ହଟ୍ଟଗୋଳ ଭିତରେ ଗୋଗଇଙ୍କ ଶପଥ ଗ୍ରହଣ
ନୂଆଦିଲ୍ଲୀ: ଭାରତର ପୂର୍ବ ପ୍ରଧାନ ବିଚାରପତି ରଂଜନ ଗୋଗଇ ଆଜି ରାଜ୍ୟସଭାର ସଦସ୍ୟ ଭାବେ ଶପଥ ଗ୍ରହଣ କରିଛନ୍ତି। ଗୋଗଇ ଶପଥ ନେବା ଆରମ୍ଭ କରିବା ମାତ୍ରେ ବିରୋଧୀ ଦଳମାନେ ଜୋର୍ଦାର ହଙ୍ଗାମା କରିଥିଲେ ଏବଂ ‘ଲଜ୍ଜା..ଲଜ୍ଜା’ ସ୍ଲୋଗାନ ଦେଇଥିଲେ। ଗୋଗଇଙ୍କ ଶପଥକୁ ବିରୋଧ କରି କଂଗ୍ରେସ କକ୍ଷତ୍ୟାଗ କରିଥିଲା। ଆଜି ଗୋଗଇ ନିର୍ଦ୍ଧାରିତ ସ୍ଥାନରେ ଶପଥ ନେବାପାଇଁ ପହଞ୍ଚିବା ମାତ୍ରେ ବିରୋଧୀ ଦଳମାନେ ପ୍ରବଳ ହଟ୍ଟଗୋଳ ଆରମ୍ଭ କରିଦେଇଥିଲେ। ବିରୋଧୀ ଦଳ ସାଂସଦମାନଙ୍କ ଏଭଳି ଆଚରଣରେ ରାଜ୍ୟସଭା ଅଧ୍ୟକ୍ଷ ଭେଙ୍କୟା ନାଇଡ଼ୁ ଅସନ୍ତୋଷ ବ୍ୟକ୍ତ କରିଥିଲେ। ୩ ଅକ୍ଟୋବର ୨୦୧୮ରୁ ୧୭ ନଭେମ୍ବର ୨୦୧୯ ପର୍ଯ୍ୟନ୍ତ ଦେଶର ପ୍ରଧାନ ବିଚାରପତି ଥିବା ଗୋଗଇଙ୍କୁ ରାଷ୍ଟ୍ରପତି ରାମନାଥ କୋବିନ୍ଦ ରାଜ୍ୟସଭା ସଦସ୍ୟ ଭାବେ ମନୋନୀତ କରିଥିଲେ। ସୂଚନାଯୋଗ୍ୟ ଏହା ପୂର୍ବରୁ ପ୍ରଧାନ ବିଚାରପତି ପଦରୁ ଅବସର ନେଇଥିବା ମହମ୍ମଦ ହିଦାୟତୁଲ୍ଲା ଏବଂ ରଂଗନାଥ ମିଶ୍ର ମଧ୍ୟ ରାଜ୍ୟସଭା ପାଇଁ ମନୋନୀତ ହୋଇଥିଲେ। ରାଜ୍ୟସଭାରେ ଆଜି ବିରୋଧୀ ଦଳଙ୍କ ହଟ୍ଟଗୋଳକୁ ନେଇ ଗୋଗଇ କହିଛନ୍ତି ଯେ ସେମାନେ ମତେ ଖୁବ୍ଶୀଘ୍ର ସ୍ବାଗତ କରିବେ। ଆଇନମନ୍ତ୍ରୀ ରବି ଶଙ୍କର ପ୍ରସାଦ କହିଛନ୍ତି, ପୂର୍ବ ପ୍ରଧାନ ବିଚାରପତିଙ୍କ ସମେତ ବିଭିନ୍ନ କ୍ଷେତ୍ରରେ ପ୍ରତିଷ୍ଠିତ ବ୍ୟକ୍ତିଙ୍କୁ ରାଜ୍ୟସଭା ସର୍ବଦା ସ୍ବାଗତ କରିଆସିଛି। ଜଷ୍ଟିସ୍ ଗୋଗଇଙ୍କ ଶପଥ ଗ୍ରହଣକୁ କଂଗ୍ରେସ ଯେଭଳି ବିରୋଧ କରିଛି ତାହା ନିନ୍ଦନୀୟ ବୋଲି ସେ କହିଛନ୍ତି।