ବିଜେପି ଶାସିତ ରାଜ୍ୟରୁ ପଶ୍ଚିମବଙ୍ଗକୁ ସୁରକ୍ଷାବଳ ନ ଆଣିବାକୁ ତୃଣମୂଳ କଂଗ୍ରେସର ଦାବି
କୋଲକତା : ପଶ୍ଚିମବଙ୍ଗରେ ଆଗକୁ ୨ୟ ପର୍ଯ୍ୟାୟ ନିର୍ବାଚନ ଥିବାବେଳେ ତୃଣମୂଳ କଂଗ୍ରେସର ଏକ ପ୍ରତିନିଥିମଣ୍ଡଳ ଆଜି ରାଜ୍ୟର ମୁଖ୍ୟ ନିର୍ବାଚନ ଅଧିକାରୀଙ୍କୁ ଭେଟି ବିଜେପି ଶାସିତ ରାଜ୍ୟରୁ ସୁରକ୍ଷାବଳ ନ ଆଣିବାକୁ ଅନୁରୋଧ କରିଛି । ବିଶେଷକରି ଉତ୍ତରପ୍ରଦେଶ, ବିହାର, ମଧ୍ୟପ୍ରଦେଶ ଆଦି ବିଜେପି ବା ଏନଡିଏ ଶାସିତ ରାଜ୍ୟରୁ ସଶସ୍ତ୍ର ପୁଲିସ ନ ଆଣିବାକୁ ଦଳ ଅନୁରୋଧ କରିଛି । ଏସବୁ ରାଜ୍ୟରୁ ପୁଲିସ ଆଣିଲେ ରାଜ୍ୟରେ ନିରପେକ୍ଷ ନିର୍ବାଚନ କରିବା ସମ୍ଭବ ହେବ ନାହିଁ ।
Sambad is now on WhatsApp
Join and get latest news updates delivered to you via WhatsApp
ଦଳ ଆହୁରି ମଧ୍ୟ ଅଭିଯୋଗ କରିଛି ଯେ ବିଜେପି ନେତା ଶୁଭେନ୍ଦୁ ଅଧିକାରୀ ବାହାର ରାଜ୍ୟର ଅପରାଧୀମାନଙ୍କୁ ଆଣି ପଶ୍ଚିମବଙ୍ଗର ପୂର୍ବ ମେଦିନିପୁର ଅନ୍ତର୍ଗତ ନନ୍ଦିଗ୍ରାମରେ ରଖିଛନ୍ତି । ସେମାନଙ୍କୁ ତୁରନ୍ତ ଆଗୁଆ ଗିରଫ କରି ହାଜତରେ ରଖାଯାଉ ।
ସୂଚନାଯୋଗ୍ୟ ଯେ ଆସନ୍ତା ଏପ୍ରିଲ ୧ ତାରିଖରେ ପଶ୍ଚିମବଙ୍ଗରେ ୨ୟ ପର୍ଯ୍ୟାୟ ନିର୍ବାଚନ ହେବ । ଏହି ପର୍ଯ୍ୟାୟରେ ବହୁଚର୍ଚ୍ଚିତ ନନ୍ଦୀଗ୍ରାମ ନିର୍ବାଚନ ମଣ୍ଡଳୀରେ ଭୋଟ ଗ୍ରହଣ ହେବ । ଏହି ନିର୍ବାଚନ ମଣ୍ଡଳୀରେ ତୃଣମୂଳ କଂଗ୍ରେସ ନେତ୍ରୀ ତଥା ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ବିଜେପିର ଶୁଭେନ୍ଦୁ ଅଧିକାରୀଙ୍କ ମଧ୍ୟରେ ସିଧାସଳଖ ମୁକାବିଲା ହେଉଛି । ଆଜି ମମତା ନନ୍ଦୀଗ୍ରମରେ ଏକ ବିଶାଳ ପଦଯାତ୍ରାରେ ଯୋଗ ଦେଇଥିଲେ ।