ଶାଶ୍ୱତ ଯୋଶୀଙ୍କ ବିରୋଧରେ ସଂଗିନ ଅଭିଯୋଗ
ସୋସିଆଲ ମିଡିଆରେ ଦୁର୍ବ୍ୟବହାର ଅଭିଯୋଗ ଆଣିଲେ ଛାତ୍ରଛାତ୍ରୀ, ବ୍ଲାକମେଲିଂ କରିବା ପାଇଁ ଏପରି କରାଯାଉଛି: ଶାଶ୍ବତ
ପୁରୁଣା ଭୁବନେଶ୍ବର : ଓଡ଼ିଶୀ ନୃତ୍ୟଗୁରୁ ଶାଶ୍ୱତ ଯୋଶୀଙ୍କ ବିରୋଧରେ ସାଂଘାତିକ ଅଭିଯୋଗ। ଦେଶ ବିଦେଶରେ ସୁନାମ ଅର୍ଜନ କରିଥିବା ଶାଶ୍ୱତଙ୍କ ବିରୋଧରେ ସୋସିଆଲ ମିଡିଆରେ ଯୌନ ଶୋଷଣ, ଦୁର୍ବ୍ୟବହାର ଅଭିଯୋଗ ଆଣିଛନ୍ତି ତାଙ୍କ ଛାତ୍ରଛାତ୍ରୀ। ସଙ୍ଗୀତ ରତ୍ନ ପୁରସ୍କାର ସହ ଆମେରିକା, ଫ୍ରାନ୍ସ, ଇଟାଲୀ, ଫିନଲାଣ୍ଡ, ଜାପାନ, ଥାଇଲାଣ୍ଡ ଓ ଅନ୍ୟ ଦେଶଗୁଡ଼ିକରେ ବଡ଼ ବଡ଼ କାର୍ଯ୍ୟକ୍ରମ କରି ବେଶ ଆଦୃତ ହେଉଥିବା ଏହି ନୃତ୍ୟଶିଳ୍ପୀଙ୍କୁ ଏବେ ଛାତ୍ରଛାତ୍ରୀମାନେ ସୋସିଆଲ ମିଡିଆରେ ଘେରିଛନ୍ତି। ଓଡ଼ିଶୀ ନୃତ୍ୟକୁ ଦେଶ ତଥା ଦେଶ ବାହାରେ ଲୋକପ୍ରିୟ କରିଥିବା ଏହି ଓଡ଼ିଶୀ ନୃତ୍ୟଶିଳ୍ପୀଙ୍କ ଯାଦୁକରୀ ପ୍ରଦର୍ଶନ ଯେତିକି ଆକର୍ଷଣୀୟ, ଆଜି ତାଙ୍କ ବିରୋଧରେ ଆସିଥିବା ଅଭିଯୋଗ ସେତିକି ସାଂଘାତିକ।
Sambad is now on WhatsApp
Join and get latest news updates delivered to you via WhatsApp
ନାଚ ଶିଖିବାକୁ ଯାଉଥିବା ଜଣେ ଛାତ୍ର ଆଜି ଗଣମାଧ୍ୟମ ସାମ୍ନାକୁ ଆସି ଶାଶ୍ୱତଙ୍କ ବିରୋଧରେ ଯୌନ ଶୋଷଣ ଅଭିଯୋଗ ଆଣିଛନ୍ତି। ସେ କହିଛନ୍ତି, ଏନେଇ ସେ ପ୍ରଥମେ କିଛି କହିବାକୁ ସାହସ କରିପାରୁ ନଥିଲେ, ସେଥିପାଇଁ ଚୁପ୍ ଥିଲେ। ଗୁରୁ ଦିବସ ଦିନ ଫେସବୁକ୍ରେ ଜଣେ ଛାତ୍ରୀ ମଧ୍ୟ ଶାଶ୍ୱତଙ୍କ ବିଷୟରେ ଅଭିଯୋଗର ଲମ୍ବା ତାଲିକା ରଖିଛନ୍ତି। ଏହାଛଡ଼ା ଏକ ଅଡିଓ କ୍ଲିପ୍ ଭାଇରାଲ କରିଛନ୍ତି। ତାଙ୍କୁ ଶାଶ୍ୱତ ଦୁର୍ବ୍ୟବହାର କରନ୍ତି, ଖରାପ ଭାଷାରେ ଗାଳିଗୁଲଜ କରନ୍ତି ଏବଂ ମାଡ଼ ମଧ୍ୟ ମାରନ୍ତି ବୋଲି ସେ ଅଭିଯୋଗରେ ଦର୍ଶାଇଛନ୍ତି।
ତେବେ ଏ ସଂପର୍କରେ ଶ୍ରୀ ଯୋଶୀ କହିଛନ୍ତି, ତାଙ୍କ ବିରୋଧରେ କିଛି ଛାତ୍ରଛାତ୍ରୀ ଅପପ୍ରଚାର ଚଳାଇଛନ୍ତି। ତାଙ୍କୁ ବ୍ଲାକ୍ମେଲିଂ କରିବା ପାଇଁ ଏପରି କରାଯାଉଛି। ଏ ସମ୍ପର୍କରେ ସେ ଶ୍ରୀଲିଙ୍ଗରାଜ ଥାନାରେ ଜଣାଇଛନ୍ତି। ସେ ଓଡ଼ିଶା ଫେରିବା ପରେ ଆଇନର ଆଶ୍ରୟ ନେବେ। ଶାଶ୍ୱତଙ୍କ ପତ୍ନୀ ସୁଚରିତା ରଥ ମୁହଁ ଖୋଲିଛନ୍ତି। ସେ କହିଛନ୍ତି, ଏସବୁ ମିଛ ଅଭିଯୋଗ, ବିଦେଶ ଟ୍ରିପରେ ଏମାନଙ୍କ ନିଆନଯିବାରୁ ଏଭଳି ଅଭିଯୋଗ ଆଣିଛନ୍ତି।