ଗୃହ ନିର୍ମାଣ ଟଙ୍କା ଦେଇ ନପାରିବାରୁ ମହିଳାଙ୍କୁ ଦୁଷ୍କର୍ମ!
ଅଭିଯୁକ୍ତ ସହ ବିବାହ କରାଇ ମାମଲାର ରଫାଦଫା ଉଦ୍ୟମ ଅଭିଯୋଗ
ଖୋର୍ଦ୍ଧା: ସେ ଥିଲେ ଅସହାୟ ମହିଳା । କାହିଁ ୬୦-୭୦ କିମି ଦୂରରୁ ଖୋର୍ଦ୍ଧା ଆସି ଏକ ବସ୍ତିର ଝୁମ୍ପୁଡ଼ି ଘରେ ରହି ଅନ୍ୟ ଘରେ କାମ କରି ପେଟ ପୋଷୁଥିଲେ । ସେ ରହୁଥିବା ସରକାରୀ ଜମିରେ ଘରଟିଏ ନିର୍ମାଣ କରିବାକୁ କିଛି ଅର୍ଥ ଯୋଗାଡ଼ କରିଥିଲେ ମଧ୍ୟ ଯଥେଷ୍ଟ ନଥିଲା । ଏହି ସମୟରେ ପଶ୍ଚିମବଙ୍ଗରୁ ଆସିଥିବା ଜଣେ ବାଂଲାଦେଶୀ ମିସ୍ତ୍ରୀ ଶସ୍ତାରେ ଘର ନିର୍ମାଣ କରାଇଦେବାର ପ୍ରତିଶ୍ରୁତି ଦେଇ ଧର୍ଷଣ କରିଥିଲା । ଏନେଇ ସେ ରହୁଥିବା ବସ୍ତିର କେହି ସହାୟତା କଲେ ନାହିଁ, ଶେଷରେ ବ୍ଲେଡ୍ରେ ନିଜ ହାତ କାଟି ଆତ୍ମହତ୍ୟା କରିବାକୁ ଉଦ୍ୟମ କଲେ । ପୁଲିସକୁ ଜଣାଇବା ପରେ ପୁଲିସ ଅଭିଯୁକ୍ତ ବିରୋଧରେ ପଦକ୍ଷେପ ନେବ କ’ଣ ଓଲଟି ମହିଳାଙ୍କୁ ବିବାହ କରିଦେବାକୁ ଚାପ ପକାଉଥିବା ଜଣାଯାଇଛି । ଏଭଳି ଏକ ସମ୍ବେଦନଶୀଳ ଘଟଣା ଖୋର୍ଦ୍ଧାରେ ଚାଲିଥିବା ଅନେକ ଦୁର୍ନୀତି, ଅନିୟମିତତା ସହ ସାଧାରଣ ଲୋକଚରିତ୍ରର ସ୍ଖଳନ ଉପରୁ ପରଦା ଉଠାଇଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନାନୁସାରେ, ପୁରୀ ଜିଲ୍ଲା ବ୍ରହ୍ମଗିରି ଅଂଚଳର ଜଣେ ହିନ୍ଦୁ ଅସହାୟ ମହିଳା ସୁନୀତା ସାହୁ (ଛଦ୍ମନାମ) ପ୍ରାୟ ବର୍ଷେ ଦେଢ଼ ବର୍ଷ ପୂର୍ବେ ନିଜର ପେଟପାଟଣା ପାଇଁ ଖୋର୍ଦ୍ଧା ଆସିଥିଲେ । ଖୋର୍ଦ୍ଧାର ୧୨ ନମ୍ବର ୱାର୍ଡ଼ର ଏକ ଘରୋଇ ହସ୍ପିଟାଲ୍ ନିକଟରେ ଥିବା ସରକାରୀ ଜମିରେ ଥିବା ବେଆଇନ ବସ୍ତିରେ ଝୁମ୍ପୁଡ଼ି ଘରେ ନିଜର ମାଉସୀଙ୍କ ଘରେ ରହୁଥିଲେ । ପରେ ନିକଟରେ ଥିବା ସରକାରୀ ଜମି ଉପରେ ସେ ସଂଚୟ କରିଥିବା ଅର୍ଥରେ ଏକ ଘରଟିଏ ନିର୍ମାଣ କରିବାକୁ ସ୍ୱପ୍ନ ଦେଖିଥିଲେ । ଏଥିପାଇଁ ତାଙ୍କ ନିକଟରେ ଆବଶ୍ୟକ ଅର୍ଥ ନଥିଲା । ଏହି କଥା ନିକଟରେ ଥିବା ଜଣେ ମହିଳା କୁନିଲତାଙ୍କୁ କହିଥିଲେ । କୁନିଲତା ସେହି ବସ୍ତିରେ ରହୁଥିବା ବାଂଲାଦେଶୀ ମିସ୍ତ୍ରୀ ସେକ୍ ନାସିରକୁ କହିଥିଲେ । ସେକ୍ ନାସିର ଅଳ୍ପ ଟଙ୍କାରେ ଘର ନିର୍ମାଣ କରିବାକୁ ରାଜି ହୋଇଥିବା ବେଳେ ଏହା ବଦଳରେ ସୁନୀତା ରଖିଥିବା ଜମିରୁ ଅଦେ୍ର୍ଧକ ମାଗିଥିଲା । ଏଥିପାଇଁ ସୁନୀତା ରାଜି ହୋଇଯାଇଥିଲେ । ଘର ନିର୍ମାଣ ଅଧାଅଧି ଶେଷ ହେବା ବେଳେ ଅବୈଧ ନିର୍ମାଣ ଯୋଗୁଁ ରାଜସ୍ୱ ବିଭାଗ କର୍ମଚାରୀ ସେଠାରେ ପହଂଚି ତାକୁ ଅଟକାଇ ଦେଇଥିଲେ ।
