ନୂଆଦିଲ୍ଲୀ : ଦିଲ୍ଲୀରୁ ମୁମ୍ବାଇ ଯାଉଥିବା ଭିସ୍ତାରା ଫ୍ଲାଇଟରେ ବୋମା ଗୁଜବ ସୃଷ୍ଟି ହେବାରୁ ଫ୍ଲାଇଟ୍ ପ୍ରାୟ ୨ ଘଣ୍ଟା ବିଳମ୍ବରେ ଛାଡ଼ିଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଦିଲ୍ଲୀରୁ ମୁମ୍ବାଇ ଯାଉଥିବା ଭିସ୍ତାରା ୟୁକେ ୯୪୧ ଫ୍ଲାଇଟ ଗୁରବାର ଅପରାହ୍ଣ ୪ଟା ୫୫ ମିନିଟରେ ମୁମ୍ବାଇ ଯାତ୍ରା କରିବାର ଥିଲା । କିନ୍ତୁ ଫ୍ଲାଇଟରେ ବସିଥିବା ଜଣେ ମହିଳା ଅଭିଯୋଗ ଗଲେ ଯେ ତାଙ୍କ ପାଖରେ ବସିଥିବା ଜଣେ ଯାତ୍ରୀ ଫୋନରେ ବୋମା ବିଷୟରେ କଥା ହେଉଥିଲେ । ମହିଳାଙ୍କ କହିବା ଅନୁସାରେ, ଉକ୍ତ ବ୍ୟକ୍ତି ଫୋନରେ କହୁଥିଲେ ଯେ ତାଙ୍କ ବ୍ୟାଗେଜରେ ଥିବା ବୋମାକୁ ସିଆଇଏସଏଫ ଧରିପାରିନଥିଲା । ମହିଳା ଜଣକ ଏ ସଂପର୍କରେ ବିମାନ କର୍ମଚାରୀଙ୍କୁ ଜଣାଇବା ପରେ ତୁରନ୍ତ ଉଡ଼ାଣ ବନ୍ଦ କରାଯାଇଥିଲା ଓ ଗ୍ରାଉଣ୍ଡ ସିକ୍ୟୁରିଟି ଓ ସିଆଇଏସଏଫ ( କେନ୍ଦ୍ରୀୟ ଶିଳ୍ପ ନିରାପତ୍ତା ବାହିନୀ) କୁ ସୂଚୀତ କରାଯାଇଥିଲା ।
ଏହା ପରେ ସିଆଇଏସଏଫ ପକ୍ଷରୁ ପ୍ରତି ଯାତ୍ରୀଙ୍କ ବ୍ୟାଗେଜ୍ ଯାଞ୍ଚ କରାଯାଇଥିଲା । ଏପରିକି ବିମାନ ବନ୍ଦରର ଟର୍ମିନାଲ ଅଂଚଳରେ ବି ବୋମା ଖୋଜା ଯାଇଥିଲା । ମାତ୍ର ବୋମା ମିଳିନଥିଲା । ଫଳରେ ବୋମା ଥିବା ସୂଚନାଟି ଗୁଜବ ବୋଲି ଜଣାପଡ଼ିଥିଲା । ଏହା ପରେ ବିମାନକୁ ଉଡ଼ାଣ ପାଇଁ ଅନୁମତି ଦିଆଯାଇଥିଲା । ଫଳରେ ସଂଧ୍ୟା ୬ଟା ୪୫ ମିନିଟ ସମୟରେ ବିମାନଟି ମୁମ୍ବାଇ ଅଭିମୁଖେ ଯାତ୍ରା କରିଥିଲା ।