କିଏ ହେବ ହିମାଚଳ ମୁଖ୍ୟମନ୍ତ୍ରୀ ? କଂଗ୍ରେସରେ ଟଣାଓଟରା ଜାରି
ସିମଲା : ହିମାଚଳ ପ୍ରଦେଶ ନିର୍ବାଚନ ଫଳାଫଳ ପ୍ରକାଶ ପାଇବାର ୨ ଦିନି ବିତିଯାଇଥିଲେ ବି କିଏ ମୁଖ୍ୟମନ୍ତ୍ରୀ ହେବ ତାହା ସ୍ଥିର ହୋଇପାରୁନାହିଁ । ବେଳକୁ ବେଳ ବିଭିନ୍ନ ଗୋଷ୍ଠୀ ମଧ୍ୟରେ ବିବାଦ ବଢୁଥିବାରୁ କେନ୍ଦ୍ରୀୟ ହାଇକମାଣ୍ଡ୍ ମଧ୍ୟ ଅକଳରେ ପଡ଼ିଯାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଦଳର ଅଧିକାଂଶ ବିଧାୟକ ସୁଖଓ୍ବିନ୍ଦର ସିଂ ସୁଖୁଙ୍କୁ ସମର୍ଥନ କରୁଥିବାବେଳେ ତାଙ୍କୁ ମୁଖ୍ୟମନ୍ତ୍ରୀ କରାଯିବାକୁ ବିରୋଧ କରୁଛନ୍ତି ହିମାଚଳ ପ୍ରଦେଶ କଂଗ୍ରେସ ସଭାପତି ପ୍ରତିଭା ସିଂ । ସେ ତିନି କେନ୍ଦ୍ରୀୟ ପ୍ରତିନିଧି ଭୂପେଶ ସିଂ ବଘେଲ, , ହରିୟାନାର ପୂର୍ବତନ ମୁଖ୍ୟମନ୍ତ୍ରୀ ଭୂପନ୍ଦର ସିଂ ହୁଦା ଓ ରାଜୀବ ଶୁକ୍ଳାଙ୍କୁ ନିଜର ଅସନ୍ତୋଷ ଜଣାଇଦେଇଛନ୍ତି ।
ଗଣମାଧ୍ୟମ ସୁତ୍ରରୁ ଜଣାପଡ଼ିଛି ପ୍ରତିଭା ମୁଖ୍ୟମନ୍ତ୍ରୀ ପଦ ପାଇଁ ଦାବି କରୁଛନ୍ତି । କିନ୍ତୁ ଏଥିପାଇଁ ଯଦି କେନ୍ଦ୍ରୀୟ ନେତୃତ୍ବ ରାଜି ନ ହୁଅନ୍ତି, ତେବେ ତାଙ୍କ ପୁଅ ବିକ୍ରମାଦିତ୍ୟ ସିଂଙ୍କୁ ଉପମୁଖ୍ୟମନ୍ତ୍ରୀ ପଦ ପାଇଁ ଦାବି କରୁଛନ୍ତି । ଆଉ ଏକ ବିକଳ୍ପ ପାଇଁ ମଧ୍ୟ ପ୍ରତିଭା ଗୋଷ୍ଠୀ ଆଲୋଚନା କରୁଛନ୍ତି । ତାହା ହେଉଛି ସିଏଲପି ନେତା ମୁକେଶ ଅଗ୍ନିହୋତ୍ରୀଙ୍କୁ ମୁଖ୍ୟମନ୍ତ୍ରୀ କରାଯିବାକୁ ପ୍ରସ୍ତାବ ଦିଆଯିବ ।
ଶନିବାର ଅପରାହ୍ଣରେ କଂଗ୍ରେସ ବିଧାୟକ ଦଳ ବୈଠକ ବସିବାର କାର୍ଯ୍ୟକ୍ରମ ରହିଛି । ଏହି ବୈଠକ ପରେ ମୁଖ୍ୟମନ୍ତ୍ରୀଙ୍କ ନାମ ଘୋଷଣା କରାଯିବାର ସମ୍ଭାବନା ରହିଛି । ଏଣୁ ଏହି ବୈଠକ ଉପରେ ସମସ୍ତଙ୍କ ନଜର ରହିଛି ।