ସୁରକ୍ଷାକର୍ମୀଙ୍କ ଗୁଳିମାଡରେ ହୁରିୟତ ନେତାଙ୍କ ପୁଅ ସମେତ ଦୁଇ ଆତଙ୍କବାଦୀଙ୍କ ନିହତ, ଜଣେ ଯବାନ ଶହୀଦ
ଶ୍ରୀନଗର: ଆତଙ୍କବାଦୀଙ୍କ ବିରୋଧରେ ସୁରକ୍ଷା ବାହିନୀର ଅପରେସନ ଜାମ୍ମୁ କାଶ୍ମୀରରେ ଲଗାତାର ଜାରି ରହିଛି | ଆଜି ସୁରକ୍ଷାକର୍ମୀଙ୍କ ଗୁଳିମାଡରେ ଦୁଇ ଜଣ ଆତଙ୍କବାଦୀ ନିହତ ହୋଇଥିବାବେଳେ ଜଣେ ଯବାନ ଶହୀଦ ହୋଇଛନ୍ତି | ମିଳିଥିବା ସୂଚନା ମୁତାବକ ସୋମବାର ବିଳମ୍ବିତ ରାତିରେ ସୁରକ୍ଷା ବାହିନୀ ଶ୍ରୀନଗରର ନାଭାକଡାଲ ଅଞ୍ଚଳରେ ଦୁଇ ଜଣ ଆତଙ୍କବାଦୀଙ୍କୁ ଘେରି ରହିଥିଲେ। ଅବରୋଧିତ ଆତଙ୍କବାଦୀଙ୍କ ମଧ୍ୟରୁ ତେହେରିକ୍-ଏ-ହୁରିୟାତ୍ ଅଧ୍ୟକ୍ଷ ଆଶରଫ ସେହରାଇଙ୍କ ପୁତ୍ର ଜୁନାଦ ସେହରାଇ ମଧ୍ୟ ଥିଲା । ତେବେ ଆଜି ଉଭୟଙ୍କୁ ଗୁଳି କରାଯାଇଥିଲା। ସୁରକ୍ଷା ବାହିନୀ କହିଛି ଯେ ବିଳମ୍ବିତ ରାତିରେ ଜୁନାଦ ସେହରାଇ ନାଭାକଡାଲ ଅଞ୍ଚଳରେ ଲୁଚି ରହିଥିବା ବାବଦରେ ଖବର ପହଞ୍ଚିଥିଲା। ଏହା ପରେ ଅପରେସନ୍ ଆରମ୍ଭ ହୋଇଥିଲା |
Sambad is now on WhatsApp
Join and get latest news updates delivered to you via WhatsApp
ମଙ୍ଗଳବାର ସକାଳ ପର୍ଯ୍ୟନ୍ତ ଚାଲିଥିବା ଏହି ଅପରେସନରେ ଜୁନାଦ ସେହରାଇ ଏବଂ ତାଙ୍କର ଜଣେ ସହଯୋଗୀର ମୃତ୍ୟୁ ଘଟିଛି। ତେବେ ଏହି ଏନକାଉଣ୍ଟରରେ ଜଣେ ଯବାନ ସହିଦ ହୋଇଥିବାବେଳେ ଚାରିଜଣ ଆହତ ହୋଇଥିଲେ। ମାର୍ଚ୍ଚ ୨୦୧୮ ରେ ଜୁନାଦ ସେହରାଇ ହିଜବୁଲରେ ଯୋଗ ଦେଇଥିଲା | କୁହାଯାଉଛି ଯେ ହିଜବୁଲ ଜୁନାଦଙ୍କୁ ଡେପୁଟି ଚିଫ୍ କମାଣ୍ଡର ନିଯୁକ୍ତି କରାଯାଇଥିଲା । ଆତଙ୍କବାଦୀଙ୍କ ଥିବାର ଖବର ପାଇବା ପରେ ସୁରକ୍ଷା ବାହିନୀ ଅପରେସନ ଆରମ୍ଭ କରିଥିଲେ।
ସୋମବାର ବିଳମ୍ବିତ ରାତିରେ ନାଭାକଡାଲ ଅଞ୍ଚଳକୁ କର୍ଡନ କରାଯାଇ ସର୍ଚ୍ଚ ଅପରେସନ ଆରମ୍ଭ କରାଯାଇଥିଲା। ନିଜକୁ ଘେରି ରହିଥିବାର ଦେଖି ଆତଙ୍କବାଦୀମାନେ ଗୁଳି ଚଳାଇବା ଆରମ୍ଭ କରିଥିଲେ। ଏହା ପରେ ରାତିସାରା ଗୁଳି ବିନିମୟ ଜାରି ରହିଥିଲା। ସକାଳେ ସୁରକ୍ଷାକର୍ମୀଙ୍କ ଗୁଳିମାଡରେ ଦୁଇ ଆତଙ୍କବାଦୀଙ୍କ ମୃତ୍ୟୁ ଘଟିଛି |