ଆଫଗାନିସ୍ତାନରେ ତାଲିବାନର ଜୟଯାତ୍ରା ଜାରି, ୧୮ଟି ରାଜ୍ୟର ରାଜଧାନୀକୁ ଦଖଲ କରିସାରିଲାଣି
ଦେଶବାସୀଙ୍କୁ ସମ୍ବୋଧନ କରିବେ ଆଫଗାନିସ୍ତାନ ରାଷ୍ଟ୍ରପତି ଅସରଫ ଘନି
କାବୁଲ : ଆଫଗାନିସ୍ତାନ ଉପରେ ନିଜର ନିୟନ୍ତ୍ରଣକୁ ଆହୁରି ଦୃଢ କରିଛି ତାଲିବାନ । ଏହି କଠୋରପନ୍ଥୀ ସଂଗଠନ ଆଜି ଆଫଗାନିସ୍ତାନର ଆଉ କେତେକ ରାଜ୍ୟର ରାଜଧାନୀକୁ କବଜା କରିଛି । ସେଗୁଡ଼ିକ ମଧ୍ୟରେ ରହିଛି କଲତ, ଟେରେନକୋଟ୍, ପୁଲ-ଏ ଆଲମ, କାଲା-ଏ ନାଉ ଓ ଲସ୍କରଗାହ । ହେରାତ ଓ କାନ୍ଦାହାର ସହରକୁ ଦଖଲ କରିବାର କିଛି ଘଣ୍ଟା ମଧ୍ୟରେ ହିଁ ଏସବୁ ସହର ତାଲିବାନ ନିୟନ୍ତ୍ରଣକୁ ଚାଲିଯାଇଛି । ଏଗୁଡ଼ିକୁ ମିଶାଇ ତାଲିବାନ ଏବେ ମୋଟ ୧୮ଟି ରାଜ୍ୟର ରାଜଧାନୀକୁ ଦଖଲ କରିସାରିଲାଣି । ଗତକାଲି ତାଲିବାନ ଗଜନି ସହରକୁ ଦଖଲ କରିଥିଲା । କାବୁଲଠାରୁ ଏହି ସହର ମାତ୍ର ୧୫୦ କିଲୋମିଟର ଦୂରରେ ଅବସ୍ଥିତ ।
Sambad is now on WhatsApp
Join and get latest news updates delivered to you via WhatsApp
ସରକାରର ଭବିଷ୍ୟତ ସମ୍ପର୍କରେ ଆଫଗାନିସ୍ତାନର ରାଷ୍ଟ୍ରପତି ଅସରଫ ଘନି ଆଜି କିମ୍ବା ଶନିବାରଦିନ ଦେଶବାସୀଙ୍କୁ ସମ୍ବୋଧନ କରିବାର ସମ୍ଭାବନା ରହିଛି ।
ଅନ୍ୟପକ୍ଷରେ ବ୍ରିଟେନ ଆଜି କହିଛି ଯେ ଆଫଗାନିସ୍ତାନ ଏକ ଗୃହଯୁଦ୍ଧ ଆଡ଼କୁ ମୁହାଁଇଛି । ବ୍ରିଟେନର ପ୍ରତିରକ୍ଷାମନ୍ତ୍ରୀ ବେନ ଓ୍ବାଲେସ କହିଛନ୍ତି ଯେ ସମଗ୍ର ଆଫଗାନସ୍ତାନକୁ ତାଲିବାନ ଅଧିକାର କରିନେବା ପରେ ବି ଗୃହଯୁଦ୍ଧ ଲାଗି ରହିବ । କାରଣ ଆଫଗାନିସ୍ତାନରେ ବିଭିନ୍ନ ସଶସ୍ତ୍ର ଗୋଷ୍ଠୀ ଅଛନ୍ତି । ଏପରିକି ତାଲିବାନରେ ବି ଅନେକ ଗୋଷ୍ଠୀ ଅଛନ୍ତି । ସେମାନଙ୍କ ମଧ୍ୟରେ ଥିବା ମତଭେଦ ଆଗକୁ ଗୃହଯୁଦ୍ଧରେ ପରିଣତ ହେବ ।