ଏହି ସମୟରେ ଗୃହ ନିର୍ମାଣ କରିବା ବାବଦକୁ ଅର୍ଥ ଦେବାକୁ ନାସିର ସୁନୀତାଙ୍କ ଉପରେ ଚାପ ପକାଉଥିଲେ । ଜାନୁଆରି ୨୫ ତାରିଖ ରାତିରେ ନାସିର ସୁନୀତାଙ୍କ ଘରେ ପଶି ତାଙ୍କୁ ଧର୍ଷଣ କରିଥିଲେ । ଏନେଇ ସୁନୀତା କୁନିଲତା ଓ ଆଖପାଖର ଲୋକଙ୍କୁ ଜଣାଇବାରେ ସେମାନେ କହିଥିଲେ ଘର ତିଆରି ଟଙ୍କା ଦେଇପାରିଲୁନାହିଁ, ଏହା ବଦଳରେ କିଛି ତ ଦେବାକୁ ପଡ଼ିବ । ଦେଲୁ ଏଥିରେ ଅସୁବିଧା କ’ଣ ବୋଲି କହିଥିଲେ । ଏଥିରେ ବ୍ୟଥିତ ହୋଇ ୨୬ ତାରିଖ ସାଧାରଣତନ୍ତ୍ର ଦିବସରେ ସୁନୀତା ବ୍ଲେଡ୍ରେ ନିଜ ହାତ କାଟି ଆତ୍ମହତ୍ୟା କରିବାକୁ ଚେଷ୍ଟା କରିଥିଲେ । ଏହାପରେ ତାଙ୍କୁ ସ୍ଥାନୀୟ ଲୋକ ନେଇ ଜିଲ୍ଲା ଚିକିତ୍ସାଳୟରେ ଭର୍ତି କରିଥିଲେ । ଗତକାଲି ସୁନୀତା ଫେରିବା ପରେ ଏନେଇ ଟାଉନ ଥାନାରେ ଲିଖିତ ଅଭିଯୋଗ କରିଥିଲେ । ତେବେ ଅଭିଯୁକ୍ତକୁ ଧରିବା ବଦଳରେ ପୁଲିସ ସୁନୀତାଙ୍କୁ ଅସହାୟ ଥିବା ଏଣୁ ଧର୍ଷଣ ଅଭିଯୁକ୍ତ ସହ ବିବାହ କରିବାକୁ ଚାପ ପକାଉଥିବା ଅଭିଯୋଗ ହୋଇଛି । ସୁନୀତା ଅସହାୟ ଥିବାରୁ ସେ ଭୟରେ ମୁହଁ ଖୋଲି କିଛି କହିପାରୁନାହାନ୍ତି ।
ମାମଲା ସମ୍ପର୍କରେ ଖୋର୍ଦ୍ଧା ଟାଉନ ଥାନାର ଭାରପ୍ରାପ୍ତ ଅଧିକାରୀ ତାରିକ ଅହମ୍ମଦଙ୍କୁ ପଚାରିବାରେ ସେ କହିଛନ୍ତି ଯେ ଏନେଇ ଅଭିଯୋଗ ମିଳିଛି । ମହିଳାଙ୍କ ବୟାନ ଅନୁସାରେ ୬୬/୨୦୨୩ରେ ଏକ ଧର୍ଷଣ ମାମଲା ରୁଜୁ ହୋଇଥିବା ଓ ଅଭିଯୁକ୍ତ ସେକ୍ ନାସିର ଗିରଫ ହୋଇଛି । ମାମଲାର ତଦନ୍ତ ଭାର ଏସ୍ଆଇ ସସ୍ମିତା ବେହେରାଙ୍କୁ ଦିଆଯାଇଛି ବୋଲି କହିଛନ୍ତି । ତେବେ ମହିଳା ଜଣକ ଲିଖିତ ଅଭିଯୋଗର ଦୁଇ ଦିନ ଧରି ପୁଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା ବେଳେ ସରକାରୀ ଜମିର ବେଆଇନ ଦଖଲର ଏକ ବିରାଟ ନେଟ୍ୱାର୍କ ସମ୍ପର୍କରେ ପ୍ରଶାସନ ଜାଣିଶୁଣି ନିରବ ରହୁଛି ବୋଲି ସାଧାରଣରେ ଆଲୋଚନା ହେଉଛି ।