ବେଙ୍ଗାଲୁରୁ: ଅଷ୍ଟ୍ରେଲିଆ ବିପକ୍ଷ ଦ୍ବିତୀୟ ଟ୍ବେଣ୍ଟି-୨୦କୁ ଭାରତ ୭ ୱିକେଟ୍ରେ ହାରି ଯାଇଛି। ବେଙ୍ଗାଲୁରୁରେ ବୁଧବାର ଖେଳା ଯାଇଥିବା ଏହି ମ୍ୟାଚ୍ରେ ଭାରତ ଦେଇଥିବା ୧୯୧ ରନ୍ର ବିଜୟ ଲକ୍ଷ୍ୟକୁ ଅଷ୍ଟ୍ରେଲିଆ ଗ୍ଲେନ୍ ମ୍ୟାକ୍ସୱେଲଙ୍କ ଧୂଆଁଧାର ଶତକ ବଳରେ ୧୯.୪ ଓଭରରେ ହାସଲ କରି ନେଇଛି। ଫଳରେ ଦୁଇ ଟିକିଆ ଶୃଙ୍ଖଳାକୁ ୨-୦ରେ ପୋଛି ନେଇଛି। ୧୫ ପରେ ପ୍ରଥମ ଘରୋଇ ଶୃଙ୍ଖଳା ପରାଜୟ ୧୯୧ ରନ୍ର ବିଜୟ ଲକ୍ଷ୍ୟ କଷ୍ଟକର ମନେ ହେଉଥିଲେ ମଧ୍ୟ ମ୍ୟାକ୍ସୱେଲ (୧୧୩* ରନ୍, ୫୫ ବଲ୍, ୭ ଚୌକା, ୯ ଛକା)ଙ୍କ ବିସ୍ଫୋରକ ଶତକ ବଳରେ ଅଷ୍ଟ୍ରେଲିଆ ଏହାକୁ ଏକପ୍ରକାର ସହଜରେ ହାସଲ କରି ନେଇଥିଲା। ଅଷ୍ଟ୍ରେଲିଆ କିନ୍ତୁ ଆଜି ମାତ୍ର ୨୨ ରନ୍ରେ ୨ ୱିକେଟ୍ ହରାଇଥିଲା। ତେବେ ମ୍ୟାକ୍ସୱେଲଙ୍କୁ ରୋକି ନ ପାରିବା ଭାରତ ପାଇଁ ଅତ୍ୟନ୍ତ ମହଙ୍ଗା ସାବ୍ୟସ୍ତ ହୋଇଥିଲା। ଡାର୍କି ସଟ୍ (୪୦) ଓ ମ୍ୟାକ୍ସୱେଲ୍ ତୃତୀୟ ୱିକେଟ୍ରେ ୭୩ ରନ୍ ଯୋଡ଼ି ସ୍ଥିତି ସୁଧାରିନେଇଥିଲେ। ଏହା ପରେ ମ୍ୟାକ୍ସୱେଲ୍ ଓ ପିଟର ହ୍ୟାଣ୍ଡ୍ସକମ୍ବ (୨୦*) ଅବିଭାଜିତ ଚତୁର୍ଥ ୱିକେଟ୍ରେ ୯୯ ରନ୍ ଯୋଡ଼ି ଭାରତ ହାତରୁ ମ୍ୟାଚ୍ ଛଡ଼ାଇ ନେଇଥିଲେ। ମ୍ୟାକ୍ସୱେଲ୍ ମାତ୍ର ୫୦ ବଲ୍ରୁ ନିଜର ତୃତୀୟ ଟ୍ବେଣ୍ଟି-୨୦ ଶତକ ହାସଲ କରିଥିଲେ। ସେ ମଧ୍ୟ ଚୌକା ମାରି ଅଷ୍ଟ୍ରେଲିଆ ବିଜୟରେ ମୁଣ୍ଡି ମାରିଥିଲେ। ଆଶାଜନକ ଭାବେ ମ୍ୟାକ୍ସୱେଲ ମ୍ୟାଚ୍ ଓ ଶୃଙ୍ଖଳାର ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ। ୨୦୧୫ ମସିହାରେ ଦକ୍ଷିଣ ଆଫ୍ରିକାଠାରୁ ୦-୨ (୩)ରେ ହାରିବା ପରଠାରୁ ଘରୋଇ ପରିବେଶରେ ଭାରତର ଏହା ପ୍ରଥମ ଦ୍ବିପାକ୍ଷିକ ଟ୍ବେଣ୍ଟି-୨୦ ଶୃଙ୍ଖଳା ପରାଜୟ ହୋଇଛି। ସେପଟେ ଅଷ୍ଟ୍ରେଲିଆ ଭାରତ ବିପକ୍ଷରେ ପ୍ରଥମ ଟ୍ବେଣ୍ଟି-୨୦ ଶୃଙ୍ଖଳା ବିଜୟ ହାସଲ କରିଛି। ଭାରତ ବିଶାଖାପାଟଣାରେ ଖେଳା ଯାଇଥିବା ପ୍ରଥମ ଟ୍ବେଣ୍ଟି-୨୦କୁ ୩ ୱିକେଟ୍ରେ ହାରିଥିଲା।
Sambad is now on WhatsApp
