ମଣ୍ଡି ଉପରେ କୃଷକଙ୍କ ନିର୍ଭରଶୀଳତା କମିବ, ସରକାର ଆଣିବେ ନୂଆ ଆଇନ
ନୂଆଦିଲ୍ଲୀ : ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି କୃଷି କ୍ଷେତ୍ର ପାଇଁ ଘୋଷଣା କରିଥିବା ବିଭିନ୍ନ ଘୋଷଣା ମଧ୍ୟରେ ଏକ ବଡ଼ ଘୋଷଣା ହେଉଛି କୃଷକମାନଙ୍କୁ ଏପିଏମସି ବା କୃଷିଜାତ ଉତ୍ପାଦ ମାର୍କେଟିଂ କମିଟି ନିୟନ୍ତ୍ରଣରୁ ମୁକ୍ତ କରିବା । ଏଥିପାଇଁ ସରକାର ଏକ ନୂଆ କେଦ୍ରୀୟ ଆଇନ ଆଣିବେ ।
ଏହି ଆଇନ ପ୍ରଣୟନ ହେବା ପରେ କୃଷକମାନଙ୍କୁ ଆଉ କେବଳ ଏପିଏମସି ମଣ୍ଡି ଉପରେ ନିର୍ଭର କରିବାକୁ ପଡ଼ିବ ନାହିଁ । ସେମାନେ ନିଜ ଇଚ୍ଛା ଅନୁସାରେ ବଜାରରେ ବା ବାହାର ରାଜ୍ୟରେ ନିଜର କୃଷିଜାତ ଉତ୍ପାଦ ବିକ୍ରି କରିପାରିବେ ।
Sambad is now on WhatsApp
Join and get latest news updates delivered to you via WhatsApp
ବର୍ତ୍ତମାନ ପ୍ରଚଳିତ ନିୟମ ଅନୁସାରେ କୃଷକମାନେ ନିଜର ସାମଗ୍ରୀ ବିକ୍ରି କରିବାକୁ ନିଜ ରାଜ୍ୟରେ ଥିବା ମଣ୍ଡିରେ ଲାଇସେନ୍ସପ୍ରାପ୍ତ ଟ୍ରେଡରଙ୍କୁ ବିକ୍ରି କରିପାରୁଥିଲେ । କିନ୍ତୁ ଘୋଷିତ ନୂଆ ନିୟମ ଅନୁସାରେ ଏଣିକି କୃଷକମାନେ ମଣ୍ଡିରେ ଥିବା ଲାଇସେନ୍ସପ୍ରାପ୍ତ ଟ୍ରେଡରଙ୍କୁ ବିକ୍ରି କରିବାକୁ ବାଧ୍ୟ ରହିବେନାହିଁ, ବରଂ ସେମାନେ ନିଜ ଇଚ୍ଛା ଅନୁସାରେ ବଜାରରେ ଏପରିକି ବାହାର ରାଜ୍ୟରେ ଆକର୍ଷଣୀୟ ଦରରେ ନିଜ ସାମଗ୍ରୀକୁ ବିକ୍ରି କରିପାରିବେ । ଅର୍ଥାତ କୃଷକମାନେ ନିଜର କୃଷିଜାତ ସାମଗ୍ରୀକୁ ବଡ଼ ରିଟେଲ କମ୍ପାନି, କୃଷିଜାତ ଉତ୍ପାଦ ସଂଗଠନ(ଏଫପିଓ) କିମ୍ବା ସମବାୟ ସଂସ୍ଥାକୁ ସିଧାସଳଖ ବିକ୍ରି କରିପାରିବେ । ଏଥିପାଇଁ ସେମାନଙ୍କୁ ନିଜ ସାମଗ୍ରୀକୁ ମଣ୍ଡିକୁ ଆଣିବାକୁ ପଡ଼ିବ ନାହିଁ ।