ଏମଭି-୪୩ ଗ୍ରାମରେ ରୋଲର ବଦଳରେ ପିକ୍ଅପ୍ରେ ଚାଲିଛି ରାସ୍ତା ସମତୁଲ କାମ
ମାଲକାନଗିରି: ମାଲକାନଗିରି ସଦର ମହକୁମା ନିକଟସ୍ଥ ଏମଭି-୪୩ ଗ୍ରାମରେ ଏକ ଅଜବ ଦୃଶ୍ୟ ଦେଖିବାକୁ ମିଳିଛି। ସରକାରୀ ଜିନିଷକୁ କିପରି ବିଭାଗୀୟ ଅଧିକାରୀ ଏବଂ ଠିକାଦାର ମିଶି ଆତ୍ମସାତ କରୁଛନ୍ତି ତାହାର ନିଗ୍ନ ଚିତ୍ର ଦେଖିବାକୁ ମିଳିଛି। ଏକ ପିକ୍ଅପ୍ ଭ୍ୟାନରେ ରାସ୍ତାରେ ମେଟାଲ ଓ ମରୁମ ପକାଇ ଚପାଇ ଦିଆଯାଉଛି, ଯାହାକୁ ଦେଖିଲେ ଆଶ୍ଚର୍ଯ୍ୟ ଲାଗିବ। ସ୍ଥାନୀୟ ଲୋକେ ଏହାକୁ ବିରୋଧ କରିଥିଲେ। କିଛି ଶ୍ରମିକ ମେଟାଲ ଓ ମୁରୁମ ରାସ୍ତାରେ ପକାଉଥିବା ବେଳେ ପିକ୍ଅପ୍ ଭ୍ୟାନଟି ମୁରୁମ ଓ ମେଟାଲକୁ ସମତଳ କରୁଥିବା ଦେଖିବାକୁ ମିଳିଥିଲା।
Sambad is now on WhatsApp
Join and get latest news updates delivered to you via WhatsApp
ରୋଲର ବଦଳରେ ପିକ୍ଅପ୍ ଭ୍ୟାନ୍କୁ ବ୍ୟବହାର କରୁଥିଲେ ସଂପୃକ୍ତ ଠିକାଦାର। ଏହି ରାସ୍ତାଟି ଗ୍ରାମ୍ୟ ଉନ୍ନୟନ ବିଭାଗର ବୋଲି ଜଣାପଡିଛି। ତେବେ ରାସ୍ତାର ମରାମତି ପାଇଁ ବିଭାଗୀୟ ଅଧିକାରୀ ନିର୍ଦ୍ଦେଶ ଦେବା ପରେ ସଂପୃକ୍ତ ଠିକାଦାର ରୋଲର ନଆଣି ପିକଅପରେ ହିଁ ରାସ୍ତାକୁ ସମତୁଲ କରୁଥିଲେ।ଯାହାକୁ ଗ୍ରାମବାସୀ ଦେଖିବା ପରେ ବିରୋଧ କରିବା ସହ ସେଠାରେ ଉତ୍ତେଜନା ସୃଷ୍ଟି ହୋଇଥିଲା। ବିଭାଗୀୟ ଅଧିକାରୀ ଏବଂ ଠିକାଦାରଙ୍କ ମଧୁଚନ୍ଦ୍ରିକାରେ ଏଭଳି ନିମ୍ନମାନର କାମ କରି ଲକ୍ଷ ଲକ୍ଷ ଟଂକା ଆତ୍ମସାତ କରାଯାଉଥିବା ନେଇ ଏମଭି-୪୩ ଗ୍ରାମର ଲୋକେ ଅଭିଯୋଗ କରିଥିଲେ। ଏଥିପ୍ରତି ଜିଲ୍ଲା ପ୍ରଶାସନ ଦୃଷ୍ଟି ଦେବାକୁ ଦାବି ହୋଇଛି।