ଜୟପୁର: ଆଗକୁ ବିଧାନସଭା ନିର୍ବାଚନ ଥିବାବେଳେ ରାଜସ୍ଥାନ କଂଗ୍ରେସରେ ବିବାଦ ଥମିବାର ନାଁ ନେଉନାହିଁ । ମୁଖ୍ୟମନ୍ତ୍ରୀ ଅଶୋକ ଗେହଲୋଟଙ୍କ ସହ ବିବାଦ ମଧ୍ୟରେ ସଚିନ ପାଇଲଟ୍ ଦଳ ଛାଡ଼ି ଏକ ନୂଆ ଦଳ ଗଢିବାର ସମ୍ଭାବନା ରହିଛି ବୋଲି କୁହାଯାଇଛି । ଏପରିକି ସେ ଆସନ୍ତା ୧୧ ତାରିଖରେ ନିଜ ପିତା ରାଜେଶ ପାଇଲଟଙ୍କ ଶ୍ରାଦ୍ଧ ଦିବସରେ ନିଜର ନୂଆ ଦଳ ଗଠନ ସମ୍ପର୍କରେ ଘୋଷଣା କରିପାରନ୍ତି ।
Sambad is now on WhatsApp
Join and get latest news updates delivered to you via WhatsApp
କେତେକ ଗଣମାଧ୍ୟମ ରିପୋର୍ଟ ଅନୁସାରେ ରାଜନୈତିକ ରଣନୀତିକାର ପ୍ରଶାନ୍ତ କିଶୋରଙ୍କ ପରାମର୍ଶ ଅନୁସାରେ ସଚିନ ନୂଆ ଦଳ ଗଠନ କରିବାକୁ ନିଷ୍ପତ୍ତି ନେଇଛନ୍ତି । କିଛି ଦିନ ତଳେ ସଚିନ କରିଥିବା ପଦଯାତ୍ରା ଓ ସତ୍ୟାଗ୍ରହ ପଛରେ ବି ପ୍ରଶାନ୍ତଙ୍କ ଯୋଜନା ଥିଲା ।
ତେବେ ତାଙ୍କ ନିକଟତମ ସୂତ୍ରରୁ ମିଳିଥିବା ସୂଚନା ଅନୁଯାୟୀ ପାଇଲଟ ଏବେ ବି କଂଗ୍ରେସ ନେତୃତ୍ୱ ତାଙ୍କ ଦାବି ଉପରେ କିପରି ପ୍ରତିକ୍ରିୟା ଦେଉଛନ୍ତି, ତାହାକୁ ଅପେକ୍ଷା କରିଛନ୍ତି । ଏହା ସହିତ ୧୧ ତାରିଖରେ ବଡ଼ ରାଲି ଆୟୋଜନ ବିଷୟକୁ ମଧ୍ୟ ଖଣ୍ଡନ କରାଯାଇଛି । ରାଜେଶ ପାଇଲଟଙ୍କ ନିର୍ବାଚନ ମଣ୍ଡଳୀ ହୋଇଥିବାରୁ ପ୍ରତିବର୍ଷ ଭଳି ଏଥର ମଧ୍ୟ ଦୌସାରେ ଶ୍ରାଦ୍ଧ ବାର୍ଷିକୀ ପାଳନ ପାଇଁ କାର୍ଯ୍ୟକ୍ରମ ହେବ ବୋଲି ସେ କହିଛନ୍ତି । ସଚିନ୍ ପାଇଲଟଙ୍କ ଘନିଷ୍ଠ ତଥା ରାଜ୍ୟ ସରକାରରେ ମନ୍ତ୍ରୀଥିବା ମୁରାରି ଲାଲ୍ ମୀନା ଏହି କାର୍ଯ୍ୟକ୍ରମରେ ନୂଆ ଦଳ ଘୋଷଣା ନେଇ ଚାଲିଥିବା କଳ୍ପନାଜଳ୍ପନାକୁ ଖଣ୍ଡନ କରିଛନ୍ତି ।