ଲଘୁଚାପ ଦୁର୍ବଳ : ଦୀପାବଳି ବେଳକୁ ପାଗ ଶୁଖିଲା ରହିବ, ବାତ୍ୟା କିମ୍ବା ବନ୍ୟା ସମ୍ଭାବନା ନାହିଁ
ଭୁବନେଶ୍ବର: ଦୁଇ ଦିନର ଲଘୁଚାପର ଲଗାଣ ବର୍ଷା ପରେ ଆସିଛି ଆଶ୍ୱସ୍ତିର ଖବର । ବଙ୍ଗୋପସାଗରରେ ସୃଷ୍ଟ ଲଘୁଚାପ ଦୁର୍ବଳ ହୋଇଛି । ଫଳରେ ବର୍ଷା ଧୀରେ ଧୀରେ କମିବ । ଆସନ୍ତାକାଲି ଠାରୁ ପାଗରେ ଆସିଯିବ ସୁଧାର । ତେବେ କୌଣସି ଜିଲ୍ଲାକୁ ରେଡ୍ ୱାର୍ଣ୍ଣିଂ ନ ଥିବା ସ୍ପଷ୍ଟ କରିଛି ଆଂଚଳିକ ପାଣିପାଗ ବିଭାଗ । ତେବେ ରାଜ୍ୟର ଉତ୍ତର ଓ ଅଭ୍ୟନ୍ତରୀଣ ଓଡ଼ିଶାରେ ବର୍ଷା ଲାଗି ରହିବ । ଦୀପାବଳି ବେଳକୁ ପାଗ ଶୁଖିଲା ରହିବ । ମତ୍ସ୍ୟଜୀବୀଙ୍କ ପାଇଁ କୌଣସି ସତର୍କ ସୂଚନା ନାହିଁ । ଏହା ସହିତ ବାତ୍ୟା ନେଇ କୌଣସି ସୂଚନା ନଥିବା ସ୍ପଷ୍ଟ କରିଛି ପାଣିପାଗ ବିଭାଗ। ସୋସିଆଲ୍ ମିଡିଆରେ ପ୍ରସରିତ ହେଉଥିବା ବାତ୍ୟା ଖବର କେବଳ ଗୁଜବ ବୋଲି ସ୍ପଷ୍ଟ କରିଛି ଆଂଚଳିକ ପାଣିପାଗ ବିଭାଗ ।
Sambad is now on WhatsApp
Join and get latest news updates delivered to you via WhatsApp
ଆଜି ସ୍ବତନ୍ତ୍ର ରିଲିଫ କମିସନର ପ୍ରଦୀପ ଜେନା ଏକ ସାମ୍ବାଦିକ ସମ୍ମିଳନୀ କରି ନିକଟରେ କୌଣସି ବାତ୍ୟା ଆସିବାର ନାହିଁ ବୋଲି ସ୍ପଷ୍ଯ କରିଛନ୍ତି। ରାଜ୍ୟର କୌଣସି ସ୍ଥାନରେ ବି ବନ୍ୟା ପରିସ୍ଥିତି ନାହିଁ, କେବଳ ଜଳକା ଓ କାଣୀ ନଦୀରେ ବିପଦ ସଙ୍କେତ ଉପରେ ଜଳସ୍ତର ରହିଛି। ସେ ଗଜପତିରେ ଘର ଭାଙ୍ଗିଥିବା ଲୋକଙ୍କୁ ସହାୟତା ଦିଆଯିବ ଓ କେନ୍ଦୁଝର ହରିଚନ୍ଦନପୁରରେ କାନ୍ଥ ପଡ଼ି ମୃତ୍ୟୁ ହୋଇଥିବା ବ୍ୟକ୍ତିଙ୍କୁ ଆର୍ଥିକ ସହାୟତା ଦିଆଯିବ ବୋଲି ଘୋଷଣା କରିଥିଲେ।
ସେପଟେ, ଲଗାଣ ବର୍ଷା ଲାଗି ରହିବା ଯୋଗୁଁ ଆଜି ୧୦ଟି ଜିଲ୍ଲାର ସମସ୍ତ ସ୍କୁଲ ଓ ଅଙ୍ଗନବାଡି କେନ୍ଦ୍ରକୁ ଛୁଟି ଘୋଷଣା କରାଯାଇଛି । ବର୍ଷା ଯୋଗୁଁ କେନ୍ଦ୍ରାପଡା, ଜଗତସିଂହପୁର, କେନ୍ଦୁଝର, ଭଦ୍ରକ, ବାଲେଶ୍ୱର, ଢ଼େଙ୍କାନାଳ, ଗଞ୍ଜାମ, ପୁରୀ, ଖୋର୍ଦ୍ଧା ଓ ଯାଜପୁର ଜିଲ୍ଳାର ସମସ୍ତ ବିଦ୍ୟାଳୟ ଓ ଅଙ୍ଗନବାଡି କେନ୍ଦ୍ରଗୁଡିକ ଛୁଟି ରହିବ ବୋଲି ଏହି ସବୁ ଜିଲ୍ଲାର ଜିଲ୍ଲାପାଳମାନେ ଘୋଷଣା କରିଛନ୍ତି । ଗତକାଲି ପ୍ରବଳ ବର୍ଷା ଯୋଗୁଁ କଟକ, କେନ୍ଦ୍ରାପଡା. ଢ଼େଙ୍କାନାଳ, ପୁରୀ, ଯାଜପୁର, ଭଦ୍ରକ, ଗଞ୍ଜାମ ଓ ଗଜପତି ଜିଲ୍ଲାର ସ୍କୁଲ ଓ ଅଙ୍ଗନୱାଡି ଗୁଡିକ ଛୁଟି ଘୋଷଣା କରାଯାଇଥିଲା ।