ତାଲିବାନ ଘୋଷଣା କଲା କଠୋର ଆଇନ, ସର୍ବସାଧାରଣରେ ଦିଆଯିବ ମୃତ୍ୟୁଦଣ୍ଡ
କାବୁଲ : ଆଫଗାନିସ୍ତାନରେ ଇସ୍ଲାମିକ ଆଇନ ସଂପୂର୍ଣ୍ଣଭାବେ ଲାଗୁ କରିବାକୁ ତାଲିବାନ ନିର୍ଦ୍ଦେଶ ଦେଇଛି । ବିଭିନ୍ନ ଅପରାଧ ପାଇଁ ଇସ୍ଲାମରେ ଥିବା ନିର୍ଦ୍ଦେଶ ଅନୁସାରେ ଦଣ୍ଡ ଦିଆଯିବ । ସେଗୁଡ଼ିକ ମଧ୍ୟରେ ରହିଛି ସର୍ବସାଧାରଣରେ ମୃତ୍ୟୁଦଣ୍ଡ, ପଥର ଫିଙ୍ଗି ମୃତ୍ୟୁଦଣ୍ଡ,ଚାବୁକ ପ୍ରହାର, ଚୋରମାନଙ୍କ ଅଙ୍ଗଛେଦନ ଇତ୍ୟାଦି ।
Sambad is now on WhatsApp
Join and get latest news updates delivered to you via WhatsApp
ଏକ ଟ୍ୱିଟ୍ କରି ତାଲିବାନର ମୁଖପାତ୍ର ଜାବିହୁଲ୍ଲା ମୁଜାହିଦ ଉଲ୍ଲେଖ କରିଛନ୍ତି ଯେ ତାଲିବାନର ସର୍ବୋଚ୍ଚ ନେତା ହୈବାତୁଲ୍ଲା ଅଖୁନ୍ଦଜାଦା ଏହି ନିର୍ଦ୍ଦେଶ ଜାରି କରିଛନ୍ତି । କିଛିଦିନ ପୂର୍ବେ ସେ କିଛି ବିଚାରପତିଙ୍କ ସହ ଗୁପ୍ତ ଆଲୋଚନା ପରେ ଏହି ନିର୍ଦ୍ଦେଶ ଦେଇଥିଲେ ।
ଅଖୁନଜାଦାଙ୍କ ନିର୍ଦ୍ଦେଶକୁ ଉଦ୍ଧାର କରି ମୁଜାହିଦ କହିଛନ୍ତି ଯେ, ଚୋର, ଅପରହରଣକାରୀ, ଦେଶଦ୍ରୋହୀ ଓ ଅନ୍ୟ ଅପରାଧୀମାନଙ୍କ ଫାଇଲକୁ ଭଲ ଭାବରେ ପରୀକ୍ଷା କର । ଯେଉଁ ଅପରାଧଗୁଡ଼ିକ ସରିଆ ଆଇନର ସର୍ତ୍ତାବଳୀକୁ ପାଳନ କରୁଛି, ତାହାକୁ ସେହି ଅନୁସାରେ ଦଣ୍ଡବିଧାନ କର । ଏହା ପାଳନ କରିବା ସରିଆ ଆଇନ ଅନୁସାରେ ବାଧ୍ୟତାମୂଳକ ବୋଲି ଅଖୁନଜାଦା ନିର୍ଦ୍ଦେଶ ଦେଇଛନ୍ତି ।
ଏଠାରେ ଉଲ୍ଲେଖଯୋଗ୍ୟ ଯେ, ଗତ ୨୦୨୧ ଅଗଷ୍ଟ ମାସରେ ଆଫଗାନିସ୍ତାନରେ ତାଲିବାନ ସରକାର ଆସିବା ପରେ ଅଖୁନଜାଦାକୁ ସର୍ବୋଚ୍ଚ ନେତା ନିଯୁକ୍ତ କରାଯାଇଥିଲା । ତେବେ ସେବେଠାରୁ ଅଖୁନଜାଦାର କୌଣସି ଫଟୋ ଓ ଭିଡିଓ ସର୍ବସାଧାରଣରେ ପ୍ରକାଶ ପାଇନାହିଁ । ସେ ନିଜେ କୌଣସି ସର୍ବସାଧାରଣ କାର୍ଯ୍ୟକ୍ରମରେ ଯୋଗ ଦିଅନ୍ତି ନାହିଁ ।