କରୋନା ସଙ୍କଟ: ୧୨ ଲକ୍ଷ କୋଟି ଋଣ କରିବ କେନ୍ଦ୍ର
ନୂଆଦିଲ୍ଲୀ: କରୋନା ସଙ୍କଟ ଦେଶର ଋଣ ଆବଶ୍ୟକତାକୁ ବଢ଼ାଇ ଦେଇଛି। ସେଥିପାଇଁ ଚଳିତ ବର୍ଷ ଅଧିକ ଋଣ କରିବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ବଜେଟ୍ ଘୋଷଣା ଅନୁଯାୟୀ, ଚଳିତ ଆର୍ଥିକ ବର୍ଷରେ କେନ୍ଦ୍ର ସରକାର ୭.୮ ଲକ୍ଷ କୋଟି ଟଙ୍କାର ଋଣ କରିବାକୁ ଲକ୍ଷ୍ୟ ରଖିଥିଲେ। ମାତ୍ର କରୋନା ସଙ୍କଟ ପରେ ଏବେ ୧୨ ଲକ୍ଷ କୋଟି ଟଙ୍କାର ଋଣ କରିବାକୁ ସରକାର ନିଷ୍ପତ୍ତି ନେଇଛନ୍ତି। ଯେହେତୁ ସରକାର ଅଧିକ ଋଣ କରବାକୁ ଚାହୁଛନ୍ତି ତେଣୁ ବିତ୍ତୀୟ ନିଅଣ୍ଟ ଲକ୍ଷ୍ୟରେ ନିଶ୍ଚିତ ରୂପେ ପରିବର୍ତ୍ତନ କରିବାକୁ ହେବ। ବିତ୍ତୀୟ ନିଅଣ୍ଟକୁ ଜିଡିପିର ୩.୫ ପ୍ରତିଶତ ଭିତରେ ରଖିବା ଲାଗି ସରକାର ବଜେଟ୍ରେ ଘୋଷଣା କରିଛନ୍ତି। ଅଧିକ ଋଣ ପାଇଁ ସେହି ଲକ୍ଷ୍ୟକୁ ବଢ଼ାଇବାକୁ ପଡ଼ିବ। ୨୦୧୯-୨୦ରେ ସରକାର ୭.୧ ଲକ୍ଷ କୋଟି ଟଙ୍କାର ଋଣ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଏହି ନିଷ୍ପତ୍ତି ସଂକ୍ରାନ୍ତରେ ଦୁଇଟି ଅଲଗା ଅଳଗା ଟୁଇଟ୍ରେ ଭାରତ ସରକାର ଏବଂ ଭାରତୀୟ ରିଜର୍ଭ ବ୍ୟାଙ୍କ ସୂଚନା ଦେଇଛନ୍ତି। ଚଳିତ ଆର୍ଥିକ ବର୍ଷର ପରବର୍ତୀ ମାସଗୁଡ଼ିକରେ କେଉଁଭଳି ଭାବେ ଋଣ କରାଯିବ ତାହାର ସୂଚନା ମଧ୍ୟ ସରକାର ଦେଇଛନ୍ତି। ପରିବର୍ତ୍ତିତ ଯୋଜନା ଅନୁସାରେ, ବର୍ଷର ଅନ୍ୟ ମାସଗୁଡ଼ିକରେ ଗିଲ୍ଟ ଜରିଆରେ ସରକାର ବଜାରରୁ ୬ ଲକ୍ଷ କୋଟି ଟଙ୍କା ଋଣ କରିବେ। ମେ’ ୧୧ ପରଠାରୁ ପ୍ରତି ସପ୍ତାହରେ ୩୦ ହଜାର କୋଟି ଟଙ୍କାର ନିଲାମ ହେବ ବୋଲି ଯୋଜନା ପ୍ରସ୍ତୁତ କରାଯାଇଛି। ଦୀର୍ଘ ଆଠ ସପ୍ତାହ ଧରି ଲକ୍ଡାଉନ୍ରେ ଥିବା ଭାରତରେ ବିପୁଳ ଅର୍ଥନୈତିକ କ୍ଷତି ହେଲାଣି। ଗତ ମାର୍ଚ୍ଚରେ ଅର୍ଥନୈତିକ ବ୍ୟାପାର ସଚିବ ଅତନୁ ଚକ୍ରବର୍ତୀ କହିଥିଲେ ଯେ କରୋନା ସ୍ଥିତିର ମୁକାବିଲା ଲାଗି ସରକାର ଏପ୍ରିଲ୍-ସେପ୍ଟେମ୍ବର ଅବଧିରେ ଅଧିକ ଋଣ କରିବା ଉପରେ ବିଚାର କରୁଛନ୍ତି। ଶିଳ୍ପ ଜଗତକୁ ପୁଣି ସକ୍ରିୟ କରିବା ଲାଗି ଯାହା ଦରକାର ତାହା କରିବାକୁ ସରକାର ସଂକଳ୍ପ ନେଇଛନ୍ତି। କେବଳ ବଜାରରୁ ନୁହେଁ ଦରକାର ପଡ଼ିଲେ ବିଶ୍ବ ସ୍ତରୀୟ ଏଜେନ୍ସିଗୁଡ଼ିକ ଠାରୁ ପାଣ୍ଠି ଅଣାଯିବ ବୋଲି ସେ କହିଛନ୍ତି।