ମୋତେ ଗିରଫ କରାଯିବ ନାହିଁ ବୋଲି ଗ୍ୟାରେଣ୍ଟି ଦେଲେ ମୁଁ ୟୁପି ପୁଲିସ ନିକଟରେ ହାଜର ହେବି: ଟ୍ବିଟର ଇଣ୍ଡିଆ ଏମଡି ମନିଷ ମାହେଶ୍ୱରୀ
ନୂଆଦିଲ୍ଲୀ: ମୋତେ ଗିରଫ କରାଯିବ ନାହିଁ ବୋଲି ଗ୍ୟାରେଣ୍ଟି ଦେଲେ ମୁଁ ଉତ୍ତରପ୍ରଦେଶ ପୁଲିସ ନିକଟରେ ହାଜର ହେବି | ଆଜି ଟ୍ୱିଟର ଇଣ୍ଡିଆର ଏମଡି ମନୀଷ ମାହେଶ୍ୱରୀ କର୍ଣ୍ଣାଟକ ହାଇକୋର୍ଟଙ୍କୁ ଏଭଳି କହିଛନ୍ତି | ୟୁପି ପୁଲିସ ତାଙ୍କୁ ଦ୍ଵିତୀୟ ନୋଟିସ ପଠାଇବା ବିରୋଧରେ ମନୀଷ ମାହେଶ୍ୱରୀଙ୍କ ଦ୍ୱାରା ଦାଖଲ ହୋଇଥିବା ଏକ ପିଟିସନର ଶୁଣାଣି ସମୟରେ ନିଜର ପକ୍ଷ ରଖି ଗିରଫ ନକରାଗଲେ ପୁଲିସ ନିକଟରେ ହଜାର ହେବି ବୋଲି ଟ୍ୱିଟର ଇଣ୍ଡିଆର ଏମଡି କହିଛନ୍ତି |
Sambad is now on WhatsApp
Join and get latest news updates delivered to you via WhatsApp
ଗାଜିଆବାଦ ମୁସଲିମ୍ ବୃଦ୍ଧଙ୍କ ଭାଇରାଲ ଭିଡିଓ ଘଟଣାରେ ଟ୍ୱିଟର ଇଣ୍ଡିଆକୁ ପୁଲିସ ପକ୍ଷରୁ ପୂର୍ବରୁ ଯେଉଁ ନୋଟିସ ପଠାଯାଇଥିଲା ତାହାର ଜବାବ ରଖି ଟ୍ୱିଟର ତରଫରୁ କୁହାଯାଇଥିଲା ଯେ, ପଚରା-ଉଚରା ପାଇଁ ମନିଷ ମାହେଶ୍ୱରୀ ପ୍ରସ୍ତୁତ ଅଛନ୍ତି । ଭିଡିଓ କନଫରେନ୍ସ ଜରିଆରେ ସେ ଉପଲବ୍ଧ ଅଛନ୍ତି । ଯେଉଁଥିରେ ପୁଲିସ କ୍ଷୁବ୍ଧ ହେବା ସହ ମନିଷ ମାହେଶ୍ୱରୀଙ୍କୁ ଆଉ ଏକ ନୋଟିସ୍ ପଠାଇଥିଲା । ଏହାକୁ ବିରୋଧ କରି କର୍ଣ୍ଣାଟକ ହାଇକୋର୍ଟରେ ପିଟିସନ ଦାଖଲ କରିଥିଲେ ମନୀଷ ମାହେଶ୍ୱରୀ |
ଆଜି ଏହାର ଶୁଣାଣି ସମୟରେ, ଯଦି ସେମାନେ ମୋ ଉପରେ ହାତ ରଖିବେ ନାହିଁ, ତେବେ ମୁଁ ବ୍ୟକ୍ତିଗତ ଭାବେ ପୁଲିସ ନିକଟରେ ହାଜର ହେବାକୁ ଇଚ୍ଛୁକ | ଗିରଫ ନକରିବାର ଗ୍ୟାରେଣ୍ଟି ଦେଲେ ମୁଁ ନିଜେ ଯାଇ ପୁଲିସକୁ ଦେଖା କରିବି ବୋଲି କୋର୍ଟଙ୍କୁ କହିଛନ୍ତି ମନୀଷ ମାହେଶ୍ୱରୀଙ୍କ ପରାମର୍ଶଦାତା ସିଭି ନାଗେଶ |
ଉଲ୍ଲେଖଯୋଗ୍ୟ, ଉତ୍ତର ପ୍ରଦେଶର ଗାଜିଆବାଦରେ ଜଣେ ବୟସ୍କ ମୁସଲମାନ ବ୍ୟକ୍ତିଙ୍କ ଦାଢ଼ି କାଟିଦେବା, ତାଙ୍କୁ ପିଟିବା ଏବଂ ବନ୍ଦେ ମାତରମ ଓ ଜୟ ଶ୍ରୀ ରାମ କହିବାକୁ ବାଧ୍ୟ କରାଯାଉଥିବାର ଏକ ଭିଡିଓ ପ୍ରସାରିତ ହୋଇଥିଲା | ଗାଜିଆବାଦ ପୁଲିସ ପକ୍ଷରୁ ସ୍ପଷ୍ଟୀକରଣ ଦିଆଯିବା ସତ୍ତ୍ବେ ମଧ୍ୟ ସାମାଜିକ ଗଣମାଧ୍ୟମରୁ ଏହାକୁ ହଟାଯାଇ ନଥିଲା। ତେଣୁ ଲୋନି ଥାନାରେ ଧାରା ୧୫୩ (ଦଙ୍ଗା ସୃଷ୍ଟି ପାଇଁ ଉତ୍ତେଜନା ସୃଷ୍ଟି), ଧାରା ୧୫୩ କ (ବିଭିନ୍ନ ଗୋଷ୍ଠୀ ମଧ୍ୟରେ ଶତ୍ରୁତାକୁ ଉସକାଇବା), ଧାରା ୨୯୫ କ (ଧାର୍ମିକ ଭାବନାକୁ ଉତ୍ତେଜିତ କରିବା), ଧାରା ୫୦୫ (ସାଧାରଣରେ ଅନିଷ୍ଟ ସୃଷ୍ଟିକାରୀ ବିବୃତି) ଏବଂ ଧାରା ୧୨୦ (ଅପରାଧିକ ଷଡ଼ଯନ୍ତ୍ର)ରେ ମାମଲା ରୁଜୁ କରାଯାଇଥିଲା | ଏନେଇ ମାଇକ୍ରୋବ୍ଲଗିଂ ସାଇଟ୍ ଟ୍ବିଟର ଏବଂ କେତେଜଣ ସାମ୍ବାଦିକଙ୍କ ବିରୋଧରେ ମଧ୍ୟ ଗାଜିଆବାଦ ପୁଲିସ ଏତଲା ରୁଜୁ କରିଥିଲା |