ଘରୋଇ ସଂସ୍ଥାରେ ବି ଦିବ୍ୟାଙ୍ଗଙ୍କୁ ୫% ଚାକିରି ସଂରକ୍ଷଣ
ରାଉରକେଲା : ସରକାରୀ ଚାକିରି ଭଳି ଘରୋଇ ଶିଳ୍ପ ସଂସ୍ଥାରେ ଭିନ୍ନକ୍ଷମ (ଦିବ୍ୟାଙ୍ଗ) ପ୍ରାର୍ଥୀଙ୍କ ପାଇଁ ୫% ନିଯୁକ୍ତି ସଂରକ୍ଷଣ କାର୍ଯ୍ୟକାରୀ ହେବ। କର୍ମଶାଳା ଓ ଆଲୋଚନାଚକ୍ର ଜରିଆରେ ଏହାକୁ ନିଶ୍ଚିତ କରାଇବା ନିମନ୍ତେ ମୁଖ୍ୟ ସଚିବ ଆଦିତ୍ୟ ପ୍ରସାଦ ପାଢ଼ୀ ଶିଳ୍ପ ବିଭାଗକୁ ଦାୟିତ୍ୱ ନ୍ୟସ୍ତ କରିଛନ୍ତି। ଏହାଛଡ଼ା ସେମାନଙ୍କ ଆତ୍ମନିଯୁକ୍ତି ଓ ବିଭିନ୍ନ କଲ୍ୟାଣକାରୀ କାର୍ଯ୍ୟକ୍ରମ ତ୍ୱରାନ୍ଵିତ ପାଇଁ ଶିଳ୍ପ ସଂସ୍ଥାଗୁଡ଼ିକ ସାମାଜିକ ଦାୟିତ୍ୱବୋଧ (ସିଏସ୍ଆର୍) ପାଣ୍ଠିରୁ ସହାୟତା ଦେବାକୁ ସରକାର ଅନୁରୋଧ କରିବେ। ସୁପ୍ରିମ୍ କୋର୍ଟଙ୍କ ତଦାରଖରେ ରୂପାୟନ ହେଉଥିବା ‘ଭିନ୍ନକ୍ଷମ ଅଧିକାର ଆଇନ-୨୦୧୬’ର ସଫଳ କାର୍ଯ୍ୟକାରୀତା ନିମନ୍ତେ ମୁଖ୍ୟ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଚ୍ଚ ସ୍ତରୀୟ ବୈଠକରେ ଏଭଳି ପର୍ଯ୍ୟାୟବ୍ୟାପୀ ନିଷ୍ପତ୍ତି ନିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ନିଷ୍ପତ୍ତି ଅନୁଯାୟୀ ଭୂମିହୀନମାନଙ୍କୁ ସରକାର ଆବଣ୍ଟନ କରୁଥିବା ଘରଡିହ ଓ ଚାଷ ଜମିର ୫% ଭିନ୍ନକ୍ଷମଙ୍କ ପାଇଁ ସଂରକ୍ଷିତ ହେବ। ରାଜ୍ୟରେ କାର୍ଯ୍ୟକାରୀ ହେଉଥିବା ବିଭିନ୍ନ ଦାରିଦ୍ର୍ୟ ଦୂରୀକରଣ ଯୋଜନାରେ ମଧ୍ୟ ସେମାନଙ୍କ ପାଇଁ ଅନୁରୂପ ସଂରକ୍ଷଣ ଲାଗୁ ହେବ। ଏପରିକି ଗୃହନିର୍ମାଣ, ବ୍ୟବସାୟ ଓ ପ୍ରମୋଦ କେନ୍ଦ୍ର ପାଇଁ ରିହାତି ଦରରେ ଆବଣ୍ଟନ କରାଯାଉଥିବା ଜମି କ୍ଷେତ୍ରରେ ମଧ୍ୟ ଦିବ୍ୟାଙ୍ଗଙ୍କ ପାଇଁ ୫% ସଂରକ୍ଷଣ ରହିବ। ‘ସୁଗମ୍ୟ ଭାରତ’ ଯୋଜନାରେ ସରକାରୀ କୋଠାକୁ ଦିବ୍ୟାଙ୍ଗଙ୍କ ସହଜ ପହଞ୍ଚ ପାଇଁ ରାଜଧାନୀରେ ଥିବା ଦପ୍ତରଗୁଡ଼ିକରେ ଆନୁସଙ୍ଗୀକ ନିର୍ମାଣ (ରେଟ୍ରୋ ଫିଟିଂସ୍) ଚାଲିଛି। ପରବର୍ତ୍ତୀ ପର୍ଯ୍ୟାୟରେ ରାଉରକେଲା, ଝାରସୁଗୁଡ଼ା, ସମ୍ବଲପୁର, ବଲାଙ୍ଗିର, କଟକ, ବ୍ରହ୍ମପୁର, ପୁରୀ, ବାଲେଶ୍ୱର, ବାରିପଦା ଓ ଜୟପୁର ସହରରେ ଥିବା ସରକାରୀ ଦପ୍ତରଗୁଡ଼ିକୁ ଏହି ବ୍ୟବସ୍ଥା ସମ୍ପ୍ରସାରଣ କରାଯିବ। ଭିନ୍ନକ୍ଷମମାନଙ୍କ ସହଜ ଯାତ୍ରା ପାଇଁ ବସ୍ ଷ୍ଟାଣ୍ଡ, ରେଳ ଷ୍ଟେସନ୍ ଓ ବିମାନ ବନ୍ଦରରେ ଆବଶ୍ୟକ ସହଜ ବ୍ୟବସ୍ଥା କାର୍ଯ୍ୟକାରୀ କରାଯିବ।
ଭିନ୍ନକ୍ଷମ ଶିଶୁ ତଥା ଛାତ୍ରଛାତ୍ରୀଙ୍କ ସବୁ ସ୍କୁଲରେ ସ୍ୱତନ୍ତ୍ର ସୁବିଧା ପ୍ରଦାନ କରାଯିବ। ଏଥି ସହ ଉଚ୍ଚ ଶିକ୍ଷାନୁଷ୍ଠାନରେ ସେମାନଙ୍କ ନାମଲେଖା ପାଇଁ ୫% ସଂରକ୍ଷଣ ବ୍ୟବସ୍ଥା ସାଙ୍ଗକୁ ସହଜ ଶିକ୍ଷା ଦାନ ନିମନ୍ତେ କଲେଜ ଓ ବିଶ୍ୱବିଦ୍ୟାଳୟରେ ଶିକ୍ଷକ/ଅଧ୍ୟାପକମାନଙ୍କୁ ସ୍ୱତନ୍ତ୍ର ତାଲିମ ପ୍ରଦାନ କରାଯିବ। ଆଇନର ସଠିକ ରୂପାୟନ ସାଙ୍ଗକୁ ଭିନ୍ନକ୍ଷମଙ୍କୁ ସମସ୍ତ ବୈଧାନିକ ସୁବିଧା-ସୁଯୋଗ ନିଶ୍ଚିତ କରିବାକୁ ଜିଲ୍ଲା ସ୍ତରୀୟ କମିଟି ଗଠନ କରିବାକୁ ମୁଖ୍ୟ ସଚିବ ନିର୍ଦ୍ଦେଶ ଦେଇଛନ୍ତି। ବିଭିନ୍ନ ଯୋଜନା ଓ କାର୍ଯ୍ୟକ୍ରମରେ ଭିନ୍ନକ୍ଷମଙ୍କ କଲ୍ୟାଣ ନିମନ୍ତେ କେତେ ଅଗ୍ରଗତି ଘଟିଛି, ସେ ସମ୍ପର୍କରେ ପ୍ରତ୍ୟେକ ବିଭାଗ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗକୁ ପ୍ରତି ମାସ ରିପୋର୍ଟ ଦେବେ।