ଆଜିଠାରୁ ବଢ଼ିବ ତାତି, ୪୦ ଡିଗ୍ରି ଡେଇଁଲା ୯ ସହର
ଭୁବନେଶ୍ବର : କେରଳରେ ପହଞ୍ଚିଥିବା ଦକ୍ଷିଣ-ପଶ୍ଚିମ ମୌସୁମୀ ଏବେ ସକ୍ରିୟ ରହିଛି। ଆସନ୍ତା ୨୪ ଘଣ୍ଟା ମଧ୍ୟରେ ଦକ୍ଷିଣ ଆରବ ସାଗର, ଲାକ୍ଷାଦୀପ, କେରଳ, ତାଲିମନାଡ଼ୁର କିଛି ଅଞ୍ଚଳ, ପୂର୍ବ-କେନ୍ଦ୍ରୀୟ ଓ ଉତ୍ତର ପୂର୍ବ ବଙ୍ଗୋପସାଗରରେ ପହଞ୍ଚିବ। ପ୍ରଭାବରେ ଉକ୍ତ ଅଞ୍ଚଳଗୁଡ଼ିକରେ ପ୍ରବଳରୁ ଅତିପ୍ରବଳ ବର୍ଷା ହେବ। ୪୦ରୁ ୬୦ କିମି ବେଗରେ ପବନ ହୋଇପାରେ। ଏଥିସହ ଉତ୍ତର ପୂର୍ବ ରାଜ୍ୟଗୁଡ଼ିକରେ ମୌସୁମୀ ପ୍ରବେଶ ଲାଗି ଅନୁକୂଳ ପାଗ ରହିଥିବା ଭାରତୀୟ ପାଣିପାଗ ବିଭାଗ ପକ୍ଷରୁ କୁହାଯାଇଛି।
Sambad is now on WhatsApp
Join and get latest news updates delivered to you via WhatsApp
ତେବେ ପୂର୍ବ ଭାରତ ତଥା ଓଡ଼ିଶା ସମେତ ପଶ୍ଚିମବଙ୍ଗ, ଛତିଶଗଡ଼, ଝାଡ଼ଖଣ୍ଡ, ବିହାର ଆଦି ରାଜ୍ୟରେ ମୌସୁମୀ କେବେ ପ୍ରବେଶ କରିବ, ସେନେଇ ଏବେ ସୁଦ୍ଧା ଆକଳନ କରାଯାଇପାରି ନାହିଁ। ଯଦି ପାଗ ଅନୁକୂଳ ରୁହେ, ଆସନ୍ତା ୬ରୁ ୮ ଦିନ ଅର୍ଥାତ୍ ଜୁନ୍ ୧୪ରୁ ୧୬ ତାରିଖ ମଧ୍ୟରେ ଦକ୍ଷିଣ ଓଡ଼ିଶା ଦେଇ ମୌସୁମୀ ଓଡ଼ିଶାରେ ପ୍ରବେଶ କରିବ। ନ ହେଲେ ୩ରୁ ୪ଦିନ ବିଳମ୍ବ ହୋଇପାରେ। ତେବେ ଜୁନ୍ ୧୭ବେଳକୁ ଓଡ଼ିଶାରେ ପ୍ରାକ୍ ମୌସୁମୀ ବର୍ଷା ଆରମ୍ଭ ହୋଇଥିବ। ନିର୍ଦ୍ଦିଷ୍ଟ କୌଣସି ତାରିଖରେ ଓଡ଼ିଶାରେ ମୌସୁମୀ ପହଞ୍ଚିବ, ସେନେଇ ଏବେ ଆକଳନ କରାଯାଇପାରିବ ନାହିଁ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ କୁହାଯାଇଛି।
ପାଣିପାଗ ବିଶେଷଜ୍ଞଙ୍କ କହିବା କଥା ହେଉଛି ଯେ ମୌସୁମୀ ଏବେ ସକ୍ରିୟ ରହିଛି। ତେବେ ଆସନ୍ତା ୭ଦିନ ମଧ୍ୟରେ ଓଡ଼ିଶାରେ ପ୍ରବେଶ କରିବା ସମ୍ଭାବନା କ୍ଷୀଣ। ଏବେ ଦକ୍ଷିଣ ଭାରତ ସମେତ ଆରବ ସାଗର ଉପକୂଳରେ ମୌସୁମୀ ସକ୍ରିୟ ରହିଥିବାରୁ ଲାକ୍ଷାଦୀପ, କେରଳ, ଦକ୍ଷିଣ କେନ୍ଦ୍ରୀୟ କର୍ଣ୍ଣାଟକରେ ପ୍ରବଳରୁ ଅତିପ୍ରବଳ ବର୍ଷା ହେବ। ୪ ଦିନ ପର୍ଯ୍ୟନ୍ତ ଉତ୍ତର ପୂର୍ବ ରାଜ୍ୟଗୁଡ଼ିକରେ ମୌସୁମୀ ଅଧିକ ସକ୍ରିୟ ହେବ। ଆସାମ, ମେଘାଳୟ, ନାଗାଲାଣ୍ଡ, ମଣିପୁର, ମିଜୋରାମ, ତ୍ରିପୁରାରେ ଅତିପ୍ରବଳ ବର୍ଷା ହୋଇପାରେ। ୧୩ ତାରିଖ ପର୍ଯ୍ୟନ୍ତ ମୌସୁମୀ ମନ୍ଥର ଗତିରେ ଆଗକୁ ବଢ଼ିବ। ତେଣୁ ଓଡ଼ିଶାରେ ଶୀଘ୍ର ପ୍ରବେଶ କରିବାର ସମ୍ଭାବନା ନାହିଁ। ଉତ୍ତର ଓ ପଶ୍ଚିମ ଭାରତରେ ଏବେ ବି ତାତି ଲାଗି ରହିଛି। ଓଡ଼ିଶାରେ ବି ୧୪ ତାରିଖ ଯାଏଁ ପ୍ରଚଣ୍ଡ ତାତି ଅନୁଭୂତ ହେବ। ପଶ୍ଚିମ ଓଡ଼ିଶାର ଗୋଟିଏ ଦୁଇଟି ସ୍ଥାନରେ ତାପମାତ୍ରା ୪୬ ଡିଗ୍ରି ଟପିବାର ଆଶଙ୍କା ରହିଛି। ଉପକୂଳ ଓଡ଼ିଶାରେ ବି ୪୦ ଡିଗ୍ରି ଡେଇଁବ।
ଅନ୍ୟପକ୍ଷରେ ଯଦି ଗତ ୮ ବର୍ଷର ତଥ୍ୟକୁ ଦେଖାଯାଏ ତେବେ ପ୍ରତି ଗୋଟିଏ ବର୍ଷ ବ୍ୟବଧାନରେ ନିର୍ଦ୍ଧାରିତ ସମୟ(ଜୁନ୍ ୧୦ରୁ ୧୨ ତାରିଖ)ଠାରୁ ବିଳମ୍ବରେ ଓଡ଼ିଶାରେ ମୌସୁମୀ ପ୍ରବେଶ କରୁଛି। ୨୦୧୨ରେ ଜୁନ୍ ୧୭ରେ ମୌସୁମୀ ଓଡ଼ିଶା ଛୁଇଁଥିଲା। ୨୦୧୪ରେ ଜୁନ୍ ୧୮, ୨୦୧୬ରେ ଜୁନ୍ ୧୮ରେ ଓଡ଼ିଶାରେ ମୌସୁମୀ ପହଞ୍ଚିଥିଲା। ୨୦୧୮ରେ ଜୁନ୍ ୮ରେ ମୌସୁମୀ ଦକ୍ଷିଣ ଓଡ଼ିଶା ଦେଇ ପ୍ରବେଶ କରିଥିଲା। ଏଥର ସାମାନ୍ୟ ବିଳମ୍ବ ହୋଇପାରେ।
ତିନି ଦିନ ଧରି କୋହଲା ପାଗ ଲାଗି ରହିବା ପରେ ଆଜି ପୁଣିଥରେ ପଶ୍ଚିମ ଓଡ଼ିଶାରେ ତାପମାତ୍ରା ବଢ଼ିଛି। ୯ଟି ସହରରେ ପାରଦ ୪୦ ଡିଗ୍ରି ଡେଇଁଛି। ସମ୍ବଲପୁର ସବୁଠାରୁ ଉତ୍ତପ୍ତ ସହରରେ ପରିଣତ ହୋଇଛି। ଏଠାରେ ରାଜ୍ୟର ସର୍ବୋଚ୍ଚ ତାପମାତ୍ରା ୪୩.୬ ଡିଗ୍ରି ରହିଥିଲା। ଏଥିସହ ହୀରାକୁଦରେ ୪୩.୧, ଟିଟିଲାଗଡ଼ରେ ୪୨.୬, ଝାରସୁଗୁଡ଼ାରେ ୪୨.୨, ବଲାଙ୍ଗୀରରେ ୪୨, ମାଲକାନଗିରିରେ ୪୧, ସୋନପୁରରେ ୪୦.୮, ଭବାନୀପାଟଣାରେ ୪୦.୫, ଅନୁଗୁଳରେ ୪୦.୪ ରେକର୍ଡ କରାଯାଇଛି। ଭୁବନେଶ୍ବର ତାପମାତ୍ରା ୩୭.୭ ଡିଗ୍ରି ରହିଥିଲା। ଗତ ୨୪ ଘଣ୍ଟା ମଧ୍ୟରେ ଝାରସୁଗୁଡ଼ା, ବଲାଙ୍ଗୀର, ସୁନ୍ଦରଗଡ଼, କେନ୍ଦୁଝର ଆଦି ସ୍ଥାନରେ ବର୍ଷା ହୋଇଥିବା ଜଣାପଡ଼ିଛି।