ଭୁବନେଶ୍ୱର : ନାଟକରେ ଜର୍ମାନୀ କଳାକାର ଦେଇଛନ୍ତି ପରିବେଶ ସୁରକ୍ଷାର ବାର୍ତା। କିପରି ପରିବେଶକୁ ରକ୍ଷା କରାଯାଇ ପୃଥିବୀକୁ ସମ୍ପୂର୍ଣ୍ଣ ସୁରକ୍ଷିତ ରଖାଯାଇପାରିବ ତାକୁ ନେଇ ଏହି ନାଟକ ପରିବେଷିତ ହୋଇଥିଲା ସ୍ଥାନୀୟ ରବୀନ୍ଦ୍ର ମଣ୍ଡପରେ। ଥିଏଟର୍ ଓ ନୃତ୍ୟ ପ୍ରଯୋଜନା କରୁଥିବା ଜର୍ମାନୀର କୋଲୋଗ୍ନି ଗ୍ରୁପ୍ ଏଭଳି ଅଭିନବ ପ୍ରୟାସ କରିଥିଲେ। ଯାହା ଉପସ୍ଥିତ ଛାତ୍ରଛାତ୍ରୀ ଓ ଦର୍ଶକଙ୍କୁ ଅଭିଭୂତ କରିଥିଲା। ଏକ ଘଣ୍ଟା ଅବଧିର ଏହି ନାଟକରୁ ପିଲାମାନେ ଅନେକ ଶିକ୍ଷା ଲାଭ କରିଥିଲେ। ନାଟକର ନାମ ଥିଲା ‘ଟ୍ରାସ୍ଡେ’। ଏହା ସମସ୍ତଙ୍କ ପାଇଁ ପ୍ରବେଶ ମୁକ୍ତ ଥିଲା।
Sambad is now on WhatsApp
Join and get latest news updates delivered to you via WhatsApp
ଗୋଇଥି ଅନୁଷ୍ଠାନ, ମ୍ୟାକ୍ସ ମୁଲାର୍ ଭବନ କୋଲକାତାର ସହଯୋଗରେ ଏ କାର୍ଯ୍ୟକ୍ରମ ଆୟୋଜିତ ହୋଇଥିଲା। ମୁଖ୍ୟତଃ ଗୋଇଥି ଅନୁଷ୍ଠାନ ବିଶ୍ୱରେ ୧୫୯ରୁ ଊର୍ଦ୍ଧ୍ୱ ଅନୁଷ୍ଠାନରେ ଜର୍ମାନୀ ଭାଷା ଶିକ୍ଷାଦାନ କରୁଛି। ବିଶେଷକରି ନାଟକ ମାଧ୍ୟମରେ ଜର୍ମାନୀ ଓ ଭାରତ ମଧ୍ୟରେ ସାଂସ୍କୃତିକ ଭାବବିନିମୟ କାର୍ଯ୍ୟକ୍ରମ ଜାରି ରଖିଛି। ସେହି ଅନୁସାରେ ଏଠାରେ ପରିବେଶ ସଚେତନତାର ବାର୍ତା ନେଇ ଏହି ନାଟକ ଆଜି ସଂଧ୍ୟାରେ ପ୍ରଦର୍ଶିତ ହୋଇଥିଲା। ଯାହାକୁ କେନ୍ଦ୍ରୀୟ ବିଦ୍ୟାଳୟ ଓ ଅନ୍ୟାନ୍ୟ ବିଦ୍ୟାଳୟର ଛାତ୍ରଛାତ୍ରୀ ଉପଭୋଗ କରିଥିଲେ। କାର୍ଯ୍ୟକ୍ରମରେ ଅତିଥି ଭାବେ ସଂସ୍କୃତି ବିଭାଗ ଶାସନ ସଚିବ ମନୋରଞ୍ଜନ ପାଣିଗ୍ରାହୀ ଯୋଗଦେଇଥିଲେ।