ଚିଲିକା ମାଛ ମାର୍କେଟ ୭ ଦିନ ଲାଗି ସଟଡାଉନ, ୧୨ ହଜାର ମତ୍ସ୍ୟଜୀବୀ ପ୍ରଭାବିତ
କରୋନା ଭାଇରସ ପାଇଁ ସଟଡାଉନ ଘୋଷଣା କଲେ ଖୋର୍ଦ୍ଧା ଜିଲ୍ଲାପାଳ
ବାଲୁଗାଁ: ଚିଲିକା କୂଳ ମାଛ ମାର୍କେଟକୁ ୭ ଦିନ ପାଇଁ ସଟଡାଉନ ଘୋଷଣା କରାଯାଇଛି । ଖୋର୍ଦ୍ଧା ଜିଲ୍ଲାପାଳ ସୀତାଂଶୁ ଶେଖର ରାଉତ ନିଜେ ଚିଲିକା କୂଳ ମାଛ ମାର୍କେଟକୁ ପହଂଚି ଏଠାରେ କଟକଣା ଲାଗୁ କରିଥିବା ଜଣାଯାଇଛି । ଚିଳିକା କୂଳ ମାଛ ମାର୍କେଟ ସଟଡାଉନ ଘୋଷଣା ହେବା ପରେ ଏହି ଅଂଚଳରେ ଥିବା ପ୍ରାୟ ୧୨ ହଜାର ମତ୍ସ୍ୟଜୀବୀଙ୍କ ଜୀବନ ପ୍ରଭାବିତ ହୋଇଛି । ଅନ୍ୟପଟରେ ଚିଲିକାରୁ ମାଛ ରପ୍ତାନୀ ବନ୍ଦ ହୋଇଯିବା ପରେ ରାଜ୍ୟର ବିଭିନ୍ନ ଅଂଚଳରେ ମାଛ ଦର ବୃଦ୍ଧି ହେବାର ଆଶଙ୍କା ରହିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଗତ ଶୁକ୍ରବାର ଦିନ ବାଲୁଗାଁ ଅଂଚଳରେ ଜଣେ ୫୫ ବର୍ଷିଅ ମାଛ ବ୍ୟବସାୟୀଙ୍କ ଦେହରେ କରୋନା ପଜିଟିଭ ଥିବା ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ମିଳିବା ଫଳରେ ତାଙ୍କୁ କୋଭିଡ-୧୯ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ଏହି ଘଟଣା ବାଲୁଗାଁ ଅଂଚଳରେ ପ୍ରଘଟ ହେବା ମାତ୍ରେ ଏକ ଭୟର ବାତାବରଣ ସୃଷ୍ଟି ହୋଇଥିଲା । ସଂପୃକ୍ତ ବ୍ୟକ୍ତି ଜଣକ ସ୍ଥାନୀୟ ଅଂଚଳର ବହୁ ବ୍ୟକ୍ତିଙ୍କ ସହ ମିଳାମିଶା କରିବା ସହିତ ବ୍ୟବସାୟ ମଧ୍ୟ କରିଆସିଥିଲେ ।
ଗଂଜାମରୁ ଆସିଥିବା ମାଛ ବ୍ୟବସାୟୀମାନେ ଚିଳିକା ଅଂଚଳର ସଂପୃକ୍ତ ବ୍ୟବସାୟୀଙ୍କ ସଂସ୍ପର୍ଶରେ ଆସିଥିଲେ । ଫଳରେ ତାଙ୍କର ଦେହରେ କରୋନା ଭାଇସର ମିଳିଥିଲା । ଶନିବାର ଖୋର୍ଦ୍ଧା ଜିଲ୍ଲାପାଳ ସୀତାଂଶୁ ଶେଖର ରାଉତ, ଖୋର୍ଦ୍ଧା ଉପଜିଲ୍ଲାପାଳ ଅଶୋକ କୁମାର ବେଉରା, ଖୋର୍ଦ୍ଧା ଏସପି ଅଜୟ ପ୍ରତାପ ସ୍ୱାଇଁ, ଚିଲିକା ତହସିଲଦାର ପୁନମ ମହାପାତ୍ର, ବାଲୁଗାଁ ଏନଏସି କାର୍ଯ୍ୟନିର୍ବାହୀ ଅଧିକାରୀ ଆକୃତୀ ଗୋଏଙ୍କା ଓ ବାଲୁଗାଁ ଥାନା ଆଇଆଇସି ରମାକାନ୍ତ ମହାଲିକ ଏକ ଆଲୋଚନା ମାଧ୍ୟମରେ ଚିଲିକା କୂଳ ମାଛ ବଜାରକୁ ଯାଇ ସଂପୃକ୍ତ ବ୍ୟବସାୟୀଙ୍କ ମାଛ ଗୋଦାମ, ବରଫ କଳକୁ ସିଲ କରିଛନ୍ତି । ଏଥି ସହିତ ଅନ୍ୟ ସମସ୍ତ ଗୋଦାମ ଅଂଚଳକୁ ସଟଡାଉନ କରିଥିବା ଘୋଷଣା କରିଛନ୍ତି ।
ସଟଡାଉନ ଘୋଷଣା ହେବା ପରେ ବାଲୁଗାଁ ଦମକଳ ବିଭାଗ ପକ୍ଷରୁ ଏହି ଅଂଚଳକୁ ସାଇନାଇଜ କରିବା ସହ ଚଳାଚଳରେ କଟକଣା କରିଥିବା ଲେଖାଯାଇଛି । ଏହା ଫଳରେ ବାଲୁଗାଁ ପୁଲିସ ପକ୍ଷରୁ ଏହି ସଟଡାଉନ ଅଂଚଳରେ ପୋର୍ସ ମୁତୟନ କରାଯାଇଥିବା ପରିଲକ୍ଷିତ ହୋଇଛି ।ଏହି ସମୟ ମଧ୍ୟରେ ବାହାରୁ ଆସୁଥିବା ସମସ୍ତ ମାଛ ବୋପାରୀଙ୍କୁ ଓ ଆନ୍ଧ୍ର ଓ କୋଲକାତାରୁ ଆସୁଥିବା ମାଛଗାଡ଼ିଗୁଡ଼ିକୁ ନଆସିବା ପାଇଁ ବାରଣ କରାଯାଇଛି ।
୧୨ ହଜାର ମତ୍ସଜୀବୀଙ୍କ ପାଇଁ ଚିଲିକା ହେଉଛି ଭାତହାଣ୍ଡି
୧୨୫ଟି ମତ୍ସଜୀବୀ ଗାଁର ପ୍ରାୟ ୧୨ ହଜାର ମତ୍ସ୍ୟଜୀବୀ ଚିଲିକା ନିଜ ଭାତହାଣ୍ଡି ରୂପେ ମାନିଛନ୍ତି । ଏଠାରେ ମାଛ ମାର୍କେଟ ସଟଡାଉନ ହୋଇଯିବା ପରେ ମତ୍ସଜୀବୀ ପରିବାର ବଡ଼ ଦୁଃଖକଷ୍ଟରେ ଚଳିବେ । ଆନ୍ଧ୍ର ପ୍ରଦେଶରୁ ବେନାମୀ ଚିଙ୍ଗୁଡ଼ି ଓ କୋଲକାତାରୁ ମଧୁର ମାଛ ଆଣି ଚିଲିକା ମାଛ ଦର୍ଶାଇ ବ୍ୟବସାୟୀମାନେ ବିକୁଥିବା ବାରମ୍ବାର ଅଭିଯୋଗ ହୋଇଆସୁଥିଲେ ମଧ୍ୟ ବିଭାଗୀୟ କର୍ତ୍ତୃପକ୍ଷ ନୀରବଦ୍ରଷ୍ଟା ସାଜିଥିବା ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।