ଦିନେ ଘୋଡା ଗାଡି ଚଲାଉଥିଲେ, ଆଜି ୨ ହଜାର କୋଟି ଟଙ୍କାର ବ୍ୟବସାୟ
ନୂଆଦିଲ୍ଲୀ: ପ୍ରସିଦ୍ଧ ମସଲା କମ୍ପାନି ଏମ୍ଡିଏଚ୍ର ମାଲିକ ଧରମପାଲ ଗୁଲାଟିଙ୍କର ୯୮ ବର୍ଷ ବୟସରେ ପରଲୋକ ଘଟିଛି। ଦିନେ ଘୋଡାଗାଡି ଚଳାଉଥିବା ଧରମପାଲ ନିଜର ପରିଶ୍ରମ ଓ ଚେଷ୍ଟା ବଳରେ କିଭଳି ୨ ହଜାର କୋଟି ଟଙ୍କାର ବ୍ୟବସାୟିକ ସାମ୍ରାଜ୍ୟର ମୂଳଦୁଆ ପକାଇଥିଲେ ସେ ବାବଦରେ ଆଜି ଆମେ ଆପଣଙ୍କୁ କହିବୁ | ଧରମପାଲ ଗୁଲାଟିଙ୍କର ଜନ୍ମ ୨୭ ମାର୍ଚ୍ଚ ୧୯୨୩ ରେ ପାକିସ୍ତାନର ସିଆଲକୋଟରେ ହୋଇଥିଲା, ଯାହା ପୂର୍ବରୁ ଭାରତର ଏକ ଅଂଶ ଥିଲା | ୧୯୩୩ ମସିହାରେ, ସେ ତାଙ୍କର ୫ମ ଶ୍ରେଣୀ ପାଠ ସମାପ୍ତ କରିବା ପୂର୍ବରୁ ବିଦ୍ୟାଳୟ ଛାଡିଥିଲେ ଏବଂ ୧୯୩୭ ମସିହାରେ ବାପାଙ୍କ ସାହାଯ୍ୟରେ ବ୍ୟବସାୟ ଆରମ୍ଭ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଭାରତ-ପାକିସ୍ତାନ ବିଭାଜନ ପରେ ସେ ଦିଲ୍ଲୀ ଆସିଥିଲେ। ୨୭ ସେପ୍ଟେମ୍ବର ୧୯୪୭ ରେ, ତାଙ୍କ ପାଖରେ କେବଳ ୧୫୦୦ ଟଙ୍କା ଥିଲା | ସେ ୬୫୦ ଟଙ୍କାରେ ଏକ ଟାଙ୍ଗା(ଘୋଡାଗାଡି) କିଣି ନୂଆଦିଲ୍ଲୀ ରେଳ ଷ୍ଟେସନରୁ କୁତୁବ ରୋଡ ପର୍ଯ୍ୟନ୍ତ ଚଲାଇଥିଲେ । କିଛି ଦିନ ପରେ ଧରମପାଲ ଟାଙ୍ଗାକୁ ତାଙ୍କ ଭାଇଙ୍କୁ ଦେଇଥିଲେ ଏବଂ କରୋଲ ବାଗର ଅଜମଲ ଖାନ ରୋଡରେ ଏକ ଛୋଟ ଦୋକାନ ଖୋଲିଥିଲେ | ଏହି ଦୋକାନରେ ମହାଶୟାନ ଦି ହାଟୀ (MDH) ନାମରେ ମସଲା ବିକ୍ରୟ ଆରମ୍ଭ କରିଥିଲେ | ଲୋକମାନେ ତାଙ୍କ ମସଲାକୁ ଏତେ ପସନ୍ଦ କଲେ ଯେ ଅଳ୍ପ ସମୟ ମଧ୍ୟରେ ତାଙ୍କ ଦୋକାନ ଏକ ପ୍ରସିଦ୍ଧ ମସଲା ଦୋକାନରେ ପରିଣତ ହେଲା |
ଧୀରେ ଧୀରେ ସେ ଦିଲ୍ଲୀର ବିଭିନ୍ନ ଅଞ୍ଚଳରେ ଦୋକାନ ଖୋଲିଥିଲେ। ଚାହିଦା ବଢିବା ସହିତ ସେ କାରଖାନା ପ୍ରତିଷ୍ଠା କରିବାର ଆବଶ୍ୟକତା ଅନୁଭବ କଲେ କିନ୍ତୁ ଏଥିପାଇଁ ତାଙ୍କ ପାଖରେ ଟଙ୍କା ନଥିଲା | ଏହା ପରେ ସେ ବ୍ୟାଙ୍କରୁ ଋଣ ନେଇ ଦିଲ୍ଲୀର କିର୍ତ୍ତୀ ନଗରରେ ନିଜର ପ୍ରଥମ ମସଲା କାରଖାନା ପ୍ରତିଷ୍ଠା କରିଥିଲେ। ଆଜି, ଏମଡ଼ିଏଚ ର ଭାରତ ଏବଂ ଦୁବାଇରେ ପ୍ରାୟ ୧୮ ଟି କାରଖାନା ଅଛି, ଯେଉଁଥିରେ ପ୍ରସ୍ତୁତ ମସଲା ଅନେକ ଦେଶରେ ବିକ୍ରି ହୁଏ | ବର୍ତ୍ତମାନ ବଜାରରେ ଏମଡ଼ିଏଚ ର ପ୍ରାୟ ୬୨ ଟି ଉତ୍ପାଦ ଅଛି |