ଉତ୍ତରପ୍ରଦେଶରେ ନାଗରିକତା ଆଇନ ଲାଗୁ ପାଇଁ ପ୍ରକ୍ରିୟା ଆରମ୍ଭ, ପ୍ରଥମ ପର୍ଯ୍ୟାୟରେ ୪୦ ହଜାର ଶରଣାର୍ଥୀ ଚିହ୍ନଟ
ଲକ୍ଷ୍ନୌ : ଦେଶର ପ୍ରଥମ ରାଜ୍ୟଭାବେ ଉତ୍ତରପ୍ରଦେଶ ନାଗରିକତା (ସଂଶୋଧନ) ଆଇନ ଲାଗୁ କରିବା ପାଇଁ ପ୍ରକ୍ରିୟା ଆରମ୍ଭ କରିଛି । ପ୍ରଥମ ପର୍ଯ୍ୟାୟରେ ରାଜ୍ୟରେ ବସବାସ କରୁଥିବା ପ୍ରାୟ ୪୦ ହଜାର ଅଣ-ମୁସଲିମ ଶରଣାର୍ଥୀଙ୍କୁ ଚିହ୍ନଟ କରାଯାଇଛି । ଏମାନଙ୍କ ମଧ୍ୟରୁ ଅଧିକାଂଶ ହେଉଛନ୍ତି ହିନ୍ଦୁ ସଂପ୍ରଦାୟର ଲୋକ ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟରେ ଚିହ୍ନଟ ହୋଇଥିବା ମୋଟ ୪୦ ହଜାର ଶରଣାର୍ଥୀଙ୍କ ମଧ୍ୟରୁ ପ୍ରାୟ ୩୦ରୁ ୩୫ ହଜାର ଶରଣାର୍ଥୀ ପିଲିଭିଟ ଜିଲ୍ଲାରେ ରହୁଛନ୍ତି । ଏମାନଙ୍କ ମଧ୍ୟରୁ ଅଧିକାଂଶ ପାକିସ୍ତାନ ଓ ବାଂଲାଦେଶରୁ ଆସିଛନ୍ତି । ତେବେ ଆଫଗାନିସ୍ତାନରୁ ଅଳ୍ପ ସଂଖ୍ୟକ ଶରଣାର୍ଥୀ ଅଛନ୍ତି । ଏମାନେ କେଉଁ ପରିସ୍ଥିତିରେ ଭାରତକୁ ଆସିଲେ ସେ ସଂପର୍କରେ ସେମାନଙ୍କଠାରୁ ତଥ୍ୟ ସଂଗ୍ରହ କରାଯାଉଛି । ତେବେ ଏହା ହେଉଛି ପ୍ରାରମ୍ଭିକ ତାଲିକା । ରାଜ୍ୟରେ ଆଗକୁ ମଧ୍ୟ ଶରଣାର୍ଥୀ ଚିହ୍ନଟ ପ୍ରକ୍ରିୟା ଜାରି ରହିବ । ଏଥିଲାଗି ସବୁ ଜିଲ୍ଲାର ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦିଆଯାଇଛି । ଏହି ତାଲିକା ଚୂଡ଼ାନ୍ତ ହେବା ପରେ ତାହାକୁ କେନ୍ଦ୍ର ଗୃହ ମନ୍ତ୍ରାଳୟକୁ ପ୍ରଦାନ କରାଯିବ ବୋଲି ଉତ୍ତରପ୍ରଦେଶର ଶକ୍ତି ମନ୍ତ୍ରୀ ଶ୍ରୀକାନ୍ତ ଶର୍ମା କହିଛନ୍ତି ।
ସୂଚନାଯୋଗ୍ୟ ଯେ ଗତ ଡିସେମ୍ବର ମାସରେ ଆଇନରେ ପରିଣତ ହୋଇଥିବା ନାଗରିକତା (ସଂଶୋଧନ) ଆଇନରେ ଥିବା ବ୍ୟବସ୍ଥା ଅନୁସାରେ ପାକିସ୍ତାନ, ଆଫଗାନିସ୍ତାନ ଓ ବାଂଲାଦେଶରେ ଧର୍ମୀୟ ହିଂସାର ସମ୍ମୁଖୀନ ହେଉଥିବା ହିନ୍ଦୁ, ବୌଦ୍ଧ, ଶିଖ, ଖ୍ରୀଷ୍ଟିଆନ ଓ ପାର୍ସୀ ଆଦି ସଂପ୍ରଦାୟର ଶରଣାର୍ଥୀମାନଙ୍କୁ ଭାରତରେ ନାଗରିକତା ଦିଆଯିବ । ତେବେ ମୁସଲମାନ ମାନଙ୍କୁ ଏହି ବିଲ୍ ମାଧ୍ୟମରେ ନାଗରିକତା ଦିଆଯିବ ନାହିଁ ।