ମେୟରଙ୍କ ମାନବିକତା; ନିଜେ ଉଠାଇଲେ କୁକୁରର ମୃତଦେହ, ସିଏମସି କର୍ମଚାରୀଙ୍କୁ ସଜାଗ କଲେ
କଟକ: କଟକ ମହାନଗର ନିଗମ୍ (ସିଏମ୍ସି)ର ମେୟର ସୁବାସ ସିଂଙ୍କ ମାନବିକତା ଦେଖିବାକୁ ମଳିଛି। ନିଜେ ଉଠାଇଲେ ରାସ୍ତାରେ ମରି ପଡିଥିବା କୁକୁରର ମୃତଦେହ । ଅପେକ୍ଷା କଲେନି ସିଏମସିର ଶବଉଠା ଗାଡିକୁ । ମେୟରଙ୍କ କାର୍ଯ୍ୟକୁ ସ୍ଥାନୀୟ ଲୋକଙ୍କ ମଧ୍ୟରେ ପ୍ରଶଂସା କରାଯାଉଛି।
Sambad is now on WhatsApp
Join and get latest news updates delivered to you via WhatsApp
ଆଜି କଟକ ତଳତେଲେଙ୍ଗା ବଜାର ରାସ୍ତାରେ ଦୁର୍ଘଟଣାର ସାମ୍ନା କରି ଏକ କୁକୁରର ମୃତ୍ୟୁ ହୋଇଥିଲା। ଦୀର୍ଘ ୪ ଘଣ୍ଟା ଧରି ରାସ୍ତା ଉପରେ କୁକୁରର ମୃତଦେହ ପଡିଥିଲେ ମଧ୍ୟ ସିଏମସି ପକ୍ଷରୁ ଉଠାଯାଇ ନ ଥିଲା । ସେହି ରାସ୍ତା ଦେଇ ମେୟର ସୁବାସ ସିଂହ ସିଏମସି କାର୍ଯ୍ୟାଳୟକୁ ଯାଉଥିବା ବେଳେ ତାଙ୍କ ନଜରକୁ ଏହା ଆସିଥିଲା । ସେ ଗାଡି ଅଟକାଇ ନିକଟସ୍ଥ ଦୋକାନରୁ ଏକ ଜରି ଆଣି ସେଥିରେ କୁକୁର ମୃତଦେହ ଭର୍ତ୍ତି କରି ସିଏମସି ଅଫିସ ନେଇଥିଲେ । ସେଠାରେ ଥିବା ଅଫିସରମାନଙ୍କୁ ଏ ସମ୍ପର୍କରେ ଜଣାଇଥିଲେ ।
କଟକ ମହାନଗର ନିଗମ କାର୍ଯ୍ୟାଳୟଠାରୁ ମାତ୍ର ୫୦୦ ମିଟର ଦୂରରେ ଏକ କୁକୁରର ମୃତଦେହ ଦୀର୍ଘ ୪ ଘଂଟାଧରି ପଡିରହିଲା । ହେଲେ କେମିତି କୌଣସି ସିଏମସି କର୍ମଚାରୀଙ୍କ ନଜରକୁ ଆସିଲା ନାହିଁ, ତାହା ମେୟରଙ୍କୁ ଚକିତ କରିଥିଲା । କୁକୁରଟି ପଡ଼ିଥିବା ୱାର୍ଡରେ ୮ରୁ ୧୦ ଜଣ କର୍ମଚାରୀ ନିୟୋଜିତ ଅଛନ୍ତି । ହେଲେ ଯଦି ଏତେ କର୍ମଚାରୀ ଥାଉ ଥାଉ ଦିନ ୧୦ ବେଳେ କାହାରି ନଜରକୁ ଏହା ଆସୁନାହିଁ, ଏଥିପାଇଁ କିଏ ଉତ୍ତରଦାୟୀ ରହିବେ । ନିଜେ କୁକୁରର ମୃତଦେହ ଉଠାଇ ଏକ ସଚେତନତାର ବାର୍ତ୍ତା ଦେବାକୁ ଚାହୁଁଛି ବୋଲି କହିଛନ୍ତି ସୁବାସ ସିଂ । ସିଏମସିର ସମସ୍ତ କର୍ମଚାରୀ ଓ ଅଧିକାରୀ କ୍ରିୟାଶୀଳ ହେବାକୁ ମେୟର ସଜାଗ କରିଛନ୍ତି ।