ଧୀରେ ଧୀରେ କମୁଛି ଅଣ୍ଡା ଦର
ଓଡ଼ିଶାରେ ଟ.୬କୁ କମିଲା, ଆହୁରି କମିବା ସମ୍ଭାବନା
ଅଣ୍ଡା ପ୍ରେମୀମାନଙ୍କ ପାଇଁ ଏକ ଖୁସି ଖବର । ବେଶ କିଛି ଦିନ ମହଙ୍ଗା ରହିବା ପରେ ଦେଶରେ ଅଣ୍ଡା ଦର ଧୀରେ ଧୀରେ କମିବା ଆରମ୍ଭ କରିଛି । କିଛିଦିନ ତଳେ ଓଡ଼ିଶା ଓ ଅନ୍ୟ ରାଜ୍ୟଗୁଡିକରେ ଅଣ୍ଡାର ଖୁଚୁରା ମୂଲ୍ୟ ୭ ଟଙ୍କା ଟପିଯାଇଥିବାବେଳେ ଏବେ ତାହା କମିଛି । ଓଡ଼ିଶା ସମେତ ଉତ୍ତର ଭାରତରେ ଅଣ୍ଡା ଦର ଏବେ ୬ଟଙ୍କାକୁ ଖସିଥିବାବେଳେ ଦକ୍ଷିଣ ଭାରତରେ ଏହା ୫ଟଙ୍କାକୁ ଖସିଆସିଛି । ଏହା ଫଳରେ ସାଧାରଣ ଖାଉଟି ଆଶ୍ୱସ୍ତ ହୋଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
କୁକୁଡ଼ା ଫାର୍ମରେ ଅଣ୍ଡା ଦର ଗତ କିଛି ସପ୍ତାହ ହେଲା ଗୋଟା ପିଛା ୫.୫୦ ଟଙ୍କା କୁ ବୃଦ୍ଧି ପାଇଥିବାବେଳେ ଏବେ ତାହା ୪.୧୫ ଟଙ୍କାକୁ ହ୍ରାସ ପାଇଛି ।
ଭାରତରେ ଦିନକୁ ପ୍ରାୟ ୨୫ କୋଟି ଅଣ୍ଡା ଉତ୍ପାଦନ ହୁଏ । ଏହାର ପ୍ରମୁଖ ଭାଗ ଦକ୍ଷିଣ ଭାରତରୁ ଆସିଥାଏ । ତାମିଲନାଡୁ ଓ ଆନ୍ଧ୍ରପ୍ରଦେଶ ଦେଶର ପ୍ରମୁଖ ଅଣ୍ଡା ଉତ୍ପାଦନକାରୀ ରାଜ୍ୟ । ଅଣ୍ଡା ପାଇଁ ଓଡ଼ିଶା ପଡୋଶୀ ଆନ୍ଧ୍ର ପ୍ରଦେଶ ଉପରେ ନିର୍ଭର କରେ । ତେବେ ତାମିଲନାଡୁର ନମକ୍କଲ ସାରା ଦେଶରେ ଅଣ୍ଡା ବ୍ୟବସାୟର କେନ୍ଦ୍ରସ୍ଥଳୀ । ଏଠାରେ ଏବେ ଦିନକୁ ପ୍ରାୟ ୩ କୋଟି ଅଣ୍ଡା ଉତ୍ପାଦନ ହେଉଛି । ତେବେ ଗତ ଆର୍ଥିକ ବର୍ଷରେ ବାର୍ଡଫ୍ଲୁ ଓ ଆଉ କେତେକ କାରଣ ଯୋଗୁଁ କୁକୁଡା ଚାଷୀମାନେ ବିପୁଳ କ୍ଷତି ସହିଥିଲେ । ଏହା ଯୋଗୁଁ ଦେଶରେ ଅଣ୍ଡା ଉତ୍ପାଦନ ହ୍ରାସ ପାଇଥିଲା ।
ଏହା ଫଳରେ ଦେଶରେ ଅଣ୍ଡାଦର ଚଢା ରହୁଛି । କିନ୍ତୁ ଏବେ ଅଣ୍ଡା ଉତ୍ପାଦନ ବୃଦ୍ଧି ପାଉଥିବାରୁ ଦର କମିବା ଆରମ୍ଭ କରିଛି । ତେବେ ନିକଟ ଅତୀତରେ ଅଣ୍ଡା ମହଙ୍ଗା ହେବା ଯୋଗୁଁ ଅଣ୍ଡା ଚାହିଦା ହ୍ରାସ ପାଇଥିଲା । କିନ୍ତୁ ଆଗକୁ ଖ୍ରୀଷ୍ଟମାସ ଓ ନୂଆ ବର୍ଷ ଥିବାରୁ ଚାହିଦା ବି ବଢିବ ବୋଲି ଭାରତୀୟ ପୋଲଟ୍ରି ଫେଡେରେସନର ସଭାପତି ରମେଶ କ୍ଷତ୍ରି କହିଛନ୍ତି । ଅଣ୍ଡା ଉତ୍ପାଦନ ବୃଦ୍ଧି ପାଇଥିବାରୁ ସରକାର ମଧ୍ୟ ଅଣ୍ଡା ଉପରେ ଲାଗୁ କରିଥିବା ରପ୍ତାନି କଟକଣା ହଟାଇ ନେଇଛନ୍ତି । ଉପସାଗରୀୟ ଦେଶ ବିଶେଷକରି ଓମାନକୁ ଭାରତ ବିପୁଳ ଅଣ୍ଡା ରପ୍ତାନି କରେ ।