ବାଃ ରେଳବାଇ ! ମା‘ ଓ ନବଜାତଙ୍କ ଶୋଇବା ପାଇଁ ଟ୍ରେନରେ ନୂଆ ବ୍ୟବସ୍ଥା
ନୂଆଦିଲ୍ଲୀ: ଭାରତରେ ପ୍ରତିଦିନ କୋଟି କୋଟି ଯାତ୍ରୀ ଟ୍ରେନରେ ଯାତ୍ରା କରନ୍ତି। ଏହି କୋଟି କୋଟି ନାଗରିକଙ୍କ ମଧ୍ୟରେ ବହୁ ସଂଖ୍ୟକ ମା ଓ ନବଜାତ ଶିଶୁ ମଧ୍ୟ ଟ୍ରେନରେ ଯାତ୍ରା କରନ୍ତି | ଛୋଟ ପିଲାମାନଙ୍କୁ ଟ୍ରେନରେ ବୋହିକି ନେବାରେ ମା’ ମାନେ ବହୁତ ଅସୁବିଧାର ସମ୍ମୁଖୀନ ହୁଅନ୍ତି | ବିଶେଷକରି ସେମାନଙ୍କୁ ରାତିରେ ଶୋଇବାରେ ବହୁ ଅସୁବିଧାର ସମ୍ମୁଖୀନ ହେବାକୁ ପଡେ | କାରଣ ଗୋଟିଏ ବର୍ଥରେ ଉଭୟ ମା ଓ ଶିଶୁ ଶୋଇବା କଷ୍ଟକର ହୋଇଥାଏ |
Sambad is now on WhatsApp
Join and get latest news updates delivered to you via WhatsApp
ଏଭଳି କିଛି ଅସୁବିଧାକୁ ଅନୁଭବ କରି ବର୍ତ୍ତମାନ ରେଳବାଇ ଏକ ନିଆରା ପ୍ରୟାସ କରିଛି, ଯେଉଁଥିରେ ମା’ ଏବଂ ପିଲାମାନଙ୍କ ପାଇଁ ଏକ ସ୍ୱତନ୍ତ୍ର ବର୍ଥ ପ୍ରସ୍ତୁତ କରାଯାଇଛି | ଏହି ବ୍ୟବସ୍ଥା ବର୍ତ୍ତମାନ ପାଇଁ ପରୀକ୍ଷାମୂଳକ ଭାବରେ ବ୍ୟବହାର କରାଯାଇଥିବା ବେଳେ ଯଦି ଏହା ସଫଳ ହୁଏ ତେବେ ଆଗାମୀ ଦିନରେ ଏହି ବ୍ୟବସ୍ଥା ସବୁ ଟ୍ରେନରେ ରହିବ | ମିଳିଥିବା ସୂଚନା ମୁତାବକ ଭାରତୀୟ ରେଳବାଇ ଲକ୍ଷ୍ନୌରୁ ଦିଲ୍ଲୀ ଯାଉଥିବା ଲକ୍ଷ୍ନୌ ମେଲ(୧୨୨୩୦)ର କୋଚ୍ ନମ୍ୱର ୧୯୪୧୨୯ରେ ବର୍ଥ ନମ୍ବର ୪,୧୨ ଏବଂ ୬୦ରେ ସ୍ୱତନ୍ତ୍ର ବ୍ୟବସ୍ଥା କରିଛି |
ଅର୍ଥାତ ଏହି ବର୍ଥରେ ମା-ଶିଶୁଙ୍କ ପାଇଁ ଅତିରିକ୍ତ ସିଟ ବ୍ୟବସ୍ଥା କରାଯାଇଛି | ଏହା ଦ୍ୱାରା ମା’ମାନଙ୍କୁ ଶିଶୁମାନଙ୍କ ସହିତ ଆରାମରେ ଶୋଇବାର ସୁବିଧା ଯୋଗାଇ ଦେବ | ଟ୍ରେନରେ ଯାଉଥିବା ମା’ମାନଙ୍କଠାରୁ ପ୍ରାପ୍ତ ମତାମତ ଆଧାରରେ ଭବିଷ୍ୟତରେ ଏହିପରି ବର୍ଥ ବ୍ୟବହାର କରାଯିବ | ଏଭଳି ବର୍ଥର ନାମ ‘ଫିଟ୍ ବେବି ସିଟ୍’ ରଖାଯାଇଛି | ‘ଫିଟ୍ ବେବି ସିଟ୍’ରେ ଫୋଲ୍ଡେବଲ୍ ସିଷ୍ଟମ ରହିଛି ଅର୍ଥାତ ଯେତେବେଳେ ସିଟ୍ ବ୍ୟବହାର ହୋଇନଥାଏ ଏହାକୁ ଫୋଲଡ଼ କରିହେବ | ସେହିପରି ଏହି ବର୍ଥରେ ଯେଭଳି ଶିଶୁଟି ପଡିଯିବନାହିଁ ସେଥିପାଇଁ ବାଡ଼ ମଧ୍ୟ ଦିଆଯାଇଛି | ବର୍ତ୍ତମାନ ରେଳବାଇର ଏହି ନୂତନ ବ୍ୟବସ୍ଥାକୁ ସମସ୍ତେ ପ୍ରଶଂସା କରୁଛନ୍ତି |