ସାର୍କକୁ ଏକାଠି କଲା କରୋନା, ମୋଦୀଙ୍କ ଭିଡିଓ କନଫରେନ୍ସ ବୈଠକ ପ୍ରସ୍ତାବରେ ପାକିସ୍ତାନ ରାଜି
ନୂଆଦିଲ୍ଲୀ : କରୋନା ଭାଇରସ ଦକ୍ଷିଣ ଏସିଆର ରାଷ୍ଟ୍ରମାନଙ୍କୁ ଏକାଠି କରିଛି । ଗତ କିଛି ବର୍ଷଧରି ପ୍ରାୟତଃ ଅପ୍ରାସଙ୍ଗିକ ହୋଇପଡ଼ିଥିବା ସାର୍କ ବା ଦକ୍ଷିଣ ଏସିଆ ଆଞ୍ଚଳିକ ସହଯୋଗ ସଂଗଠନ ପୁଣି ସକ୍ରିୟ ହୋଇଉଠିଛି ।
Sambad is now on WhatsApp
Join and get latest news updates delivered to you via WhatsApp
କରୋନା ଭାଇରସ ଦକ୍ଷିଣ ଏସିଆ ସମେତ ସମଗ୍ର ବିଶ୍ୱକୁ କବଳିତ କରିଥିବାବେଳେ ଦେଶଗୁଡ଼ିକ ଏକାଠି ହୋଇ ଏହା ବିରୁଦ୍ଧରେ ଲଢେଇ କରିବା ଆବଶ୍ୟକ ବୋଲି ବିଶ୍ୱ ସ୍ୱାସ୍ଥ୍ୟ ସଂଗଠନ ଆହ୍ଵାନ ଜଣାଇଛି । ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତକାଲି ସାର୍କ ରାଷ୍ଟ୍ରମାନେ ଏକାଠି ହେବାକୁ ଆହ୍ଵାନ ଜଣାଇଥିଲେ । ଏକ ଭିଡ଼ିଓ କନଫରେନ୍ସିଂ ମାଧ୍ୟମରେ କରୋନା ମୁକାବିଲା ଲାଗି ରଣକୌଶଳ ନିର୍ଦ୍ଧାରଣ କରିବାକୁ ସେ ଆହ୍ଵାନ ଜଣାଇଥିଲେ । ସାର୍କ ରାଷ୍ଟ୍ରମାନେ ଏକାଠି ହୋଇ ବିଶ୍ୱ ପାଇଁ ଏକ ଉଦାହରଣ ସୃଷ୍ଟି କରିବାକୁ ସେ କହିଥିଲେ ।
ମୋଦୀଙ୍କ ଏହି ଟ୍ଵିଟ ପରେ ତାହାକୁ ଅନ୍ୟ ସାର୍କ ରାଷ୍ଟ୍ରମାନେ ତୁରନ୍ତ ସମର୍ଥନ ଜଣାଇଥିଲେ । ବାଂଲାଦେଶ, ନେପାଳ,ମାଳଦ୍ୱୀପ, ଶ୍ରୀଲଙ୍କା ଆଦି ସଦସ୍ୟ ରାଷ୍ଟ୍ରର ରାଷ୍ଟ୍ରମୁଖ୍ୟମାନେ ଏହାକୁ ସମର୍ଥନ କରି ଟ୍ଵିଟ କରିଥିଲେ । ତେବେ ପାକିସ୍ତାନ ଗତକାଲି ନିରବ ରହିଥିଲା । କିନ୍ତୁ ଆଜି ପାକିସ୍ତାନ ମଧ୍ୟ ଏହି ଭିଡିଓ କନଫରେନ୍ସିଂ ବୈଠକ ପାଇଁ ସମ୍ମତି ଜଣାଇଛି ।
ସୂଚନାଯୋଗ୍ୟ ଯେ ସାର୍କରେ ୮ଟି ସଦସ୍ୟ ରାଷ୍ଟ୍ର ଅଛନ୍ତି । ସେମାନେ ହେଲେ ଭାରତ, ପାକିସ୍ତାନ, ଶ୍ରୀଲଙ୍କା, ଆଫଗାନିସ୍ତାନ, ମାଳଦ୍ୱୀପ,ବାଂଲାଦେଶ, ନେପାଳ ଓ ଭୁଟାନ ।