ଚେଓଙ୍ଗଜୁ (ଦକ୍ଷିଣ କୋରିଆ) : ଏସୀୟ ସ୍କ୍ବାସ୍ ଚାମ୍ପିଅନ୍ସିପ୍ରେ ଭାରତୀୟ ପୁରୁଷ ଦଳକୁ ପ୍ରଥମ ଥର ପାଇଁ ସ୍ବର୍ଣ୍ଣ ପଦକ ମିଳିଛି। ସୌରଭ ଘୋଷାଲଙ୍କ ନେତୃତ୍ବାଧୀନ ଭାରତୀୟ ଦଳ ଶୁକ୍ରବାର ଫାଇନାଲ୍ରେ କୁଏତ୍କୁ ୨-୦ରେ ହରାଇ ଏହି ସଫଳତା ହାସଲ କରିଥିଲା। ପ୍ରଥମ ରାଉଣ୍ଡରେ ରମିତ ଟଣ୍ଡନ୍ ପ୍ରତିପକ୍ଷର ଅଲି ଆରାମେଜିଙ୍କୁ ୧୧-୫, ୧୧-୭ ଓ ୧୧-୪ରେ ସିଧାସଳଖ ହରାଇ ଭାରତକୁ ଅଗ୍ରଣୀ ଦେଇଥିଲେ। ପରେ ଦ୍ବିତୀୟ ରାଉଣ୍ଡରେ ସୌରଭ ୧୧-୯, ୧୧-୨, ୧୧-୩ରେ ଅମର ଅଲ୍ତାମିମିଙ୍କୁ ପରାସ୍ତ କରି ଭାରତକୁ ସିଧାସଳଖ ଜିତାଇଥିଲେ। ତେଣୁ ଅଭୟ ସିଂହ ଓ ଫଲା ମହମ୍ମଦଙ୍କ ମଧ୍ୟରେ ଖେଳାଯିବାକୁ ଥିବା ତୃତୀୟ ମ୍ୟାଚ୍ର ଆବଶ୍ୟକତା ପଡ଼ିନଥିଲା।
Sambad is now on WhatsApp
Join and get latest news updates delivered to you via WhatsApp
ପୂର୍ବରୁ ପୁଲ୍ ଏ’ରେ କାତାର, ପାକିସ୍ତାନ, କୁଏତ୍, ଦକ୍ଷିଣ କୋରିଆ ଓ ଚାଇନିଜ୍ ତାଇପେଇ ବିପକ୍ଷରେ ଭାରତ ୩-୦ ଲେଖାଏଁ ସ୍କୋରରେ ବିଜୟୀ ହୋଇ ଶୀର୍ଷରେ ରହିଥିଲା। ସେମିଫାଇନାଲ୍ରେ ମାଲେସିଆକୁ ୨-୧ରେ ହରାଇ ଫାଇନାଲ୍ରେ ପ୍ରବେଶ କରିଥିଲା। ଅନ୍ୟପକ୍ଷରେ ଭାରତୀୟ ମହିଳା ଦଳ ସେମିଫାଇନାଲ୍ରେ ମାଲେସିଆଠୁ ୧-୨ରେ ପରାସ୍ତ ହୋଇ କାଂସ୍ୟରେ ସନ୍ତୁଷ୍ଟ ରହିଛନ୍ତି। ଲିଗ୍ ପର୍ଯ୍ୟାୟରେ ପୁଲ୍ ବି’ରେ ଭାରତୀୟ ଦଳ ଇରାନ୍ ଓ ସିଙ୍ଗାପୁରକୁ ୩-୦ରେ ହରାଇଥିଲା ବେଳେ ହଂକଂଠୁ ୦-୩ରେ ପରାଜିତ ହୋଇଥିଲା। ପୁଲ୍ର ଦ୍ବିତୀୟ ସ୍ଥାନରେ ରହି ଭାରତୀୟ ମହିଳା ସେମିଫାଇନାଲ୍ରେ ପ୍ରବେଶ କରିଥିଲେ।