ଅଧିକ ଯାତ୍ରୀ ଓ ସାମଗ୍ରୀ ପରିବହନ ପାଇଁ ବସ୍ ଓ ଟ୍ରକ୍ର ଲମ୍ବ ଏବଂ ଉଚ୍ଚତା ବଢ଼ିବ
ନୂଆଦିଲ୍ଲୀ: ସଡ଼କ ପଥରେ ଅଧିକ ଯାତ୍ରୀ ଓ ଜିନିଷପତ୍ର ପରିବହନ ନିମନ୍ତେ କେତେକ ବର୍ଗର ଯାନବାହନ ବିଶେଷକରି, ବସ୍ ଓ ମାଲବାହୀ ଟ୍ରକ୍ଗୁଡ଼ିକର ଲମ୍ବ ଓ ଉଚ୍ଚତା ବଢ଼ାଇବାକୁ ପରିବହନ ମନ୍ତ୍ରାଳୟ ଅନୁମୋଦନ କରିଛନ୍ତି। ଟ୍ରକ୍ରେ ଅଧିକ ଜିନିଷପତ୍ର ପରିବହନ ପାଇଁ ମନ୍ତ୍ରାଳୟ ମାଲବାହୀ ଯାନର ଏକ୍ସିଲ୍ ଲୋଡ୍ ୨୫% ବଢ଼ାଇବାର ପ୍ରାୟ ଦୁଇ ବର୍ଷ ପରେ ଏପରି ଅନୁମତି ପ୍ରଦାନ କରିଛି।
Sambad is now on WhatsApp
Join and get latest news updates delivered to you via WhatsApp
ଏକ ବିଜ୍ଞପ୍ତି ଅନୁସାରେ, ଏବେ ସାଧାରଣ ବସ୍ର ଲମ୍ବ ୧୩. ୫ ମିଟର କରିହେବ। ପୂର୍ବରୁ ବସ୍ର ଲମ୍ବ ୧୨ ମିଟର ମଧ୍ୟରେ ସୀମିତ ଥିଲା। ବସ୍ର ଲମ୍ବ ବୃଦ୍ଧି ଫଳରେ ଏହାର ଯାତ୍ରୀ ପରିବହନ କ୍ଷମତା ୧୦-୧୫% ବୃଦ୍ଧି ପାଇବ।
ସେହିଭଳି ଟ୍ରଲି ବନ୍ଦ ଥିବା ବା ଆଇଏସ୍ଓ ୧ ଫ୍ରେଟ୍ କଣ୍ଟେନର୍ ହେଭି ଡିୟୁଟି ଟ୍ରକ୍ଗୁଡ଼ିକର ସାମଗ୍ରିକ ଉଚ୍ଚତା ୪. ୫୨ ମିଟର ଯାଏଁ ବଢ଼ାଯାଇ ପାରିବ। ଅନ୍ୟାନ୍ୟ ହେଭି ଡିୟୁଟି ଟ୍ରକ୍ଗୁଡ଼ିକର ଉଚ୍ଚତା ବୃଦ୍ଧି ୪ ମିଟର ମଧ୍ୟରେ ସୀମିତ ରଖାଯାଇଛି। ପୂର୍ବରୁ ଏହା ୩. ୮ ମିଟର ମଧ୍ୟରେ ସୀମିତ ଥିଲା।
ଏହାଛଡ଼ା ପଶୁସମ୍ପଦ ଏବଂ ନିର୍ମାଣ ସାମଗ୍ରୀ, ମୋଟରଗାଡ଼ି ପରିବହନ ନିମନ୍ତେ ବ୍ୟବହୃତ ଟ୍ରକ୍, ଟ୍ରାକ୍ଟର୍ ଟ୍ରଲର୍ର କଣ୍ଟେନର୍ ଉଚ୍ଚତା ୪. ୭୫ ମିଟର ଯାଏଁ ବଢ଼ାଇବାକୁ ଅନୁମତି ମିଳିବ।