ସୁହାଉଛି ପାଗ, ଭାରତମୁହାଁ ମୌସୁମୀ
ଭୁବନେଶ୍ବର : ଦକ୍ଷିଣ-ପଶ୍ଚିମ ମୌସୁମୀ ବାୟୁ ଧୀରେ ଧୀରେ ଭାରତ ଆଡ଼କୁ ଅଗ୍ରସର ହେଉଛି। ପ୍ରଚଣ୍ଡ ଗୁଳୁଗୁଳି ଓ ତାତିରେ ସନ୍ତୁଳି ହେଉଥିବା ରାଜ୍ୟବାସୀଙ୍କୁ ଏହି ଖବର ଆଶ୍ବସ୍ତ କରିଛି। ଆସନ୍ତା ୨୪ ଘଣ୍ଟା ମଧ୍ୟରେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଦକ୍ଷିଣ ବଙ୍ଗୋପସାଗର, ଆଣ୍ଡାମାନ ସାଗର, ଆଣ୍ଡାମାନ ଓ ନିକୋବର ଦ୍ବୀପପୁଞ୍ଜର ଆହୁରି କେତେକ ଭାଗକୁ ଅଗ୍ରସର ହେବା ପାଇଁ ଏବେ ପାଗ ସମ୍ପୂର୍ଣ୍ଣ ଅନୁକୂଳ ରହିଛି। ଉପଗ୍ରହରୁ ମିଳିଥିବା ତଥ୍ୟ ଅନୁସାରେ, ଏହି ଅଞ୍ଚଳଗୁଡ଼ିକରେ ପାଗ ମେଘୁଆ ରହିବା ସହ ବର୍ଷା ଲାଗିରହିଛି। ଅନ୍ୟପଟେ ଏଥର ମୌସୁମୀ କେରଳ ଆସିବାକୁ ୪ ଦିନ ବିଳମ୍ବ କରିବ ଓ ପାଖାପାଖି ଜୁନ୍ ୪ ଆଡ଼କୁ କେରଳରେ
ମୌସୁମୀ ବର୍ଷା ଆରମ୍ଭ ହୋଇଯିବ ବୋଲି ଆକଳନ କରାଯାଉଛି। ରଜ ପରେ ଓଡ଼ିଶାକୁ ମୌସୁମୀ ପ୍ରବେଶ କରିବ ଓ ପ୍ରାଥମିକ ପର୍ଯ୍ୟାୟରେ ମୌସୁମୀ ଦୁର୍ବଳ ରହିବ ଓ ବର୍ଷା କମ୍ ହେବ ବୋଲି ଭାରତୀୟ ପାଣିପାଗ ବିଭାଗ(ଆଇଏମ୍ଡି) ଆକଳନ କରିଛି। ଫଳରେ ଜୁନ୍ରେ ବର୍ଷା କମ୍ ଓ ଖରା, ତାତି ଖୁବ୍ ଅଧିକ ରହିବ ବୋଲି ଆଇଏମ୍ଡି ଆକଳନ କରିଛି।
Sambad is now on WhatsApp
Join and get latest news updates delivered to you via WhatsApp
ଅନ୍ୟପଟେ ପ୍ରଚଣ୍ଡ ଖରା ପଶ୍ଚିମ ଓଡ଼ିଶାବାସୀଙ୍କୁ ହସ୍ତସନ୍ତ କରୁଥିବା ବେଳେ ଉପକୂଳବାସୀଙ୍କୁ ଗୁଳୁଗୁଳି ଅସ୍ତବ୍ୟସ୍ତ କରୁଛି। ସୋମବାର ଦିନ ରାଜ୍ୟର ସର୍ବୋଚ୍ଚ ତାପମାତ୍ରା ସମ୍ବଲପୁରଠାରେ ୪୩.୨ ଡିଗ୍ରି ଓ ବୌଦ୍ଧଠାରେ ୪୩.୦ ଡିଗ୍ରି ରେକର୍ଡ ହୋଇଛି। ଏହାସହ ୧୩ ସହରର ତାପମାତ୍ରା ୪୦ ଡିଗ୍ରି ପାର୍ କରିଛି। ସୋମବାର ଦିନ ଭୁବନେଶ୍ବରର ତାପମାତ୍ରା ୩୮.୮ ଡିଗ୍ରି ରେକର୍ଡ ହୋଇଥିବା ବେଳେ ଆର୍ଦ୍ରତା ୬୫% ରହିଥିବାରୁ ତାପମାତ୍ରା ପାଖାପାଖି ୪୫ ଡିଗ୍ରି ଯାଏ ଅନୁଭୂତ ହୋଇଥିଲା। ଆସନ୍ତା ୫ ଦିନ ପର୍ଯ୍ୟନ୍ତ ପଶ୍ଚିମ ଓଡ଼ିଶାର ଅଧିକାଂଶ ସ୍ଥାନର ତାପମାତ୍ରା ୪୨ ଡିଗ୍ରି ଉପରେ ରହିବ। ମଙ୍ଗଳବାର ଦିନ ମାଲକାନଗିରି, କୋରାପୁଟ, ରାୟଗଡ଼ା, ଗଜପତି, ଗଞ୍ଜାମ ଓ କନ୍ଧମାଳ ଜିଲ୍ଲାରେ କାଳବୈଶାଖୀଜନିତ ବର୍ଷା ସମ୍ଭାବନା ରହିଛି। ଆଜି ରାଜଧାନୀ ଭୁବନେଶ୍ବରର ପାଗ ଆଂଶିକ ମେଘୁଆ ରହିବ। ଅପରାହ୍ନ ଆଡ଼କୁ ବର୍ଷା ସମ୍ଭାବନା ରହିଛି। ଦିନର ସର୍ବୋଚ୍ଚ ତାପମାତ୍ରା ୩୯ ଡିଗ୍ରି ଓ ସର୍ବନିମ୍ନ ତାପମାତ୍ରା ୨୭ ଡିଗ୍ରି ରହିବ।