ଚାନ୍ଦବାଲି: କରୋନା କାଳରେ ମାଛ କରିଦେଲା ଲକ୍ଷପତି । ଚାନ୍ଦବାଲିରୁ ଆସିଛି ଏପରି ଖବର । ଯାହାକୁ ନେଇ ଚାନ୍ଦବାଲି ଅଂଚଳରେ ଚର୍ଚା ଜୋର ଧରିଛି । ମାଛ ଗୋଟିଏ, ଦାମ୍ ତାହାର ୧ଲକ୍ଷ ୭୬ ହଜାର ଟଙ୍କା । ଆଗରୁ ହୁଏତ ମାଛର ଏପରି ଦାମ୍ ଆପଣ କେବେ ଶୁଣି ନଥାଇପାରନ୍ତି । ଏପରି ଦର ଶୁଣିଲେ ଯେ କେହି ବି ଆଶ୍ଚର୍ଯ୍ୟ ହୋଇଯିବ । ଏହି ମାଛର ନାମ ତେଲିଆ ମାଛ । ଏ ଦୃଶ୍ୟ ହେଉଛି ଚାନ୍ଦବାଲି ବ୍ଲକ ଚନ୍ଦିନୀପାଳ କଣ୍ଟାରେ ନିଲାମ ଡ଼କା ଯାଉଥିବା ମାଛର ।
Sambad is now on WhatsApp
Join and get latest news updates delivered to you via WhatsApp
ଆଜି ଚାନ୍ଦବାଲିର ଚନ୍ଦିନୀପାଳ କଣ୍ଟାରେ ଏପରି ଏକ ବିଶାଳ ମାଛର ନିଲାମୀ କରାଯାଇଥିଲା। ନିଲାମଧାରୀଙ୍କର ମାଛ ନେବା ପାଇଁ ଭିଡ଼ ଲାଗିଥିବା ଦେଖିବାକୁ ମିଳିଥିଲା । କଣ୍ଟା ଥିବା ମାଛର ଦର ୬ହଜାରରୁ ବଢ଼ିବଢ଼ି ୮ହଜାର ପର୍ଯ୍ୟନ୍ତ ଯାଇଥିଲା । ଶେଷରେ ଜଣେ ନିଲାମଧାରୀ ଏହି ମାଛକୁ ବମ୍ବେର ଏକ ମେଡ଼ିସିନ କମ୍ପାନିକୁ କେଜି ପ୍ରତି ୮ହଜାର ଟଙ୍କା ଓ ୨୨କେଜିର ଏହି ବିରାଟ ମାଛକୁ ୧ଲକ୍ଷ ୭୬ହଜାର ଟଙ୍କାରେ ବିକ୍ରି କରିଥିବା ଜଣାପଡ଼ିଛି ।
ସୂଚନା ମୁତାବକ, ଗତ ଦୁଇ ଦିନ ଧରି ଲଘୁଚାପ ଜନିତ ବର୍ଷା ଲାଗିରହିଥିବା ବେଳେ ତାଳଚୁଆ ଅଞ୍ଚଳର ଜଣେ ଧୀବର ଏହି ମାଛକୁ ଗଭୀର ସମୁଦ୍ର ମଧ୍ୟରେ ଧରିଥିଲେ । ମାଛ ଧରିବା ପରେ ବିକ୍ରି ପାଇଁ କରୋନା କଟକଣାଥିବାରୁ କୋଲକାତା ଯାଇନପାରି ଚାନ୍ଦବାଲି ଚନ୍ଦିନୀପାଳ ଅଞ୍ଚଳକୁ ଚାଲିଆସିଥିଲେ । ଏବଂ ନନ୍ଦମଣ୍ଡଳ ନାମକ ଜଣେ କଣ୍ଟା ମାଲିକ କଟାରେ ଏହି ମାଛର ନିଲାମ ଡ଼କାଯାଇଥିଲା । ପୂର୍ବରୁ ସମାନ ପ୍ରକାରର ଦୁଇଟି ମାଛକୁ କେଜି ପିଛା ୬ ହଜାର ଟଙ୍କାରେ ବିକ୍ରି କରାଯାଇଥିଲା । ତେଲିଆ ମାଛର କେଜି ପିଛା ୮ ହଜାର ଟଙ୍କା ଦାମ୍ ଆଗରୁ କେବେ ଯାଇନଥିଲା ।