ବାରମ୍ବାର କଥାବାର୍ତ୍ତା ସତ୍ତ୍ୱେ ପଛକୁ ହଟୁନି ଚୀନ ସେନା
ନୂଆଦିଲ୍ଲୀ : ଭାରତ ଓ ଚୀନ ମଧ୍ୟରେ ୪ ଦଫା କଥାବାର୍ତ୍ତା ଶେଷ ହୋଇସାରିଥିବା ସତ୍ତ୍ୱେ ସୀମାରୁ ଚୀନ ସୈନ୍ୟଙ୍କ ପ୍ରତ୍ୟାବର୍ତ୍ତନ ନେଇ ସନ୍ତୋଷଜନକ ଅଗ୍ରଗତି ଘଟୁନାହିଁ । ଗୋଟିଏ ପଟେ ଚୀନ କହୁଛି ଯେ ଚୀନ ସେନା ସଂପୂର୍ଣ୍ଣ ଭାବେ ବିବାଦୀୟ ଅଞ୍ଚଳରୁ ହଟିଯାଇଛି । କିନ୍ତୁ ଭାରତ କହୁଛି ଯେ ଚୀନ ସେନା ଏବେ ବି କେତେକ ବିବାଦୀୟ ଅଞ୍ଚଳରେ ରହିଛି । ଏହା ଫଳରେ ଦୁଇ ଦେଶ ମଧ୍ୟରେ ଏହି ସମସ୍ୟା ଏକ ଦୀର୍ଘ ସମୟ ଧରି ଚାଲିବା ଆଶଙ୍କା ଦେଖାଦେଇଛି । ଏପରିକି ଆଗାମୀ ଶୀତଋତୁରେ ମଧ୍ୟ ସେଠାରେ ରହିବାକୁ ଭାରତୀୟ ସେନା ପ୍ରସ୍ତୁତି ଆରମ୍ଭ କରିଦେଇଛି ।
Sambad is now on WhatsApp
Join and get latest news updates delivered to you via WhatsApp
ଗତକାଲି ଚୀନ ବୈଦେଶିକ ମନ୍ତ୍ରାଳୟର ପକ୍ଷରୁ କୁହାଯାଇଥିଲା ଯେ ସୀମାରେ ସ୍ଥିତି ଶାନ୍ତିପୂର୍ଣ୍ଣ ରହିଛି ଓ ଉତ୍ତେଜନା ନାହିଁ । ଦୁଇଦେଶର ସେନା ବିବାଦୀୟ କ୍ଷେତ୍ରଗୁଡ଼ିକରୁ ସମ୍ପୂର୍ଣ୍ଣ ଭାବେ ପ୍ରତ୍ୟାବର୍ତ୍ତନ କରିସାରିଛନ୍ତି । ସେ କହିଥିଲେ ଯେ ଖୁବଶୀଘ୍ର ଦୁଇଦେଶର ମିଲିଟାରୀ କମାଣ୍ଡରସ୍ତରୀୟ ୫ମ ଦଫା କଥାବାର୍ତ୍ତା ଅନୁଷ୍ଠିତ ହେବ ।
ଚୀନ ଓ ଭାରତ ସେନା କେତୋଟି ବିବାଦୀୟ କ୍ଷେତ୍ରରୁ ପଛକୁ ହଟିଥିଲେ ମଧ୍ୟ ପେଙ୍ଗୟାଙ୍ଗ ସୋ ଅଞ୍ଚଳରେ ଏବେ ବି ରହିଛି । କେତେକ ରିପୋର୍ଟ ଅନୁସାରେ ଚୀନ ସେନା ଅନ୍ୟ କେତେକ ଅଞ୍ଚଳରେ ହଜାର ହଜାର ଯବାନ ମୁତୟନ କରିଛି । ଏହା ସହିତ ଅସ୍ତ୍ରଶସ୍ତ୍ର ମୁତୟନ କରିଛି । ଏହାର ଜବାବରେ ଭାରତୀୟ ସେନା ଲଦାଖରେ ପ୍ରାୟ ୩୫ ହଜାର ସେନା ମୁତୟନ କରିଛି । ଏହା ସହିତ ଟ୍ୟାଙ୍କ ଓ ଲଢୁଆ ବିମାନ ମଧ୍ୟ ମୁତୟନ କରିଛି।