ଭୁବନେଶ୍ବରରେ ଚିହ୍ନଟ କରୋନା ଆକ୍ରାନ୍ତଙ୍କ ମଧ୍ୟରୁ ଜଣେ ବିରିୟାନି ଡେଲିଭରି ବୟ !
ଭୁବନେଶ୍ବର: କିଛି ଦିନ ବ୍ୟବଧାନ ପରେ ରାଜଧାନୀ ଭୁବନେଶ୍ବରରେ ୩ କରୋନା ଆକ୍ରାନ୍ତ ଚିହ୍ନଟ ହେବା ପରେ ପୁଣି ଆତଙ୍କ ଖେଳି ଯାଇଛି। ସବୁଠୁ ବଡ଼ କଥା ହେଲା ମଞ୍ଚେଶ୍ବରରେ ଚିହ୍ନଟ ହୋଇଥିବା କରୋନା ଆକ୍ରାନ୍ତ ଜଣେ ବିରିଆନି ଡେଲିଭରି ବୟ ବୋଲି ଜଣାପଡ଼ିଛି। କରୋନା ପଜିଟିଭ୍ ବାହାରିବା ପରେ ତାଙ୍କୁ ତୁରନ୍ତ ଆଇସୋଲେସନ୍ରେ ଭର୍ତ୍ତି କରାଯାଇଛି। ସ୍ବାସ୍ଥ୍ୟ ବିଭାଗର ଟିମ୍ ସ୍ଥାନୀୟ ମଞ୍ଚେଶ୍ବର ପୁଲିସ ଡେଲିଭରି ବୟଙ୍କ ଘରେ ପହଞ୍ଚିଥିଲା। ଆକ୍ରାନ୍ତଙ୍କ ପରିବାରର ଅନ୍ୟ ସଦସ୍ୟମାନଙ୍କର ସ୍ବାବ୍ ସଂଗ୍ରହ କରାଯାଇଥିବା ଜଣାପଡ଼ିଛି। ବିରିୟାନି ଡେଲିଭରି ବୟ କରୋନା ଆକ୍ରାନ୍ତ ଜଣାପଡ଼ିବା ପରେ ଚିନ୍ତା ଆହୁରି ବଢ଼ି ଯାଇଛି। ସେ କେଉଁଠି କେଉଁଠି ବିରିୟାନି ଡେଲିଭରି କରିଛନ୍ତି, କେଉଁଠି କେଉଁଠିକି ଯାଇଛନ୍ତି ସେ ନେଇ କଣ୍ଟାକ୍ଟ ଟ୍ରେସିଂ ଆରମ୍ଭ ହୋଇଯାଇଛି।
Sambad is now on WhatsApp
Join and get latest news updates delivered to you via WhatsApp
ବିଶ୍ବସ୍ତ ସୂତ୍ରରୁ ମିଳିଥିବା ସୂଚନା ଅନୁସାରେ, ସମ୍ପୃକ୍ତ ବିରିୟାନି ଡେଲିଭରି ବୟ ପଟିଆରେ ଥିବା ଏକ ବିରିୟାନି ବିକ୍ରି କରୁଥିବା ସଂସ୍ଥାରେ କାମ କରନ୍ତି। ପରିବାର ସହ ମଞ୍ଚେଶ୍ବର ଚକେଇସିଆଣୀରେ ଭଡ଼ାରେ ରହୁଥିଲେ। ସେ ବିଶେଷକରି ସୂର୍ଯ୍ୟନଗର ଅଞ୍ଚଳରେ ବିରିୟାନି ଡେଲିଭରି କରନ୍ତି। ଗତ କିଛିଦିନ ତଳେ ତାଙ୍କ ଶରୀରରେ ଥଣ୍ଡା, କାଶ ଭଳି କିଛି ଲକ୍ଷଣ ଦେଖା ଦେଇଥିଲା। ଏ ନେଇ ସେ ଟୋଲ୍ ଫ୍ରି ନମ୍ବର ୧୦୪କୁ ଫୋନ୍ କରି ଜଣାଇଥିଲେ। ଏହା ପରେ ସମ୍ପୃକ୍ତ ଡେଲିଭରି ବୟଙ୍କର ସ୍ବାବ୍ ଟେଷ୍ଟ କରା ଯାଇଥିଲା। ଆଜି ପଜିଟିଭ୍ ଆସିବା ପରେ ତାଙ୍କୁ ତୁରନ୍ତ ଆଇସୋଲେସନରେ ଭର୍ତ୍ତି କରାଯାଇଛି। ସୂର୍ଯ୍ୟନଗର ଅଞ୍ଚଳରେ ବିରିୟାନି ଡେଲିଭରି କରୁଥିବାରୁ ସମ୍ପୃକ୍ତ ବ୍ୟକ୍ତି ସେଠାରୁ କରୋନା ସଂକ୍ରମିତ ହୋଇଥାଇ ପାରନ୍ତି ବୋଲି ଅନୁମାନ କରାଯାଉଛି। କିନ୍ତୁ ଏ ନେଇ ସ୍ବାସ୍ଥ୍ୟ ବିଭାଗ ପକ୍ଷରୁ କୌଣସି ସୂଚନା ଦିଆଯାଇ ନାହିଁ।