ରାହୁଲ ଓ ଗେଲ୍ଙ୍କ ଅର୍ଦ୍ଧଶତକ, ୮ ୱିକେଟରେ ବିଜୟୀ ହେଲା କିଙ୍ଗସ୍ ଇଲେଭେନ ପଂଜାବ
ସାରଜା: ସାରଜା ଇଣ୍ଟରନ୍ୟାସନାଲ କ୍ରିକେଟ ଷ୍ଟାଡିୟମଠାରେ ଚାଲିଥିବା ଚଳିତ ଆଇପିଏଲର ୩୧ ତମ ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରକୁ ୮ ୱିକେଟ ପରାସ୍ତ କରିଛି କିଙ୍ଗସ ଇଲେଭେନ ପଂଜାବ । ଦ୍ବିତୀୟ ପାଳିରେ ବ୍ୟାଟିଂ କରୁଥିବା ପଂଜାବ ୧୭୨ ରନ୍ର ଲକ୍ଷ୍ୟକୁ ପିଛା କରି ୨୦ ଓଭରରେ ୨ଟି ୱିକେଟ ହରାଇ ୧୭୭ ରନ୍ କରି ବିଜୟ ହାସଲ କରିଛି । ପଂଜାବ ପକ୍ଷରୁ ମୟଙ୍କ ଅଗ୍ରୱାଲ ୨୫ ବଲରେ ୪୫ ରନ୍ ଓ ଅଧିନାୟକ କେ.ଏଲ୍ ରାହୁଲ ୪୯ ବଲରେ ୬୧ ରନ୍ କରିଥିଲେ । ସେହିପରି ଚଳିତ ସିଜିନ୍ରେ ପ୍ରଥମ ମ୍ୟାଚ ଖେଳୁଥିବା କ୍ରିସ୍ ଗେଲ୍ ୪୫ ବଲରେ ୫୩ ରନ୍ କରିଥିବା ବେଳେ ଶେଷ ବଲରେ ନିକୋଲାସ୍ ପୁରାନ୍ ଛକା ମାରି ପଂଜାବକୁ ବିଜୟ ଦେଇଥିଲେ । ଅନ୍ୟପଟେ ବାଙ୍ଗାଲୋର ପକ୍ଷରୁ ଦୁର୍ବଳ ବୋଲିଂ ଦେଖିବାକୁ ମିଳିଥିଲା । ୟୁଜବେନ୍ଦ୍ର ଚହଲ ମାତ୍ର ଗୋଟିଏ ୱିକେଟ ନେଇଥିବା ବେଳେ ଅନ୍ୟ ପାଞ୍ଚ ଜଣ ବୋଲର କୌଣସି ବି ୱିକେଟ ନେବାରେ ସକ୍ଷମ ହୋଇ ନଥିଲେ । ଫଳରେ ପଂଜାବ ଏହି ମ୍ୟାଚକୁ ଅତି ସହଜରେ ଜିତି ନେଇଥିଲା । ଏହି ବିଜୟ ସହ ୪ ଅଙ୍କ ସଂଗ୍ରହ କରି ୮ମ ସ୍ଥାନରେ ରହିଛି କିଙ୍ଗସ ଇଲେଭେନ ପଂଜାବ।
Sambad is now on WhatsApp
Join and get latest news updates delivered to you via WhatsApp
ପୂର୍ବରୁ ବାଙ୍ଗାଲୋରର ଅଧିନାୟକ ବିରାଟ କୋହଲି ଟସ ଜିଣି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ । ଦଳର ଦୁଇ ଓପନର ଆରୋନ ଫିଞ୍ଚ ଓ ଦେବଦତ୍ତ ପଡିକଲ୍ଲ ଦଳକୁ ଏକ ଭଲ ଆରମ୍ଭ ଦେଇଥିଲେ ମଧ୍ୟ ଉଭୟ ବଡ଼ ସ୍କୋର କରିପାରି ନଥିଲେ । ଫିଞ୍ଚ ୨୦ ରନ ଓ ପଡିକଲ୍ଲ ୧୮ ରନ କରି ଆଉଟ ହୋଇଥିଲେ । ତେବେ ବିରାଟ କୋହଲି ସତର୍କତାର ସହ ଖେଳି ୩୯ ବଲରେ ୪୮ ରନ କରିଥିଲେ । ମାତ୍ର ଦଳର ଷ୍ଟାର ବ୍ୟାଟ୍ସମ୍ୟାନ ଏବି ଡି’ଭିଲିୟର୍ସ ମାତ୍ର ୨ ରନ କରି ଆଉଟ ହୋଇଥିଲେ । ତେବେ ଶିଭମ ଦୁବେ ଓ କ୍ରିସ ମୋରିସ ଯଥାକ୍ରମେ ୨୩ ଓ ୨୫ ରନର ଯୋଗଦାନ ଦେଇଥିଲେ । ଏହାଫଳରେ ଦଳ ୨୦ ଓଭରରେ ୬ ଓ୍ବିକେଟ ହରାଇ ୧୭୧ ରନ କରିଥିଲା ।