ଧର୍ମ ଆଧାରରେ ସଂରକ୍ଷଣ ସମ୍ବିଧାନ ବିରୋଧୀ : ଅମିତ ଶାହା
ବେଙ୍ଗାଲୁରୁ : ଦେଶରେ ମୁସଲମାନ ସଂରକ୍ଷଣକୁ ନେଇ ବିତର୍କ ଚାଲିଛି । କର୍ଣ୍ଣାଟକ ବିଧାନସଭା ନିର୍ବାଚନ ପୂର୍ବରୁ ବିଜେପି ମୁସଲିମ ସଂରକ୍ଷଣକୁ ଉଚ୍ଛେଦ କରିଛି, ଯାହା ରାଜ୍ୟରେ ଏକ ବଡ଼ ପ୍ରସଙ୍ଗ ପାଲଟିଛି । ଏବେ ଗୃହମନ୍ତ୍ରୀ ଅମିତ ଶାହା ରାଜ୍ୟ ସରକାରଙ୍କ ନିଷ୍ପତ୍ତିକୁ ସମର୍ଥନ କରି କହିଛନ୍ତି ଯେ ଦେଶରେ ଧର୍ମ ଆଧାରରେ ସଂରକ୍ଷଣ ହୋଇପାରିବ ନାହିଁ। ସମ୍ବିଧାନରେ ସେଭଳି କୌଣସି ବ୍ୟବସ୍ଥା ନାହିଁ ।
Sambad is now on WhatsApp
Join and get latest news updates delivered to you via WhatsApp
କ’ଣ କହିଲେ ଅମିତ ଶାହା ?
କେନ୍ଦ୍ର ଗୃହମନ୍ତ୍ରୀ ଅମିତ ଶାହା ସୋମବାର କହିଛନ୍ତି ଯେ ସମ୍ବିଧାନରେ ଧର୍ମ ଆଧାରରେ ସଂରକ୍ଷଣର କୌଣସି ବ୍ୟବସ୍ଥା ନାହିଁ। କର୍ଣ୍ଣାଟକରେ ମୁସଲମାନଙ୍କ ପାଇଁ ୪ ପ୍ରତିଶତ ସଂରକ୍ଷଣ ଅସାମ୍ବିଧାନିକ ଏବଂ ତେଣୁ କର୍ଣ୍ଣାଟକରେ ଭାରତୀୟ ଜନତା ପାର୍ଟି ସରକାର ଏହାକୁ ହଟାଇ ଦେଇଛନ୍ତି । ବିଳମ୍ବରେ ଏହି ପଦକ୍ଷେପ ନିଆଯାଇଥିଲେ ବି ଏହା ସମ୍ବିଧାନ ଅନୁଯାୟୀ ବୋଲି ସେ କହିଛନ୍ତି ।
ଏହି ପ୍ରସଙ୍ଗରେ କଂଗ୍ରେସକୁ ଟାର୍ଗେଟ କରି ଶାହା କହିଛନ୍ତି ଯେ ଦଳ ଭୋଟ୍ ବ୍ୟାଙ୍କକୁ ସନ୍ତୁଷ୍ଟ କରିବା ଏବଂ ମଜବୁତ କରିବା ପାଇଁ କୋଟା ଆଣିଛି। କର୍ଣ୍ଣାଟକରେ ୬ ପ୍ରତିଶତ ମୁସଲମାନ ସଂରକ୍ଷଣ କେଉଁଠି ଦେବ କଂଗ୍ରେସ ? ଆମ ସମ୍ବିଧାନରେ ଧର୍ମ ଆଧାରରେ ସଂରକ୍ଷଣର କୌଣସି ବ୍ୟବସ୍ଥା ନାହିଁ। ସଂରକ୍ଷଣ ଭିତରେ ସଂରକ୍ଷଣ ଅତ୍ୟନ୍ତ ଚିନ୍ତାକରି କରାଯାଇଛି… କର୍ଣ୍ଣାଟକ ନିର୍ବାଚନ ପାଇଁ ପ୍ରଚାର ଶେଷ ହେବା ପୂର୍ବରୁ ସିଦ୍ଧରମୈୟା ସ୍ପଷ୍ଟ କରନ୍ତୁ ଯେ ଯଦି କଂଗ୍ରେସ ମୁସଲମାନଙ୍କ ପାଇଁ ସଂରକ୍ଷଣ ୪ ପ୍ରତିଶତରୁ ୬ ପ୍ରତିଶତକୁ ବୃଦ୍ଧି କରେ, ତେବେ ସେମାନେ କାହାର କୋଟା କାଟିବେ। “