Join and get latest news updates delivered to you via WhatsApp
କୋହଲି ଧମାକା ବେକାର
ଚିନ୍ନାସ୍ବାମୀ ଷ୍ଟାଡିୟମରେ ଖେଳା ଯାଇଥିବା ଏହି ମ୍ୟାଚ୍ରେ ଭାରତ ନିୟମିତ ପ୍ରାରମ୍ଭିକ ବ୍ୟାଟ୍ସମ୍ୟାନ୍ ରୋହିତ ଶର୍ମାଙ୍କୁ ବିଶ୍ରାମ ଦେଇଥିଲା। ସେଥିପାଇଁ ଶିଖର ଧାୱନ (୧୪) ଓ ଲୋକେଶ ରାହୁଲ (୪୭ ରନ୍, ୨୬ ବଲ୍, ୩ ଚୌକା, ୪ ଛକା) ପାଳି ଆରମ୍ଭ କରିଥିଲେ। ରାହୁଲଙ୍କ ଦ୍ରୁତ ବ୍ୟାଟିଂ ପାଇଁ ଉଭୟ ପ୍ରଥମ ୱିକେଟ୍ରେ ୬୧ ରନ୍ ଯୋଡ଼ିଥିଲେ। ଦୁଇ ଜଣ ଯାକ କିନ୍ତୁ ୭ ବଲ୍ ଭିତରେ ନିଜ ନିଜ ୱିକେଟ୍ ଫିଙ୍ଗି ଦେଇଥିଲେ। ମନ୍ଥର ବ୍ୟାଟିଂ କରିଥିବା ଧାୱନ ବେହେରନଡର୍ଫଙ୍କ ଶିକାର ହେବା ପୂର୍ବରୁ ରାହୁଲ କୁଲଟର ନାଇଲଙ୍କ ଦ୍ବାରା ଆଉଟ୍ ହୋଇଥିଲେ। ଫଳରେ ମାତ୍ର ୩ ରନ୍ ପାଇଁ ଏକ ଚିତ୍ତାକର୍ଷକ ଅର୍ଧଶତକରୁ ବଞ୍ଚିତ ହୋଇଥିଲେ। ପ୍ରଥମ ୧୦ ଓଭରରେ ଭାରତ ୨ ୱିକେଟ୍ ହରାଇ ମାତ୍ର ୭୩ ରନ୍ କରିଥିଲା। ଯୁବ ତାରକା ଋଷବ ପନ୍ତ ଲଗାତାର ଦ୍ବିତୀୟ ମ୍ୟାଚ୍ ପାଇଁ ଏକ ଅଙ୍କରେ ସୀମିତ ରହିଥିଲେ। ଡାର୍କି ସଟ୍ଙ୍କ ବଲକୁ ନ ବୁଝି ନଶୁଝି ବଡ଼ ସଟ୍ ଖେଳିଲା ବେଳେ ସେ ଝେ ରିଚାର୍ଡସନଙ୍କ ହାତରେ ଧରାପଡ଼ିଥିଲେ। ପନ୍ତଙ୍କ ଆଉଟ୍ ପରେ ଅଧିନାୟକ ବିରାଟ କୋହଲି ( ୭୨* ରନ୍, ୩୮ ବଲ୍, ୨ ଚୌକା, ୬ ଛକା) କିନ୍ତୁ ତାଙ୍କ ପରାକ୍ରମ ଦେଖାଇଥିଲେ। ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନି (୪୦ ରନ୍, ୨୩ ବଲ୍, ୩ ଚୌକା, ୩ ଛକା)ଙ୍କ ମହ ମିଶି ମାତ୍ର ୮.୨ ଓଭରରୁ ସେ ୧୦୦ ରନ୍ ଅମଳ କରିଥିଲେ। ପ୍ୟାଟ୍ କମିନ୍ସଙ୍କ ଶେଷ ବଲ୍କୁ ଛକା ମାରି ଭାରତ ସ୍କୋରକୁ ୧୯୦ ରନ୍ରେ ପହଞ୍ଚାଇଥିବା କୋହଲି ବୁଧବାର ମାତ୍ର ୨୯ ବଲରୁ ଗୋଟିଏ ଚୌକା ଏବଂ ୪ ଛକା ସହ ନିଜ ୨୦ତମ ଟ୍ବେଣ୍ଟି-୨୦ ଅର୍ଧଶତକ ପୂରଣ କରିଥିଲେ। ସେ ମଧ୍ୟ ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ଧୋନି ଶେଷ ଓଭରର ପ୍ରଥମ ବଲ୍ରେ ଆଉଟ୍ ହେବା ପରେ ପଡ଼ିଆକୁ ଆସିଥିବା ଦୀନେଶ କାର୍ତିକ ମାତ୍ର ୩ ବଲ୍ରୁ ୮ ରନ୍ କରିଥିଲେ।