ପୁରୁଣା ଭୁବନେଶ୍ୱର: କରୋନା କଟକଣା କୋହଳ ହେବା ପରଠାରୁ ବିଭିନ୍ନ ବର୍ଗର ଶ୍ରମିକ, ବେପାରୀ ଓ ବ୍ୟବସାୟିକ ପ୍ରତିଷ୍ଠାନ କିଛି କିଛି ରୋଜଗାର ପାଇଲେଣି। ବହୁ ଘରୋଇ ସଂସ୍ଥାର କିଛି କିଛି ଛଟେଇ କର୍ମଚାରୀ ପୁଣି ନିଯୁକ୍ତି ପାଇଲେଣି। ଆର୍ଥିକ ସ୍ଥିତି ବିଗିଡ଼ି ଯାଇଥିବା ବହୁ ପରିବାରରେ ଧୀରେ ଧୀରେ ସ୍ବାଭାବିକ ଅବସ୍ଥା ଆସୁଥିବା ଦେଖାଗଲାଣି। କିନ୍ତୁ ଏବେ ବି ବହୁ ବର୍ଗର ଶ୍ରମିକ ଓ କଳାକାର ଭୋକ ଉପାସରେ ଦିନ କାଟିବାକୁ ବାଧ୍ୟ ହେଉଛନ୍ତି। ସେମାନଙ୍କ ଉପରୁ କରୋନା ସଂକଟ ଟଳିବା ନାଁ ଧରୁନାହିଁ। ବିଶେଷକରି କଳାକାରମାନେ ବଡ଼ ହନ୍ତସନ୍ତ ହେଉଛନ୍ତି। ସେମିତି ଅବସ୍ଥା ଏବେ ରାବଣ ମୂର୍ତ୍ତି କାରିଗରମାନଙ୍କର।
Sambad is now on WhatsApp
Join and get latest news updates delivered to you via WhatsApp
ଦଶହରା ଦିନ ରାଜଧାନୀରେ ହୁଏ ରାବଣ ପୋଡ଼ି। ତେଣୁ ରାବଣ ତିଆରିରେ ଲାଗିଥାନ୍ତି କାରିଗର। ଏମିତି ଜଣେ କାରିଗର ହେଉଛନ୍ତି ପୁରୁଣା ଭୁବନେଶ୍ୱର ଡାକବଙ୍ଗଳା ଛକ ନିକଟରେ ରହୁଥିବା ରାଜକିଶୋର ମହାପାତ୍ର। ଏଥିରେ ତାଙ୍କ ପୂରା ପରିବାର ନିୟୋଜିତ ହୋଇଥାନ୍ତି। ବିଶେଷକରି ତାଙ୍କ ସ୍ତ୍ରୀ ଶୋଭାମଣୀଙ୍କ ଅବଦାନ ବହୁତ। ରାଜକିଶୋର ଛାଞ୍ଚ ନିର୍ମାଣ କରୁଥିବାବେଳେ ଶୋଭା ରଙ୍ଗଚାଳନାରେ ମାହିର୍। ତାଙ୍କ ପରିବାର ଦୀର୍ଘ ୩୦ ବର୍ଷ ହେଲା ଏହି କାରବାରରେ ଲାଗିଛନ୍ତି। ଏଥିରୁ ପରିବାରର ଗୁଜୁରାଣ କିଛିଟା ମେଣ୍ଟିଯାଏ। ପ୍ରତିବର୍ଷ ଡମଣା ଛକ, ନହରକଣ୍ଟା, କୋରଡ଼କଣ୍ଟା, ବରମୁଣ୍ଡା ଆଦି କମିଟି ପକ୍ଷରୁ ବରାଦ ମିଳେ। ଏହାବାଦ୍ ପୁରୀ ଓ ଜଟଣୀରୁ ମଧ୍ୟ ମୂର୍ତ୍ତି ବରାଦ ହୋଇଥାଏ। କିଛି କିଛି କମିଟି ୪୦ ଫୁଟ୍ରୁ ୪୫ଫୁଟ୍ ପର୍ଯ୍ୟନ୍ତ ଉଚ୍ଚତା ବିଶିଷ୍ଟ ରାବଣ ମୂର୍ତ୍ତି ବରାଦ କରନ୍ତି। ଏହି ରୋଜଗାରରୁ ଦଶହରା ଓ କୁମାରପୂର୍ଣ୍ଣିମା ଖର୍ଚ୍ଚ ପାଇଁ ଟଙ୍କା ଯୋଗାଡ଼ ହୋଇଯାଏ।
ତେବେ ଚଳିତ ବର୍ଷ କରୋନା ଏହି ରୋଜଗାର ଛଡ଼ାଇନେଇଛି। କଟକଣା ପାଇଁ କେଉଁ ପୂଜା କମିଟି ରାବଣ ପୋଡ଼ି କରିବେ ନାହିଁ। ତେଣୁ ହାତବାନ୍ଧି ବସିଛନ୍ତି ରାଜକିଶୋରଙ୍କ ପରିବାର। ଶୋଭାଙ୍କ କହିବା ଅନୁଯାୟୀ ଏହି କାମରେ ଖର୍ଚ୍ଚ ଅଧିକ ଲାଭ କମ୍। ବାଉଁଶ, ସୁତୁଲି, ରଙ୍ଗ ଆଦିରେ ବହୁ ଖର୍ଚ୍ଚ କରିବାକୁ ପଡ଼େ। ତେବେ ଲାଭ କମ୍ ହେଲେ ବି ବର୍ଷକର ନିୟମିତ ଏହି ବେପାର ପାଇଁ ତାଙ୍କ ପରିବାରକୁ କିଛି ପଇସା ମିଳିଯାଏ। ପରିବାରରୁ ସମସ୍ତେ ଏଥିରେ ଲାଗିପଡ଼ନ୍ତି। ଦି’ପଇସା ସହ କାମରୁ ଆନନ୍ଦ ମିଳିବା ମଧ୍ୟ ବଡ଼ କଥା। ତେବେ ଚଳିତ ବର୍ଷ କରୋନା ଏହି ରୋଜଗାର ଛଡ଼ାଇ ନେଇଥିବାରୁ ପରିବାର ପ୍ରତିପୋଷଣ ଚିନ୍ତା ବଢ଼ି ଯାଇଛି ବୋଲି ବଡ଼ ଦୁଃଖରେ ଶୋଭା କହିଛନ୍ତି।