ଓଡ଼ିଶା ଯୋଡ଼ିଲା ଲକ୍ଷେ ୫୬ ହଜାର ମୋବାଇଲ୍ ଗ୍ରାହକ
ଭୁବନେଶ୍ବର: ଚଳିତ ବର୍ଷ ଫେବ୍ରୁଆରିରେ ରାଜ୍ୟର ମୋବାଇଲ୍ ନେଟ୍ୱର୍କରେ ୧ ଲକ୍ଷ ୫୬ ହଜାର ୭୮୩ ନୂଆ ମୋବାଇଲ୍ ଗ୍ରାହକ ଯୋଡ଼ି ହୋଇଛନ୍ତି। ଫଳରେ ଓଡ଼ିଶାରେ ମୋଟ୍ ମୋବାଇଲ୍ ଗ୍ରାହକଙ୍କ ସଂଖ୍ୟା ୩.୪ କୋଟିକୁ ବୃଦ୍ଧି ପାଇଛି। ରିଲାଏନ୍ସ ଜିଓ ୧,୯୦,୬୬୩ ଓ ଏୟାରଟେଲ୍ ୬୬୯୦୮ ନୂଆ ମୋବାଇଲ୍ ଗ୍ରାହକ ଯୋଡ଼ିଛନ୍ତି। ଏହି ମାସରେ ଭୋଡାଫୋନ୍ ଆଇଡିଆ ରାଜ୍ୟରୁ ୬୪,୯୦୪ ଜଣ ଓ ସରକାରୀ ଦୂରସଂଚାର କଂପାନି ବିଏସ୍ଏନ୍ଏଲ୍ ୩୫,୮୮୪ ଜଣ ପୁରୁଣା ଗ୍ରାହକଙ୍କୁ ହରାଇଛନ୍ତି। ଭାରତୀୟ ଟେଲିକମ୍ ନିୟାମକ କର୍ତ୍ତୃପକ୍ଷ (ଟ୍ରାଇ) ତରଫରୁ ଜାରି କରାଯାଇଥିବା ତଥ୍ୟରୁ ଏହା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଫେବ୍ରୁଆରି ମାସ ସୁଦ୍ଧା ରାଜ୍ୟରେ ଏୟାରଟେଲ୍ର ମୋଟ ଗ୍ରାହକ ସଂଖ୍ୟା ୧ କୋଟି ୧୧ ଲକ୍ଷ ୧୩ ହଜାର ୪୫ରେ ପହଞ୍ଚିଛି। ସେହିପରି ଭୋଡାଫୋନ୍ ଆଇଡିଆ ପାଖରେ ରହିଛନ୍ତି ୨୪ ଲକ୍ଷ ୧୭ ହଜାର ୩୯୧ ଗ୍ରାହକ। ରିଲାଏନ୍ସ ଜିଓର ମୋଟ୍ ଗ୍ରାହକ ସଂଖ୍ୟା ୧ କୋଟି ୪୦ ଲକ୍ଷ ୫୩ ହଜାର ୧୯୪ରେ ପହଞ୍ଚିଛି। ବିଏସ୍ଏନ୍ଏଲ୍ ପାଖରେ ୬୪ ଲକ୍ଷ ୨୭ ହଜାର ୧୨ ଜଣ ମୋବାଇଲ୍ ଗ୍ରାହକ ଥିବା ଜଣାପଡ଼ିଛି। ଗ୍ରାହକ ବଜାରର ସିଂହ ଭାଗ ଅର୍ଥାତ ୪୧.୫% ଜିଓ କବ୍ଜାରେ ଥିବା ବେଳେ ଏୟାରଟେଲ୍ର ବଜାର ଅଂଶ ୩୨.୬୭%, ଭୋଡାଫୋନ୍ ଆଇଡିଆର ୭.୧୧% ଓ ବିଏସ୍ଏନ୍ଏଲ୍ର ୧୮.୯୦ ପ୍ରତିଶତ ରହିଛି ବୋଲି ଟ୍ରାଇ ରିପୋର୍ଟରୁ ଜଣାପଡ଼ିଛି।