ଏଣିକି ସିଧାସଳଖ ନିର୍ବାଚିତ ହେବେ ମେୟର, ପୌରାଧ୍ୟକ୍ଷ
ଲୋକଙ୍କ ମତ ଲୋଡ଼ିଲା ନଗର ଉନ୍ନୟନ ବିଭାଗ
୨୦୧୮ରେ ବିଧାନସଭାରେ ଗୃହୀତ ହୋଇଥିଲା ସଂଶୋଧିତ ବିଲ୍
Sambad is now on WhatsApp
Join and get latest news updates delivered to you via WhatsApp
ଭୁବନେଶ୍ବର : ମହାନଗର ନିଗମ ମେୟର ଓ ପୌରପାଳିକା/ଏନ୍ଏସି ଅଧ୍ୟକ୍ଷ ଆଉ ପରୋକ୍ଷ ଭାବେ ନିର୍ବାଚିତ ହେବେନି। ସେମାନଙ୍କୁ ଭୋଟର୍ମାନେ ସିଧାସଳଖ ନିର୍ବାଚିତ କରିବେ। ୨୦୧୮ ମସିହା ସେପ୍ଟେମ୍ବର ମାସରେ ଏ ସଂକ୍ରାନ୍ତରେ ସଂଶୋଧିତ ଆଇନ ବିଧାନସଭାରେ ଗୃହୀତ ହୋଇଥିଲା। ପାଖାପାଖି ୩ ବର୍ଷ ପରେ ଏହି ସଂଶୋଧିତ ଆଇନ ଆଧାରରେ ପ୍ରସ୍ତୁତ ଚିଠା ନିୟମ ଗତକାଲି ଓଡ଼ିଶା ଗେଜେଟ୍ରେ ପ୍ରକାଶ କରି ସାଧାରଣ ଲୋକଙ୍କ ମତାମତ ମାଗିଛନ୍ତି ସରକାର। ୩୦ ଦିନ ଭିତରେ ନାଗରିକମାନେ ସେମାନଙ୍କ ଆପତ୍ତି ଅଭିଯୋଗ ଓ ପ୍ରସ୍ତାବ ନଗର ଉନ୍ନୟନ ବିଭାଗର ପ୍ରମୁଖ ଶାସନ ସଚିବଙ୍କ ନିକଟକୁ ପଠାଇପାରିବେ। ନୂଆ ବ୍ୟବସ୍ଥା ଅନୁଯାୟୀ ପୌର ନିର୍ବାଚନ ସମୟରେ କାଉନ୍ସିଲର୍/କର୍ପୋରେଟର୍ ଓ ମେୟର/ଅଧ୍ୟକ୍ଷ ପଦବି ପାଇଁ ଦୁଇଟି ସ୍ୱତନ୍ତ୍ର ଭିନ୍ନ ରଙ୍ଗର ବାଲାଟ୍ ପେପର ରହିବ। ମହାନଗର ନିଗମ/ପୌରପାଳିକା/ଏନ୍ଏସିର ଜନସଂଖ୍ୟା ଆଧାରରେ ମେୟର/ ଅଧ୍ୟକ୍ଷ ପଦବି କେଉଁ ବର୍ଗର ହେବେ ତାହା ସ୍ଥିର ହେବ। ମତଦାନ କେନ୍ଦ୍ରରେ କାଉନ୍ସିଲର୍/କର୍ପୋରେଟର୍ ପାଇଁ ଗୋଟିଏ ଏବଂ ମେୟର/ଅଧ୍ୟକ୍ଷ ପାଇଁ ଆଉ ଗୋଟିଏ ଭୋଟ୍ବାକ୍ସ ରହିବ।
ସୂଚନାଯୋଗ୍ୟ ଯେ ପୂର୍ବରୁ ପୌରପାଳିକା/ଏନ୍ଏସିରେ କାଉନ୍ସିଲର୍ମାନେ ନିଜ ଭିତରୁ ଜଣଙ୍କ ଅଧ୍ୟକ୍ଷ ନିର୍ବାଚନ କରୁଥିଲେ। ସେହିପରି ମହାନଗର ନିଗମରେ କର୍ପୋରେଟର୍ମାନେ ନିଜ ଭିତରୁ ମେୟର ନିର୍ବାଚନ କରୁଥିଲେ। ନୂଆ ଆଇନରେ ଏହି ବ୍ୟବସ୍ଥା ଉଠିଯିବ। ଦେଶର ଅନ୍ୟ କିଛି ରାଜ୍ୟ ମଧ୍ୟ ମେୟର/ଅଧ୍ୟକ୍ଷ ପଦବିରେ ସିଧାସଳଖ ନିର୍ବାଚନର ବ୍ୟବସ୍ଥା କରିଛନ୍ତି।