ଆମ୍ବାଗୁଡ଼ା ଫାଣ୍ଡିକୁ ଥାନା ଘୋଷଣା ଦାବିରେ ଉପଜିଲ୍ଲାପାଳଙ୍କ କାର୍ଯ୍ୟାଳୟ ଘେରିଲେ ୧୦ ପଂଚାୟତବାସୀ
ଜୟପୁର: ଗତ ୨ତାରିଖ ଦିନ କୋରାପୁଟ ଜିଲ୍ଲା ଜୟପୁର ବ୍ଲକ ଓ ସଦରଥାନା ଅର୍ନ୍ତଗତ ଆମ୍ବାଗୁଡାରେ ଥିବା ଆମ୍ବାଗୁଡା ପୁଲିସ ଫାଣ୍ଡିକୁ ଥାନା ଭାବେ ଘୋଷଣା କରିବାକୁ ୧୦ଟି ପଂଚାୟତବାସୀ ଦାବି କରି ଏକ ସ୍ମାରକପତ୍ର ଉପଜିଲ୍ଲାପାଳଙ୍କୁ ପ୍ରଦାନ କରିଥିଲେ। ୧୫ଦିନ ମଧ୍ୟରେ ଦାବି ପୂରଣ ନ ହେଲେ ଉପଜିଲ୍ଲାପାଳଙ୍କ କାର୍ଯ୍ୟାଳୟକୁ ଘେରିବାକୁ ଚେତାବନୀ ଦେଇଥିଲେ। ଏହି ଦାବି ପୂରଣ ନ ହେବାରୁ ଆଜି ୧୦ଟି ଯାକ ପଂଚାୟତର ଗ୍ରାମବାସୀ ମାନେ ଜୟପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟକୁ ଘେରିଥିଲେ।
Sambad is now on WhatsApp
Join and get latest news updates delivered to you via WhatsApp
ଉପଜିଲ୍ଲାପାଳ ହେମକାନ୍ତ ସୟ ଏସପି ଜି.ବରୁଣଙ୍କ ସହ ଏ ନେଇ ଆଲୋଚନା କରିବା ସହ ଆଗାମୀ ଦିନରେ ଜିଲ୍ଲା ପୁଲିସ ଏ ନେଇ ଆଶୁ ପଦକ୍ଷେପ ନେବ ବୋଲି ସୂଚନା ଦେବା ପରେ ଗ୍ରାମବାସୀମାନେ ଘେରାଉରୁ ଓହରିଥିଲେ। ସୂଚନାଯୋଗ୍ୟ, ଜୟପୁର ସହରରୁ ୧୨କିଲୋମିଟର ଦୁରରେ ରହିଛି ଆମ୍ବାଗୁଡ଼ା। ଜୟପୁର ସଦର ଓ ବୋରିଗୁମ୍ମା ଥାନାର ମଧ୍ୟବର୍ତ୍ତୀ ଅଂଚଳରେ ଯଦିଓ ଆମ୍ବାଗୁଡା ରହିଥିଲେ ହେଁ ଏହାର ଅଂଚଳ ବିସ୍ତିର୍ଣ୍ଣ ରହିବା ସହ ଏହାର ଚାରିପଟେ ୧୦ଟି ପଂଚାୟତ ରହିଛି। ଆମ୍ବାଗୁଡ଼ା ଏବଂ ଏହାର ଏକ କିଲୋମିଟର ପରିଧି ମଧ୍ୟରେ ଆଇଟିଆଇ, ପଲିଟେକ୍ନିକ୍ କଲେଜ, ଇଂଜନିୟରିଂ, ଫାର୍ମସୀ କଲେଜ, ଡାକ୍ତରଖାନା, ସ୍କୁଲ ଆଦି ବି ରହିଛି। ଜାତୀୟ ରାଜପଥ ୨୬ବି ଗାଁ ମଧ୍ୟ ଦେଇ ଯାଇଛି। ଅନ୍ୟ ପକ୍ଷରେ ଦିନକୁ ଦିନ ଆମ୍ବାଗୁଡାରେ ଜନସଂଖ୍ୟା ଓ ଘର ସଂଖ୍ୟା ବି ବୃଦ୍ଧି ପାଇଛି। ସେଭଳି ଅଂଚଳରେ ଚୋରୀ, ରାହଜାନୀ, ଡକାୟତି, କୁକୁଡାଗାଲି, ଜୁଆ, ମଦ୍ୟପଙ୍କ ଆଡ୍ଡା ବି ବିଭିନ୍ନ ସମୟରେ ଜମୁଛି।ସେହି ମାତ୍ରାରେ ଦୁର୍ଘଟଣା, ଗଣ୍ଡଗୋଳ ଆଦି ବି ଜାରି ରହୁଛି। ଏଠାରେ ପାଣ୍ଡି ଥିଲେ ହେଁ ଏହା ସଠିକ ଭାବେ କାର୍ଯ୍ୟକାରୀ ହେଉନି। କୌଣସି ଅପରାଧ, ଚୋରୀ, ରାହଜାନୀ ଆଦି ହେଲେ ଜୟପୁର ସଦରଥାନାକୁ ସୂଚନା ଦେବା ପରେ ସେଠାରୁ ପୁଲିସ ଆସି ପହଚିଂବା ବେଳକୁ ଅପରାଧ ସଂଘଠିତ ହୋଇଯାଉଛି।
ସେଭଳି ବୋରିଗୁମ୍ମା ଥାନାର ସୀମା ହରଡ଼ାପୁଟ ପର୍ଯ୍ୟନ୍ତ ରହିଛି। ଆମ୍ବାଗୁଡାରୁ ଅତି ନିକଟରେ ଥିବା ଗାଁ ଗୁଡିକ ବି ବୋରିଗୁମ୍ମା ଥାନା ସୀମା ମଧ୍ୟରେ ରହିଛି। ଏସବୁ ଗାଁରେ ବି କିଛି ଘଟଣା ସଂଘଟିତ ହେଲେ ବୋରିଗୁମ୍ମାରୁ ପୁଲିସ ଆସି ପହଚିଂବା ବିଳମ୍ବ ହେଉଛି। ଏସବୁ ଦୃଷ୍ଟି କୋଣରୁ ଆମ୍ବାଗୁଡା ପାଣ୍ଡିକୁ ଥାନା ଭାବେ ଘୋଷଣା କରିବାକୁ ସମାଜସେବୀ ବି.ହରି ରାଓ, ଏମ୍ ଶ୍ରୀରାମ ରାଜୁ, ପିଣ୍ଟୁ ନାୟକ, ରଂଜନ ପାଇକ, ବାପ ବାରିକ ଆଦିଙ୍କ ନେତୃତ୍ବରେ ଗ୍ରାମବାସୀ ମାନେ ଘେରାଉରେ ଭାଗ ନେଇଥିଲେ।