୨୩ ପରେ ପାଗରେ ବଡ଼ ପରିବର୍ତନ: ବର୍ଷା ସମ୍ଭାବନା କମ୍
ଭୁବନେଶ୍ବର: ଆସନ୍ତା ୨ ଦିନ ରାଜ୍ୟରେ କିଛି କିଛି ବର୍ଷା ହେବାର ସମ୍ଭାବନା ଅଛି। ଏହାପରେ ଅଗଷ୍ଟ ୫ ତାରିଖ ପର୍ଯ୍ୟନ୍ତ ରାଜ୍ୟରେ ବିଶେଷ ବର୍ଷା ନାହିଁ। ଏହି ସମୟରେ ପାଗ ସମ୍ପୂର୍ଣ୍ଣ ଶୁଖିଲା ଓ ଖରାଟିଆ ରହିବ। ଏପର୍ଯ୍ୟନ୍ତ ରାଜ୍ୟରେ ନିଅଣ୍ଟିଆ ବର୍ଷା ପରିସ୍ଥିତି ସୃଷ୍ଟି ହୋଇ ସାରିଥିବା ବେଳେ ଜୁଲାଇ ଶେଷ ସୁଦ୍ଧା ସାରା ରାଜ୍ୟରେ ପ୍ରାୟ ୪୦% ନିଅଣ୍ଟିଆ ବର୍ଷା ପରିସ୍ଥିତି ସୃଷ୍ଟି ହେବ ବୋଲି ପାଣିପାଗ ବିଜ୍ଞାନୀ ପୂର୍ବାନୁମାନ କଲେଣି।
Sambad is now on WhatsApp
Join and get latest news updates delivered to you via WhatsApp
ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ମିଳିଥିବା ସୂଚନା ମୁତାବକ ଆସନ୍ତା ଦୁଇ ଦିନ ରାଜ୍ୟରେ କିଛି କିଛି ସ୍ଥାନରେ ପ୍ରବଳ ବର୍ଷା ହେବା ସହ ରାଜ୍ୟର ଅନ୍ୟ ସ୍ଥାନରେ ସାମାନ୍ୟ ବର୍ଷା ହୋଇପାରେ। କିନ୍ତୁ ୨୪ ତାରିଖଠାରୁ ରାଜ୍ୟରେ ପାଗ ସମ୍ପୂର୍ଣ୍ଣ ଶୁଖିଲା ରହିବ। ଆସନ୍ତାକାଲି କେନ୍ଦୁଝର, ମୟୂରଭଞ୍ଜ, ବାଲେଶ୍ବର, ଦେବଗଡ଼, ସମ୍ବଲପୁର ଓ ସୋନପୁର ଜିଲ୍ଲାର କିଛି କିଛି ସ୍ଥାନରେ ପ୍ରବଳ ବର୍ଷା ହୋଇପାରେ। ଏ ପୁଣି ୨୩ ତାରିଖ ଦିନ ଝାରସୁଗୁଡ଼ା, ବରଗଡ଼, ସୁନ୍ଦରଗଡ଼, ବଲାଙ୍ଗୀର, କେନ୍ଦୁଝର, ନବରଙ୍ଗପୁର, ରାୟଗଡ଼ା ଓ କୋରାପୁଟ ଜିଲ୍ଲାର କେତେକ ସ୍ଥାନରେ ପ୍ରବଳ ବର୍ଷା ହୋଇପାରେ ବୋଲି କେନ୍ଦ୍ର ପକ୍ଷରୁ ସୂଚନା ମିଳିଛି। ଫଳରେ ଏହି ସବୁ ଅଞ୍ଚଳ ପାଇଁ କେନ୍ଦ୍ର ପକ୍ଷରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି। କୃଷି ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକ କହିଛନ୍ତି, ରାଜ୍ୟରେ ଜୁଲାଇ ଶେଷ ପର୍ଯ୍ୟନ୍ତ ବିଶେଷ ବର୍ଷାର ସମ୍ଭାବନା ନାହିଁ। ଦକ୍ଷିଣ ଓ କେନ୍ଦ୍ରୀୟ ବଙ୍ଗୋପସାଗରେ ଏକ ବିସ୍ତୃତ ଗୁରୁଚାପ ବଳୟ ସୃଷ୍ଟି ହେଉଛି। ଯାହା ଦ୍ବାରା ରାଜ୍ୟରେ ୨୫ରୁ ପାଗ ଶୁଖିଲା ଓ ଖରାଟିଆ ରହିବ।
ଡ. ପଶୁପାଳକ କହିଛନ୍ତି, ବର୍ତ୍ତମାନ ଧାନ ରୁଆ ବେଉଷା ଚାଲିବା କଥା। ଏଥିପାଇଁ ଗୋଟିଏ ଦିନରେ ଅତିକମ୍ରେ ୫୦ ମିମି, ୩ ଦିନରେ ୭୫ ମିମି ଓ ୭ ଦିନରେ ୧୦୦ ମିମି ବର୍ଷାର ଆବଶ୍ୟକ ରହିଥାଏ। ଯଦି ପ୍ରକୃତରେ ବର୍ଷା ନହୁଏ, ଚଳିତ ବର୍ଷ ରାଜ୍ୟର କେତେକ ଅଞ୍ଚଳରେ ବିଶେଷ କରି ଉପକୂଳରେ କୃଷି ପାଇଁ ସଂକଟ ସୃଷ୍ଟି ହୋଇପାରେ।