କଲମ୍ବୋ : ଶ୍ରୀଲଙ୍କାରେ ଏବେ ଉପୁଜିଲାଣି ଭୟଙ୍କର ପରିସ୍ଥିତି। ଖାଇବାକୁ ଖାଦ୍ୟ ନାହିଁ କି ପିଇବାକୁ ପାଣି ନାହିଁ। ଚାଉଳ, ଡାଲିର ଘୋର ଅଭାବ ସହ ଡିଜେଲ ଟାଙ୍କି ବନ୍ଦ ହୋଇସାରିଲାଣି। ପେଟ୍ରୋଲ ପାଇଁ ଲାଗୁଛି ଲମ୍ବା ଧାଡ଼ି। ରନ୍ଧନ ଗ୍ୟାସ ନାହିଁ ଓ କିରୋସିନ ମିଳୁ ନଥିବା ବେଳେ ଦିନକୁ ୧୦ ଘଣ୍ଟା ବିଜୁଳି କାଟ୍ ହେଉଛି। ଶିଳ୍ପ ଓ ଅନ୍ୟ ବ୍ୟବସାୟିକ ପ୍ରତିଷ୍ଠାନ ବନ୍ଦ ହୋଇଥିବା ବେଳେ ଲୋକମାନେ ଚାକିରି ହରାଇ ବେକାର ହୋଇପଡ଼ିଛନ୍ତି। ଏହି କାରଣରୁ ଲୋକ ଏବେ ଦେଶ ଛାଡ଼ିବା ଆରମ୍ଭ କରିଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ପରିସ୍ଥିତି ଏତେ ଖରାପ ହୋଇଛି ଯେ ଚିନିର ମୂଲ୍ୟ ୨୯୦ଟଙ୍କା ଏବଂ ଚାଉଳ କିଲୋ ୫୦୦ଟଙ୍କାକୁ ବୃଦ୍ଧି ପାଇଛି। ସରକାରୀ ତଥ୍ୟ ଅନୁଯାୟୀ ଶ୍ରୀଲଙ୍କାରେ ମୁଦ୍ରାସ୍ଫୀତି ହାର ୧୭ ପ୍ରତିଶତ ଅତିକ୍ରମ କରିଛି। ସମଗ୍ର ଦକ୍ଷିଣ ଏସିଆର ଯେକୌଣସି ଦେଶରେ ମୁଦ୍ରାସ୍ଫୀତିର ଏହା ସବୁଠାରୁ ଖରାପ ସ୍ତର। ଏହି କାରଣରୁ, ସ୍ୱାଧୀନତା ପରଠାରୁ ଶ୍ରୀଲଙ୍କା ସାମ୍ନାରେ ସବୁଠାରୁ ଗୁରୁତର ସଙ୍କଟ ଦେଖାଦେଇଛି। ବର୍ତ୍ତମାନ ଏହି ଛୋଟ ଦେଶର ଅବସ୍ଥା ଏପରି ହୋଇଛି ଯେ ଲୋକଙ୍କୁ ୧ କପ୍ ଚା’ ପାଇଁ ୧୦୦ଟଙ୍କା ଦେବାକୁ ପଡୁଛି। କେବଳ ଏତିକି ନୁହେଁ, ରୁଟି ଏବଂ କ୍ଷୀର ଭଳି ଜରୁରୀ ଜିନିଷର ମୂଲ୍ୟ ମଧ୍ୟ ଆକାଶ ଛୁଆଁ ହୋଇଛି।
ଖବର ଅନୁଯାୟୀ, ବର୍ତ୍ତମାନ ଶ୍ରୀଲଙ୍କାରେ ଏକ ପ୍ୟାକେଟ ପାଉରୁଟିର ମୂଲ୍ୟ ୧୫୦ଟଙ୍କାକୁ ବୃଦ୍ଧି ପାଇଛି। ଅମୁଲ କିଲୋକୁ ୧୯୭୫ ଟଙ୍କା ହୋଇଥିବା ବେଳେ ଏଲପିଜି ସିଲିଣ୍ଡରର ମୂଲ୍ୟ ୪,୧୧୯ ଟଙ୍କାରେ ପହଞ୍ଚିଛି । ସେହିଭଳି ପେଟ୍ରୋଲ ଲିଟରକୁ ୨୫୪ଟଙ୍କା ଏବଂ ଡିଜେଲ ଲିଟରକୁ ୧୭୬ଟଙ୍କାରେ ବିକ୍ରି ହେଉଛି।
କୁହାଯାଉଛି ଯେ, ସରକାରଙ୍କ ଟିକସ କାଟ୍ ନୀତି ଯୋଗୁଁ ଶ୍ରୀଲଙ୍କାର ଅର୍ଥନୈତିକ ପରିସ୍ଥିତି ସଙ୍କଟ ଭିତରକୁ ଠେଲି ହୋଇଯାଇଥିଲା। ଏହା ସାଙ୍ଗକୁ କୋଭିଡ୍ ସଂକ୍ରମଣ ଏବଂ ଲକଡାଉନ୍ ପରିସ୍ଥିତିକୁ ଆହୁରି ଜଟିଳ କରିଦେଇଛି। ଅର୍ଥନୀତି ଆଉ ସରକାରଙ୍କ ନିୟନ୍ତ୍ରଣରେ ନାହିଁ। ରାଜସ୍ବର ମୁଖ୍ୟ ସୂତ୍ର କୁହାଯାଉଥିବା ପର୍ଯ୍ୟଟନ ଶିଳ୍ପ ଭୁଶୁଡ଼ି ପଡ଼ିଛି। ବିଦେଶୀ ମୁୁଦ୍ରା ଭଣ୍ଡାର ଖାଲି ପଡ଼ିଥିବାରୁ ଅନେକ ଅତ୍ୟାବଶ୍ୟକ ସାମଗ୍ରୀର ମଧ୍ୟ ଆମଦାନୀ ହୋଇପାରୁ ନାହିଁ। ଅତ୍ୟାବଶ୍ୟକ ସାମଗ୍ରୀର ଘୋର ଅଭାବ। ଯାହା ମିଳୁଛି, ତାହାର ଦାମ୍ ଆକାଶଛୁଅାଁ।