ଆମକୁ ନେଇ ଭୋଟ ବ୍ୟାଙ୍କ ରାଜନୀତି କରନି : ବ୍ରିଟେନକୁ ଚେତାଇଲା ଭାରତ
କୃଷି ଆଇନ ସମ୍ପର୍କରେ ବ୍ରିଟିଶ ସଂସଦରେ ବିତର୍କ, ତୀବ୍ର ବିରୋଧ କଲା ଭାରତ
ନୂଆଦିଲ୍ଲୀ : ନୂଆ କୃଷି ଆଇନ ସମ୍ପର୍କରେ ବ୍ରିଟିଶ ସଂସଦରେ ବିତର୍କ ହେବାକୁ ନେଇ ତୀବ୍ର ପ୍ରତିକ୍ରିୟା ପ୍ରକାଶ କରିଛି ନୂଆଦିଲ୍ଲୀ । ଏହି ପ୍ରସଙ୍ଗରେ ନୂଆଦିଲ୍ଲୀରେ ଅବସ୍ଥାପିତ ବ୍ରିଟିଶ ଉଚ୍ଚାୟୁକ୍ତଙ୍କୁ ଡକାଇ ଭାରତର ଅସନ୍ତୋଷକୁ ଜଣାଇଦେଇଛନ୍ତି ବୈଦେଶିକ ସଚିବ ହର୍ଷ ସିଂଗଲା ।
ଏକ ବୟାନ ଜାରି କରି ଭାରତର ବୈଦେଶିକ ମନ୍ତ୍ରାଳୟପକ୍ଷରୁ କୁହାଯାଇଛି ଯେ ଅନ୍ୟ ଏକ ଗଣତାନ୍ତ୍ରିକ ରାଷ୍ଟ୍ରର ଆଭ୍ୟନ୍ତରୀଣ ବ୍ୟାପାର ଉପରେ ଏହା ଏକ ଅଯଥା ହସ୍ତକ୍ଷେପ । ବ୍ରିଟିଶ ସାଂସଦମାନେ ଅନ୍ୟ ଏକ ରାଷ୍ଟ୍ର ସମ୍ପର୍କିତ ତଥ୍ୟକୁ ବିଭ୍ରାନ୍ତ କରି ଭୋଟ ବ୍ୟାଙ୍କ ରାଜନୀତି ନ କରନ୍ତୁ ବୋଲି ଭାରତ କହିଛି ।
Sambad is now on WhatsApp
Join and get latest news updates delivered to you via WhatsApp
ଏହି ବୟାନରେ ଭାରତ ପକ୍ଷରୁ ଆହୁରି ମଧ୍ୟ କୁହାଯାଇଛି ଯେ, ଭାରତରେ ଚାଲିଥିବା କୃଷକ ଆନ୍ଦୋଳନକୁ ବ୍ରିଟିଶ ଗଣମାଧ୍ୟମ ସହ ସବୁ ବିଦେଶୀ ଗଣମାଧ୍ୟମ ରିପୋର୍ଟିଂ କରିଛନ୍ତି । ଏଣୁ ଭାରତରେ ଗଣମାଧ୍ୟମର ସ୍ବାଧୀନତା ନ ଥିବାର ପ୍ରଶ୍ନ ଉଠୁନାହିଁ ।
ବ୍ରିଟିଶ ସଂସଦରେ ହୋଇଥିବା ଭାରତର କୃଷି ସଂସ୍କାର ସମ୍ପର୍କିତ ବିତର୍କରେ ଲେବର ପାର୍ଟି ସମେତ କଂଜରଭେଟିଭ ପାର୍ଟିର ସାଂସଦମାନେ ଭାଗ ନେଇଥିଲେ । ଭାରତ ପକ୍ଷରୁ କୁହାଯାଇଛି ଯେ କୌଣସି ଦେଶର ସଂସଦରେ କଣ ଆଲୋଚନା ହେଲା ସେ ସମ୍ପର୍କରେ ଭାରତ ସରକାର କେବେ ବି ନିଜର ମନ୍ତବ୍ୟ ଦିଅନ୍ତି ନାହିଁ । କିନ୍ତୁ ଯେତେବେଳେ ଉକ୍ତ ଆଲୋଚନାରେ ଭାରତ ସମ୍ପର୍କରେ ପ୍ରଶ୍ନ ଉଠାଯାଏ, ସେତେବେଳେ ସ୍ଥିତି ସ୍ପଷ୍ଟ କରିବାର ଆବଶ୍ୟକତା ପଡ଼ିଥାଏ ।