତର ମୋଲଡୋଠାରେ ହୋଇଥିଲା । ଭାରତ ତରଫରୁ ୧୪ କର୍ପସର କମାଣ୍ଡର ଲେପ୍ଟନାଣ୍ଟ ଜେନେରାଲ ହରିନ୍ଦର ସିଂ ଓ ଚୀନ ତରଫରୁ ତିବ୍ବତ ମିଲିଟାରୀ ଡିଷ୍ଟ୍ରିକ୍ଟର କମାଣ୍ଡର ଏହି ଆଲୋଚନାରେ ଅଂଶଗ୍ରହଣ କରିଥିଲେ । ଆଲୋଚନା ମାଧ୍ୟମରେ ସୀମା ବିବାଦର ସମାଧାନ ପାଇଁ ଦୁଇ ପକ୍ଷ ରାଜି ହୋଇଛନ୍ତି ।