ବିବାଦୀୟ ଅଡିଓ ମାମଲାରେ ଗିରଫ ଦୁଇ ଜଣଙ୍କୁ ପଚରାଉଚରା ପରେ କମିସନରେଟ୍ ପୁଲିସର ସୂଚନା: ତିଆରି କରି ଭାଇରାଲ କରାଯାଇଥିଲା ଅଡିଓ
ଭୁବନେଶ୍ବର: ଏକ ଘରୋଇ ଟିଭି ଚ୍ୟାନେଲରେ ରାଜ୍ୟ ସରକାରଙ୍କ କୋଭିଡ୍ ପରିଚାଳନାକୁ ନେଇ ବିବାଦୀୟ ଭାଇରାଲ ଅଡିଓ ପ୍ରସାରଣ ପ୍ରସଙ୍ଗରେ କମିସନରେଟ ପୁଲିସ ଦୁଇଜଣଙ୍କୁ ଗିରଫ କରିଛି । ଏମାନଙ୍କ ମଧ୍ୟରେ କେବୁଲ ନେଟୱର୍କ ସଂସ୍ଥା ଓରଟେଲ୍ କମ୍ୟୁନିକେସନର ଜଣେ କର୍ମଚାରୀ ଅଛନ୍ତି । ଗିରଫ ଦୁଇଜଣ ହେଲେ ବିଶ୍ୱଜିତ ମହାନ୍ତି ଓ ଲକ୍ଷ୍ମୀକାନ୍ତ ବେହେରା । ୨ ଜଣଙ୍କୁ ପଚରାଉଚରା ପରେ ପୁଲିସ କହିଛି, ଭାଇରାଲ ଅଡିଓ କ୍ଲିପକୁ ତିଆରି କରାଯାଇଥିଲା । ଆଉ ତିଆରି କରିବା ପରେ ଏହାକୁ ଭାଇରାଲ କରାଯାଇଥିଲା । ଅଡିଓ ପ୍ରସ୍ତୁତ କରି ଓ ଏହାପରେ ତାକୁ ଏଡିଟ କରାଯାଇ ଉଦ୍ଦେଶ୍ୟମୂଳକ ଭାବେ ଭାଇରାଲ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଗିରଫ ପରେ ଦୁଇ ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇଛି । ଦୁଇଜଣ ବ୍ୟକ୍ତି ଭାଇରାଲ ଅଡିଓ କ୍ଲିପରେ କଥା ହୋଇଥିଲେ ବୋଲି କହିଛି ପୁଲିସ । ଏହି ଭାଇରାଲ ଅଡିଓ ଟେପ ପ୍ରସାରଣ ପରେ କରୋନା ନେଇ ମିଥ୍ୟା ଖବର ପ୍ରସାରଣ କରିବା ଅଭିଯୋଗରେ ସଂପୃକ୍ତ ଘରୋଇ ଚ୍ୟାନେଲ ବିରୋଧରେ ଶୁକ୍ରବାରଦିନ ଥାନାରେ ଅଭିଯୋଗ କରିଥିଲା ବିଏମସି । ଏଥି ସହ ସେହି ଟିଭି ଚାନେଲକୁ କାରଣ ଦର୍ଶାଅ ନୋଟିସ ମଧ୍ୟ ଦିଆଯାଇଥିଲା । ଏହି ଅଡିଓ ଟେପରେ କୁହାଯାଇଥିଲା, ଜଣେ କରୋନା ରୋଗୀଙ୍କ ପାଇଁ କେନ୍ଦ୍ର ସରକାର ଦେଢ ଲକ୍ଷରୁ ଅଢେଇ ଲକ୍ଷ ଟଙ୍କା ଦେଉଛନ୍ତି । କୋଭିଡ୍ ହସ୍ପିଟାଲଗୁଡିକୁ ଅତି କମରେ ଶହେ ରୋଗୀଙ୍କୁ ଆଡମିସନ୍ କରିବାକୁ ଟାର୍ଗେଟ ଦିଆଯାଇଛି ।
ସେପଟେ ଓରଟେଲର ବରିଷ୍ଠ ଅଧିକାରୀ କହିଛନ୍ତି ଯେ, ଗିରଫ ବିଷୟରେ ସେ କିଛି ଖବର ପାଇନାହନ୍ତି । ତେବେ ଓରଟେଲର ଜଣେ କର୍ମଚାରୀ କୋଭିଡରେ ଆକ୍ରାନ୍ତ ହୋଇଥିଲେ । ଗିରଫଦାରୀ କିମ୍ବା ଅଟକ ନେଇ ତାଙ୍କ ପାଖରେ କୌଣସି ଖବର ନାହିଁ ବୋଲି ଅଧିକାରୀ ଜଣକ କହିଛନ୍ତି ।